JOB 12 - Dios Rimashca Shimicunami

Jobca Taita Diospaj yachaita, rurai tucunata mañashcamanta

¹ Chaimanta Jobca, cashna nishpami cutichirca:

² Cancunallami alli runacuna canguichij. Alli yachaipish cancuna huañujpica, ña illangami.

³ Ñucapish cancuna shinallataj alli yuyaitami charini. Cancunaca mana ñucata yalli alli yuyaiyuj canguichijchu. Cancuna nishca shinallatajca, pitaj mana ni tucungari.

⁴ Ñucaca, ñucahuan alli apanacujllataj chanzata rurashpa asishcami cani. Taita Diosta mañajpica, paica cunllami. Cashcata ruraj cajpipish, ima pandata mana ruraj cajpipish, chanzata ruranllacunami.

⁵ Ñuca chaquicunaca llushpirinallami. Allipi cajcuna mana nishpa shitashca lámpara shinami cani.

⁶ Shuhuacunapaj huasicunapirajmi achca allicunapish tiyan. Taita Diosta p'iñachijcunarajmi, imata mana manchashpa causan. Paicuna mashnata charishcataca paicunapaj maquicunapimi churashca.

⁷ Shina cajpica cunanca animalcunata tapuyari, paicunaca yachachingallacunami. Huairata purij pajarocunata tapuyari, paicunaca rijsichingallami.

⁸ Mana cashpaca allpahuan parlanacuyari, paica yachachingallami. Mama cuchapi causaj chalhuacunapish huillangacunallami.

⁹ Cai tucuitaca Mandaj Diospaj maquihuan rurashcataca pitaj mana yachangari.

¹⁰ Tucui causaita charijcunapish, runacunapaj samaipish paipaj maquipimari.

¹¹ Rinrin uyajpimi alli shimi cashca, mana alli shimi cashcapish yacharin. Micunapish shimiman chayashpami, ima shina cashca yacharin.

¹² Yuyajcunami alli yachaita charincuna. Unita causajcunami alli yuyaicunatapish charincuna.

¹³ Alli yachaipish, rurai tucunapish Taita Dioshuanmi. Cunanapish, alli yuyaipish paipajmi.

¹⁴ Pai urmachishcataca, pipish mana cutin shayachi tucunchu. Runata huichcashpa churashcataca, pipish mana cutin pascashpa llujshichi tucunchu.

¹⁵ Yacucunata pai charijpica, tucui chaquirinllami. Tamyata yalli cacharijpipish, allpata apanllami.

¹⁶ Rurai tucunapish, alli yachaipish paihuanmi. Pandarijpish, pandachijpish paipajmi.

¹⁷ Paimi cunajcunamantapish cunana yuyaita anchuchin, juezcunatapish muspachinllami.

¹⁸ Millai mandajcuna huatashca cadenacunatapish paica p'itinllami. Paicunataca huascallahuanmi chumbillichin.

¹⁹ Paica jatun mandajcuna imalla charishcata quichunllami. Jatun tucushcacunatapish urmachinllami.

²⁰ Mana llullashpa rimacujcunatapish upayachinllami. Cunaj yuyajcunatapish cunana yuyaita quichunllami.

²¹ Paica jatun mandajcunatapish p'iñanata ruranllami. C'ari c'aricuna huatarishca chumbitapish pascanllami.

²² Paica amsa ucucunatapish pascanllami, huañunalla amsatapish achijman llujshichinllami.

²³ Paica llajtacunatapish mirachinllami, mirachishca cashpapish cutin chingachinllami. Llajtacunamanta caita chaita cachashpapish, cutin tandachinllami.

²⁴ Paica llajtapi causajcunata pushajcunatapish yuyaita quichunllami. Paicunataca ñan illaj shitashca pambata puricuchun saquinllami.

²⁵ Luz illaj amsapi puricuj shina tantiashpallami purincuna, machashcacunata shina muspachinllami.