JOB 11 - Dios Rimashca Shimicunami

Jobtaca Zofar juchachishpa rimashcamanta

¹ Naamamanta Zofar runa cutichishpaca, cashna nishpami rimarca:

² “Achcata rimarijpica ¿manachu cutichina tiyan imatagari? ¿Yallitaj rimarij runaca allimi cangui nishca cangallachu imatagari?

³ Can umashpa rimarishca shimicunaca runacunataca ¿upallachi tucungachu? ¿Mana cazushpa asijpica cantaca manachu pipish pingachinman?

⁴ Canca: Ñuca yachachishcaca allimi, cambaj ñahuipica ima mapa illajmi cani ninguimari.

⁵ Ashtahuanpish maijanpish Taita Diostaca, canhuan rimachun nijpichari, paipaj shimita pascashpa canhuan parlachun nijpichari.

⁶ Pai rimashpaca pacallapi tiyacuj yachaicunata ricuchinmanmi. Charinacunatapish yalli valijtamari ricuchinman. Chaipimi canca, Taita Diosllataj cambaj juchamanta llaquichicushcata yachanguiman. Canta llaquichina shinatajca mana llaquichicushcatapishmi yachanguiman.

⁷ ¿Canca Taita Diospaj yuyaipi pacalla tiyacushcataca ricui tucunguichu? ¿Tucuita Rurai Tucuj Diosmantaca, tucuita yachai tucunguichu?

⁸ Jahua pachatapish yalli jahuamanmari, ¿ima shinataj yachai tucunguiyari? Seoltapish yalli ucumanmari ¿ima shinataj rijsinguiyari?

⁹ Cai pachatapish yalli jatunmari, mama cuchatapish yalli anchomari.

¹⁰ Pai pasacushpa, japishpa llaquichinapaj cayajpica ¿pitaj canmanta shayarishpa jarcangari?

¹¹ Paica mana entendij runacunataca rijsinmi. Shinallataj millaita ruracujtapish ricunmi. ¿Chaita ricushpaca, saquingallachu imatagari?

¹² Burroca, genteta mana huachai tucunchu. Shinallataj mana entendij runapish manataj alli yuyaiyuj cai tucunchu.

¹³ Cambaj shunguta alli allichirishpa, ishqui maquita paiman churangui.

¹⁴ Cambaj maquihuan ima millaita ruracushpaca, chaita saquingui. Cambaj huasipipish ima mana allita ruranamanta jarcarishpa causangui.

¹⁵ Chashna causashpami, ima mapa illajlla cambaj ñahuitaca alzangui. Shinallataj sinchiyashpa, imata mana manchanguichu.

¹⁶ Cambaj llaquicunatapish cungaringuimi, mana cashpaca larcata yacucuna pasashcata shinallami yuyaringui.

¹⁷ Cambaj causaica chaupi punllatapish yalli achijllami canga, tutayajpipish tutamanta shinami canga.

¹⁸ Shuyana tiyajpimi, cambaj shungutaca chaipi churangui. Muyundijta chapashpa, imata mana manchashpa dorminguillami.

¹⁹ Can dormicujpipish, pi mana manchachingachu. Achcacunami cambaj ayudata mañanaman shamungacuna.

²⁰ Ashtahuanpish millaita rurajcunaca chingaringacunami, maipi miticunatapish mana charingacunachu. Paicunapaj shuyanaca, shuj cutin samaita aisashpa huañunallami” nircami.