JEREMÍAS 50 - Dios Rimashca Shimicunami

Babilonia llajtata llaquichinamantapish, israelcunata quiquin llajtaman tigrachinamantapish

¹ Caldeocuna causan Babilonia llajtata llaquichinataca, Mandaj Diosmi pai ima nishcata huillaj Jeremiashuan cashna huillachirca:

² “Llajtacunapi huillashpa yachaj chayachichigari. Banderacunatapish ricunallapi churashpa cashna huillaichigari: Babilonia puebloca shujtajpaj maquipi urmanca. Bel shuti diosca yallitaj pingai tucunca, Merodac diospish ñuturishcamari. Paicunapaj rurashcalla tucui dioscunamari ñutushca siricun nishpa caparichigari. Imata ama upalla saquirichijchu.

³ Janaj llajtamantamari chai llajtata llaquichigringa. Chaicunamari tucui ima tiyashcata chingachingacuna. Tucuicunamari shitashpa, llujshishpa ringacuna. Runacunapish, animalcunapish chaipica mana causangachu” nircami.

⁴ Mandaj Diosca cashnapishmi nin: “Chai punllacunapi, chai huatacunapica israelcunapish, Judá runacunapish huacashpamari, quiquin chaquihuan ñucata mashcangacuna. Paicunata Mandaj Dios cajpimari, ñucapajman shamungacuna.

⁵ Tandanacushpa jacuchij. Cunantajca huiñaita amataj cungaringapaj shuj yuyai tucushpa, Mandaj Dioshuan tandanacugrishunchij nishpami, ñantaca tapui tapui Sionman tigramungacuna.

⁶ Ñuca agllashcacunaca, chingarishca ovejacunami carca. Michijcunamari pandachircacuna. Paicuna urcucunaman pushashpa shitashpa saquijpimari, loman loman purishpa corraltapish cungarishpa mana tigrarcacuna.

⁷ Ñuca ovejacunataca maipi puricujta japishpapish huañuchircacunallami. Paicunata p'iñajcuna chashna huañuchishpaca: Caicunata huañuchishcamanta mana juchachishca cashunchu. Paicunallatajmari paicunata cuidashpa pushashpa causaj Mandaj Diosta mana cazurcacuna. Paicunapaj ñaupa yayacuna shunguta churashca Mandaj Diostamari p'iñachircacuna nircacunami.

⁸ Babiloniamanta miticuichigari, caldeocunapaj llajtamantaca llujshichigari. Oveja canlla ñaupajpi jatun c'ari chivo ñaupaj shina, pushashpa llujshichigari.

⁹ Ñucamari janaj llajtamantaca Babilonia llajtata llaquichichun, tandanacushca c'ari c'ari runacunata pushamugrini. Chai janaj llajtamanta allichirishpa shamushpami, macanacushpa mishangacuna. Macanacunata alli yachaj c'ari c'ari runaca macanacuimantaca, mana chushajlla tigrangachu. Chashnallataj paicunapish puntajlla caspicunataca, shujllatapish mana yanga shitancunachu” ninmi.

¹⁰ Mandaj Diosca cashnapishmi nin: “Caldeo runacunataca tucui ima charishcatami quichungacuna. Chaicunata quichujcunaca sajsajtami micungacuna.

¹¹ Cancunaca ñuca llajtata tucuchishpaca, jatuntami cushicurcanguichij. Llullu q'uihuaman huagra yaicushca shinami sajsarcanguichij. Caballocuna huacaricuj shinami caparirircanguichij.

¹² Chaimantami cancunapaj mama llajtapish jatun pinganayaj tucushpa saquiringa. Cancuna huacharishca llajtaca tucui llajtacunamanta yalli yangami saquiringa. Imapish illaj, shitashca, chaquishca pamballami canga.

¹³ Mandaj Diostajmi jatunta p'iñarishpa llaquichigrini. Chai tucui llajtami shitashca saquiringa. Shujllapish mana causaj saquiringachu. Maimantapish Babilonia llajtata pasacushpaca, llaquinayaj siricujta ricushpa mancharingacunami. Chanzata rurashpa asingacunapishmi ninmi.

¹⁴ Babilonia llajtapi causajcunaca Mandaj Diostamari p'iñachircacuna. Paicunahuan macanacungapaj allichirishpa, muyundijta shayarichijlla. Puntajlla caspicunata arcohuan shitajcuna, Babiloniapi causajcunapica ama mitsaj mitsajlla shitaichijchu.

¹⁵ Tucui muyundijpi shayarishpa, macanacunata callarinapaj caparirichij. Ñamari Babilonia pueblo muyundij jatun pirca t'unirin, callari rumicunamantapachamari urman. Chai pueblopi causajcunaca ñamari paicunataj llujshishpa japi tucuncuna. Mandaj Dios paicunata llaquichina punllamari, paicunataca llaquichichijlla. Paicuna shujtajcunata rurashca shinallataj ruraichijlla.

¹⁶ Babiloniapi causajcunataca tarpuchunpish, chagrata tandachunpish shuj runallatapish ama saquishpa tucuicunata huañuchichijlla. Espadahuan paicunata tucuchicui punllami shujtaj llajtacunamanta cajcunaca quiquin llajtacunaman, quiquin familiacunapajman tigrangacuna.

¹⁷ Israelcunaca, leoncuna catijpi chingarishca ovejacuna shinami. Puntaca Asiria llajtata jatun mandajmi micurca. Pai saquishcacunataca, Babilonia llajtata jatun mandaj Nabucodonosormi tucui tullucunata p'aquishpa micurca.

¹⁸ Chaimantami tucuita Mandaj, israelcunapaj Diosca cashna nin: “Babilonia llajtata jatun mandajtaca, Asiria llajtata jatun mandajta shinallataj, paipaj tucui llajtandijmi llaquichigrini.

¹⁹ Paita llaquichishpami, israelcunataca paicunapaj quiquin llajtaman tigrachimusha. Chashna tigrachimujpimi ñuca ovejacunaca Carmelo urcupi, Basán urcupi, Efraín urcupi, Galaad urcupipish alli micushpa huirayangacuna.

²⁰ Ñucallataj mana causaita quichushpa saquishca israelcunataca, tucui juchacunatami perdonasha. Chaimantami chai punllacunapi, chai huatacunapica israelcunapish, Judá runacunapish ima juchachina illaj cangacuna. Mashcajpipish paicunapica, ima jucha mana japi tucungachu” ninmi Mandaj Diosca.

²¹ Mandaj Diosca cashnapishmi nin: “Merataim llajtapi causajcunahuan macanacuj shamuyari. Pecod llajtapi causajcunata catishpa huañuchiyari. Ñuca mandashca shinataj tucuchishpa saquiyari.

²² Cai pachapica, jatun caparinacuimari tiyan.

²³ Martillo tacaj shina tucui cai pacha llajtacunata llaquichij llajtamari tucurishca. Babilonia llajtamari tucui shujtaj llajtacunata mancharina llaqui tucushca. ¿Ima shinataj chashnaca tucurcachu imamí?

²⁴ Babilonialla, canllatajmari ñucata p'iñachircangui. Chaimantamari ñucaca huascata churarcani, mana ricushpamari chaipi tsagnarishpa urmarcangui. Mandaj Dios ñucamari cantaca prezu japichini.

²⁵ Ñuca, Mandaj Diosmari ñuca macanacunacunata huaquichishca huasita pascarcani. Jatunta p'iñarishca cashpamari, ñuca macanacunacunataca llujshichircani. Tucuita Mandaj Diosmari caldeocunapaj llajtapica, ñuca rurana cashcata pajtachigrini.

²⁶ Tucui maipi tiyaj llajtacunamanta shamushpa, paihuan macanacuichij. Pai charishcacunata huaquichishcamanta, tucui llujshichishpa apaichij. Tucui ima tiyajta tucuchishpa, rumi montonllata saquichij.

²⁷ Paipaj tucui soldadocunatapish huagracunata huañuchinaman apaj shina, tucuicunata huañuchichij. ¡Aij chai runacunalla! Paicunata jatunta llaquichina punllamari chayamushca” ninmi.

²⁸ Babilonia llajtamanta quishpirishpa shamujcuna huillacujtamari uyani. Ñucanchijta Mandaj Diosmari Babilonia llajtapi causajcunataca, paipaj huasita urmachishcamanta llaquichishca nishpami huillacuncuna.

²⁹ “Babiloniapi causajcunataca puntajlla caspicunahuan huañuchichun tucui arcoyujcunata tandachichij. Tandanacushpa paipaj tucui muyundijpi shayarichij, shujllatapish ama causaj llujshichun saquichijchu. Paicuna rurashcallatataj cutichichigari. Paicunaca israelcunapaj jucha illaj Mandaj Diostamari jatun tucushpa c'ariyarcacuna.

³⁰ Chaimantami paicunapuramantaca, chairaj runacunatapish tucuicunata plazacunapi huañuchingacuna. Chai punllapica paicunapaj tucui soldadocunapishmi huañungacuna” ninmi Mandaj Diosca.

³¹ Tucuita Mandaj, Jatun Diosca cashnapishmi nin: “Jatun tucushca llajtalla, cantaca japinamari tiyacuni. Ñuca canta llaquichina punlla, ñacachina huata chayamungami.

³² Jatun tucushpa tiyacushca runaca tsagnarishpa urmangami, paitaca pi mana jatarichingachu. Paipaj tucui pueblocunatapish ushpallatami saquisha. Tucui muyundij llajtacunatapishmi rupachisha” ninmi.

³³ Tucuita Mandaj Diosca cashnapishmi nin: “Israelcunapish, Judá runacunapish llaquichishcami causacuncuna. Paicunata prezu apajcunaca mana cacharisha nishpa charicunllacunami.

³⁴ Shina cajpipish paicunata mitsaj, tucuita Mandaj Dios ñucatajmi Babilonia llajtataca llaquichisha. Ñucaca tucuita Mandaj shutimi cani. Ñuca shayarishpami, israelcunataca cacharichisha. Chashnamari ñucaca cai llajtataca, Babilonia llajta llaquichicunmantaca samachisha” ninmi.

³⁵ Mandaj Diosca cashnapishmi nin: “Babilonia llajtapi causaj caldeocunapajca, huañuchij espadami shamunga. Paicunata mandajcunapajpish, paicunapaj jatun yachajcunapajpishmi shamunga.

³⁶ Espada shamushpaca, paicunapaj adivinajcunatapish upayachingami. Espada shamushpaca, paicunapaj c'ari c'ari runacunatapish chujchuchingami.

³⁷ Espadahuanmi paicunapaj caballocunatapish, carretacunatapish tucuchingacuna. Espada shamujpica, tucui soldadocunapish huarmicuna shinami manchangacuna. Espadahuan yaicushpami, paicuna imalla charishcacunatapish llujshichingacuna.

³⁸ Mana tamyajpimi, paicunapaj jatun yacucunapish tucui chaquiringa. Chai llajtapica rurashcalla dioscunatami jundachishpa charincuna. Chaimantami upa shina causashcamanta, chashna llaqui tucunga.

³⁹ Babilonia pueblopica chacal animalcunapish, shitashca pambapi causaj shujtaj manchanana animalcunapishmi causangacuna. Avestruz pajarocunapishmi huahuacunayuj tucushpa causanga. Ashtahuanpish gentecunaca manataj cutin chaipi causangachu, huiñaita shitashcami saquiringa” ninmi.

⁴⁰ Shinallataj Mandaj Diosca cashnami nin: “Mandaj Diostajmi Sodoma shuti, Gomorra shuti pueblocunataca, muyundijpi caj caishuj pueblocunandij chingachircani. Babiloniapica chaicunapi shinallataj pi mana causangachu, shujllapish mana tiyangachu.

⁴¹ Janajman caj caru llajtamantami achca jatun mandajcuna, achca soldadocunahuan shamugrincuna.

⁴² Paicunaca arcohuanpish, lanzahuanpish alli macanacunata yachajcunami. Pita mana llaquishpa huañuchingallacunami. Paicuna caparirishcapish mama cucha yacu jatarishca shina manchananatami uyaringa. Babiloniapi causajcunalla, chai runacunamari cancunahuan macanacungapaj allichirishpa, caballocunapi tiyarishca shamungacuna.

⁴³ Babilonia llajtata jatun mandaj chaita uyashpaca, rigracuna chujchurcami. Yallitaj manchashpami, nanaihuan mana huachai tucucuj huarmi shina tucurca.

⁴⁴ Jordán yacu uri sachamanta león llujshij shinamari chai jatun pircayuj pueblota llaquichigrini. Ñallami manchachishpa chaimanta callpachigrini. Ñuca agllashca runatami chashna rurachun mingasha. ¿Pitaj ñuca shina cangari? Ñucahuanca ¿pitaj ch'imbapurai tucungari? Ñuca llaquichicujpica ¿pi michijtaj mitsangapaj shayari tucungari?” ninmi.

⁴⁵ Chashna cashcamantaca, Mandaj Dios Babilonia llajtata imata rurasha nishcata, caldeocunata ima shina llaquichinata yuyarishcata uyaichigari. Paicunapaj canlla ovejacunatapish ashtahuan uchillacamami apangacuna. Ovejacuna shayanacunatapish tucui urmachishpami saquingacuna.

⁴⁶ Babilonia llajtata mishashpa caparinacujpica, allpapish chujchungami. Chashna caparinacushcaca, tucui llajtacunacamami uyaringa” ninmi.