JEREMÍAS 49 - Dios Rimashca Shimicunami

Amón llajtata llaquichinata huillashcamanta

¹ Mandaj Diosca, Amón llajta runacunamantaca cashnami nin: “Israelcunaca, ¿manachu huahuacunata charin imatagari? Paicunapaj allpacunataca ¿manachu piman cunata charin imatagari? ¿Imamantataj Milcom diosca, Gad aillu israelcunataca llajtata quichushcari? ¿Imamantataj cunanca paipaj runacuna chai pueblocunapi causancunari?” ninmi.

² Chaimantami Mandaj Diosca cashnapish nin: “Shuj punllaca Amón runacuna causan Rabá pueblopica, jatun macanacuitami churasha. Chaipica caparirishpami llujshingacuna. Chai puebloca rumi montonllami saquiringa. Chai muyundij tucui caishuj pueblocunapish rupachishcami canga. Chai punllami israelcunaca, paicunata quichushca pueblocunata cutin tigra japingacuna” ninmi Mandaj Diosca.

³ Hesbón pueblopi causajcuna, huacaichigari. Hai pueblotaca, ñamari tucuchishcacuna. Rabá pueblopi causajcunalla, cancunapaj Milcom diostaca paipaj curacunandij, paipaj mandajcunandij ñamari prezu apashcacuna. Jatunta caparishpa, yupashpa yupashpa huacaichigari. Cañamazuta churarishpa, huacaihuan pirca jahuata muyuichigari.

⁴ Cancunaca, jatun tucushca huarmi shinamari canguichij. ¿Imamantataj cancunapaj pugru pambacunamanta jatun tucunguichigari? ¿Pitaj ñucanchijtaca llaquichinaman shamungari? ninguichijmari. Ñamari cancunapaj pugru pambaca, tucuchishca siricun ninmi.

⁵ Tucuita Mandaj, Jatun Diosca cashnapishmi nin: “Ñucamari cancunapaj tucui muyundijllamantataj cancunata manchachijta pushamugrini. Chaipica tucuicunami caita chaita callpanguichij. Chashna llujshishpa rijcunata cutin tandachijllapish mana tiyangachu.

⁶ Shina cashpapish chai q'uipaca, ñucallatajmi Amón llajtamanta prezu apashcacunataca tigrachimusha” ninmi Mandaj Diosca.

Edom llajtata llaquichinata huillashcamanta

⁷ Tucuita Mandaj Diosca, Edom llajtamantaca cashnami huillarca: “Temán pueblopica, jatun yachajcuna ¿ñachu illan imatagari? Jatun yachajcunaca ¿ñachu ima alli yuyaita mana cui tucuncuna imatagari? Paicuna yachashcaca ¿yangachu tucushca imatagari?

⁸ Dedán pueblopi causajcunalla, huashaman tigrashpa callpaichigari. Esaupaj huahuacunapajca ñucamari jatun llaqui punllata apamugrini. Jatun huaicucunapi miticushpa causagrichigari.

⁹ Uvata pallajcuna, uvata japicushpaca huaquin granocunallatapish saquintajmari. Shuhuacuna tuta shamushpapish, paicuna apasha nishcallatami apancuna.

¹⁰ Ashtahuanpish ñucaca, Esaupaj huahuacunataca tucuicunatamari tucuchisha. Paicuna maipi miticujpipish llatanashallami, maipi mana miticui tucungacunachu. Chashnami Esaupaj huahuacunapish, paipaj huauquicunapish, c'uchulla llajtacunapish tucuicuna chingachishca cangacuna.

¹¹ Cancunapaj huahuacunataca ñucaman saquichijlla, ñuca huiñachishallami. Viuda huarmicunapish ñucapi shunguta churachunlla” ninmi.

¹² Mandaj Diosca cashnapishmi nin: “Ñuca p'iñarishpa ubyachinata ñuca copamanta manapish ubyana tiyacujcunapish ubyangacunami. Chashna cashcamantaca, cancunalla mana ubyashpa saquirinataca ama yuyaichijchu. Ashtahuanpish ubyanatajmi canguichij.

¹³ Ñucatajmi Bosra pueblota tucui urmachishpa, shujtajcunapish chai shina tucushca alli cachun nina, shitashcata saquinata yuyarircani. Chaimantami jatun llaqui tucushpa saquiringa. Chai muyundij tucui caishuj pueblocunapish, huiñaipajmi urmachishca saquiringa” ninmi.

¹⁴ Shuj huillajta cashcatamari ñucamanca huillarca. Mandaj Diosmari chai huillajtaca, llajtacunapi causajcunaman cashna huillachun cachashca: “Edom llajtapi causajcunahuan macanacunaman tandanacumuichij.

¹⁵ Cancunataca uchilla llajtacunapi causajcunatapish yalli ashalla runacunatami ruragrini. Tucui runacuna p'iñashcatami ruragrini.

¹⁶ Jatun rumi c'aca jutcucunapi, jatun urcu lomacunapi causajcunalla, cancunapaj shungupi jatun tucushpa, c'ari tucushpamari umarircanguichij. Aguilacuna tazinta rurashca shina jahuacunaman causajpipish, chaimanta uriyachishallami” ninmi Mandaj Diosca nichunmi cachashca.

¹⁷ “Edom llajtaca mancharina jatun llaquita rurashcami saquiringa. Ñanta pasacujcunapish chashna shitashca saquirishcata ricushpaca mancharingacunami, chanzata rurashpa asingacunapishmi.

¹⁸ Tucui chai llajtaca Sodoma, Gomorra shuti pueblocunata chai muyundij pueblocunandijta chingachishca shinami saquiringa. Shuj runallapish mana saquiringachu, pipish mana chaipi causangachu. Mandaj Diostajmi chashna nini.

¹⁹ Huirayashca sumaj animalta japinaman, Jordán yacu uri sachamanta león llujshij shinami, paicunataca llaquichinaman huichiyasha. Ñallami ñuca agllashca runata cachashpa, chai llajtamanta callpachigrini. ¿Pitaj ñuca shina cangari? Ñucahuanca ¿pitaj ch'imbapurai tucungari? Ñuca llaquichicujpica ¿pi michijtaj mitsai tucungari?” ninmi.

²⁰ Tucui Edom runacunatapish, Temanpi causajcunatapish Mandaj Dios ima shina llaquichinata yuyarishcata uyaichigari: “Paicunapaj canlla ovejacunatapish ashtahuan uchillacamami apangacuna. Ovejacuna shayanacunatapish tucui urmachishpami saquingacuna.

²¹ Edom llajtaca, allpa chujchujtami urmanga. Caparirinacushcapish Puca Cuchacamami uyaringa.

²² Bosra pueblopi causajcunata llaquichinamanca, alasta pascashpa huairapi águila shamuj shinami shamunga. Chai punllapica Edom runacunaca, ashtahuan c'ari c'aricunapish, huachana nanai japishca huarmi shinami canga” ninmi.

Damasco pueblopi causajcunata llaquichinata huillashcamanta

²³ Damasco pueblopi causajcunamantaca, Mandaj Diosca cashnami huillarca: “Hamat, Arfad shuti pueblocunapi causajcunaca paicunata jatun llaqui japigrin nijtamari uyashcacuna. Chaita uyashpamari mancharishpa musparincuna. Yacuyashpa tucuricuj shinami mana samarincuna.

²⁴ Damascopi causajcunapish, imata mana rurai tucushpa, miticunaman callpagrincunami. Jatun manchai, jatun nanaimari japishca. Huachana nanai japishca huarmi shinamari tucuncuna.

²⁵ ¡Chai sumaj jatun pueblota, ñuca cushicuna pueblotamari shitashpa rincuna!

²⁶ Chairaj runacunapish tucuicunami plaza pambacunapi huañungacuna. Tucui soldadocunapishmi chai punllapica huañungacuna. Tucuita Mandaj Diostajmi chashna nini.

²⁷ Damasco pueblo muyundij jatun pircataca, ninahuanmi tucui rupachichisha. Ben-adadpaj huasicunaca ushpallamari saquiringa” ninmi.

Cedar nishcacunatapish, Hazor nishcacunatapish llaquichinata huillashcamanta

²⁸ Cedar nishcacunatapish, Hazor pueblota mandajcunatapish Babilonia llajtata jatun mandaj Nabucodonosormi tucuchirca. Pai manaraj tucuchijpimi, paicunamantaca Mandaj Diosca cashna huillarca: “Cedar nishcacunahuan macanacunaman tandanacushpa shamuichij. Inti llujshin llajtapi causajcunataca tucuchichigari.

²⁹ Paicunapaj carpa huasicunatapish, huagracunatapish tucuimi japinguichij. Paicuna jarcachina linsocunatapish, ima charinacunatapish cancunapaj apanguichijmi. Paicunataca: Tucui muyundijtami chapacunchij nishpa manchachinguichij” ninmi.

³⁰ Mandaj Diosca cashnapishmi nin: “Hazorpi causajcunalla, chaimanta llujshishpa carupi miticugrichigari. Jatun huaicucunapi causagrichigari. Babilonia llajtata jatun mandaj Nabucodonosormari cancunata llaquichinataca yuyarishca. Ima shina japinatamari alli yuyarishca.

³¹ Ñuca, Mandaj Diostajmi paicunataca cashna mandarcani: Imata mana yuyashpa, ima manchai illajlla paicunalla causajcunata llaquichigrichij. Paicunaca pungucunapish, aldabacunapish illajlla pueblocunapimi causancuna.

³² Paicunapaj camellocunatapish, mana yupaipaj achca huagracunatapish tucuitami quichushpa apanguichij. Paicunatapish tucui llajtacunamanmi caita, chaita cachasha. Llaquichijcunata tucui ladomanta apamushpami, paicunataca chashna rurasha. Mandaj Diostajmi chashna nini.

³³ Hazor puebloca, huiñaitami shitashca saquiringa, chacal animalcunallami causanga. Manataj cutinca pi causangachu” ninmi.

Elam llajtata llaquichinata huillashcamanta

³⁴ Jatun mandaj Sedequías, Judá llajtata mandai callari huatami, Mandaj Diosca pai ima nishcata huillaj Jeremiastaca, Elam llajtata llaquichinata cashna huillachirca:

³⁵ “Tucuita Mandaj Diosca cashnami nin: Elam llajta runacunaca arcohuanmi macanacushpa mishancuna, chai arcocunataca p'aquigrinimi.

³⁶ Cai pacha chuscundij ladomantami, jatun huairata apamugrini. Elam llajtapi causajcunataca, chai huairapimi caita chaita cachasha. Elam llajta runacunaca, tucui llajtacunamanmi miticushpa ringacuna” ninmi.

³⁷ Mandaj Diosca cashnapishmi nin: “Ñucaca jatunta p'iñarishpami, Elam llajta runacunapajca jatun llaquita apamugrini. Tucui paicunata tucuchichunmi, espadacunahuan huañuchijcunata cachagrini. Paicunata p'iñashpa huañuchinaman shamujpica, Elam runacunaca yallitajmi manchangacuna. Ñucallatajmi paicunapica chashna manchana yuyaita churasha” ninmi.

³⁸ Mandaj Diosca cashnapishmi nin: “Elam pueblopica, ñuca mandanata churashpami, chaipi jatun mandajtapish, pai churashca mandajcunatapish tucuchisha.

³⁹ Shina cashpapish shamuj punllacunapica, Elam llajtamanta prezu apashcacunataca, cutinllatajmi tigrachisha” ninmi Mandaj Diosca.