JEREMÍAS 47 - Dios Rimashca Shimicunami

Filisteocunata llaquichinata huillashcamanta

¹ Gaza pueblopi causaj filisteocunata faraón manaraj llaquichijpimi, Mandaj Diosca pai ima nishcata huillaj Jeremiastaca, filisteocunata llaquichinata cashna huillachirca:

² Mandaj Diosca cashnami nin: “Janaj llajtamantami jatun yacu jundashpa jicharimunga. Chai yacumari chai llajtapi jundanga, pueblotapish tucui chaipi causajcunandijmi millpunga. Chai tucui llajtapi causaj runacunami caparirishpa huacangacuna.

³ Caballocunami culun nishpa callpamunga, carretacunapish ruedacuna t'alaj nishpa huajiashpami shamunga. Chaita uyashpaca yayacunapish, huahuacunata shitashpami callpangacuna. Maquicuna chujchushpa imata mana rurai tucungacunachu.

⁴ Filisteocunata tucuchina punlla chayamungami, paicunata ayudacuj Tiro shuti, Sidón shuti pueblocunapish tucuringami” ninmi. Mama cucha chaupipi caj Caftor llajtamanta chaupirishpa shamushca filisteocunataca, Mandaj Diosmari tucuchinga.

⁵ Gaza pueblopi causajcunaca, uma ajchata rasparircacunami. Ascalonpi causajcunacarin tucurircamari. Chai pueblo c'uchu pugru pambapi causajcunapish, ¿maicamachari llaquirishpa quiquin aichata chugrichiricunguichijlla?

⁶ Mandaj Diospaj espadalla, ¿ima horastaj samarigringuiyari? Canta huaquichinapi yaicushpa samariyari.

⁷ ¿Maitataj samaringuipishari? Mandaj Diosmari cantaca, Ascalón pueblopi causajcunata huañuchichun cachashca. Mama cucha uripi caj llajtapi causajcunata huañuchichunmari chaipi churashca.