JEREMÍAS 45 - Dios Rimashca Shimicunami

Quillcaj Barucman Jeremías huillashcamanta

¹ Josiaspaj churi jatun mandaj Joacimca, ñami Judá llajtataca chuscu huatata mandacurca. Chai huatami Dios ima nishcata huillaj Jeremiasca, Neriaspaj churi quillcaj Barucmanca Dios huillachun nishcata huillarca. Jeremiasca pai huillashca shimicunata shuj pillushca carapi quillcacujpimi, Barucmanca cashna huillarca:

² “Baruc runalla, israelcunata Mandaj Diosca cantaca cashnami nin:

³ Canca: ¡Aij ñucalla, imachari tucusha! Mandaj Diosca caitaj jatun llaquihuan cajllapitaj, ashtahuanmari ñucataca llaquichicun. Ña mana huacai tucunica, ashallatapish mana samari tucunichu nicunguimi.

⁴ Chaimanta paitaca cashna ningui ninmi: Mandaj Diosca cashnami nin: Ñuca shayachishcacunatami urmachicuni, ñuca tarpushcacunatami aisashpa shitacuni. Tucui cai llajtapi causajcunatami chashna rurasha.

⁵ ¿Chashna ruracujta ricushca jahuachu, canllata alli charichun munangui? Chaitaca ama mashcaichu. Ñucaca tucuicunapajmi llaquita apamuni. Shina cajpipish cantaca maiman rijpipish, huañuchichun mana saquishachu ninmi Mandaj Diosca ningui” nircami.