JEREMÍAS 40 - Dios Rimashca Shimicunami

Jeremiasmantapish, Judá llajtapi Gedaliashuan saquishcacunamantapish

¹ Jerusalenpi causajcunatapish, Judá runacunatapish Babiloniaman prezu apacushpaca, Jeremiastapish paicunallahuantajmi cadenacunahuan huatashpa aparcacuna. Chashna ricujpica, cuidaj soldadocunata mandaj Nabuzaradán japishpami, Jeremiastaca Ramá pueblomanta tigrachishpa cacharca. Chaimanta tigrashca q'uipa, Mandaj Dios huillachishca shimicunami caipica tiyacun:

² Cuidaj soldadocunata mandaj Nabuzaradanca, Jeremiasta chaipi japishpaca cashnami nirca: “Canta Mandaj Diosca cai llajtataca, cashna llaquichinallatatajmi huillarca.

³ Pai Mandaj Diosca chaitaca, pai nishca shinatajmi rurashca. Cancunallataj Mandaj Diosta mana cazushpa paita p'iñachijpi, pai rimashca shimicunatapish manataj uyajpimi, cai tucui llaquicuna shamushca.

⁴ Cunan ñucaca maquicunapi cadenacunahuan huatashca ricushcamanta cacharinimi. Ñucahuan Babiloniaman rina cambaj yuyaipi alli cajpica, ñucahuan jaculla. Cantaca alli cuidashpa pushashallami. Babiloniaman ñucahuan rina mana alli yuyachijpica, saquirilla. Cai tucui llajtapica, maipi cambaj ashtahuan alli cana cajpi, maiman rina ashtahuan alli yuyachijpica chaiman rilla.

⁵ Saquirisha nishpaca, Ahicampaj churi Gedaliaspajman tigrailla. Safanpaj nieto Gedaliastaca Babilonia llajtata jatun mandajmi, tucui Judá llajta pueblocunapi causajcunata mandaj cachun churashpa saquirca. Judapi saquirishca cambaj llajtapuracunapaj chaupipi paipaj huasipi causagrilla. Mana cashpaca maipi ashtahuan alli canata ricushpa chaiman rinata agllailla” nircami. Shina nishpaca cuidaj soldadocunata mandajca micunatapish, shuj sumaj convidanatapish cushpami, Jeremiastaca caya minchacama nishpa cacharca.

⁶ Jeremiasca, Ahicampaj churi Gedaliaspajmanmi, Mizpa puebloman tigrarca. Chaipimi paipaj huasipi causarca. Chashnami Judapi saquirishcacunapurallapitaj causarca.

Miticushpa saquirishca Judá soldadocuna Gedaliaspajman rishcamanta

⁷ Babilonia llajtata jatun mandajca, Ahicampaj churi Gedaliastami Judá llajtapi saquishca tucui c'aricunatapish, huarmicunatapish, huahuacunatapish, huajchacunatapish mandashpa, cuidashpa tiyachun mingashpa saquirca. Babilonia llajtaman mana apashcacunata mandachun paita saquishcataca, urcucunapi miticushpa saquirishca mandaj soldadocunami paicunapaj soldadocunandijllataj yachaj chayarcacuna.

⁸ Chaimantami paicunaca Gedaliaspajman, Mizpa puebloman shamurcacuna. Caicunami shamurcacuna: Netaniaspaj churi Ismaelpish, Carea runapaj Johanán, Jonatán shuti ishqui churicunapish, Tanhumetpaj churi Seraiaspish, Netofa pueblopi causaj Efaipaj churicunapish, Maaca pueblopi causaj shuj runapaj churi Jezaniaspishmi shamurca. Tucui paicunami paicunapaj soldadocunandij shamurcacuna.

⁹ Paicuna shamujpica, Safanpaj churi caj Ahicampaj churi Gedaliasca paicunatapish, paicunapaj soldadocunatapish cashnami nirca: “Caldeocunata servishpa causanataca ama manchaichijchu. Babilonia llajtata jatun mandajta servishpa cai ñucanchij llajtallapitaj causaichijlla, ima mana tucunguichijchu.

¹⁰ Caldeocuna ñucanchijpajman shamujpi cancunapaj randi shayaringapajmi, ñucaca cai Mizpa pueblopi causacuni. Ashtahuanpish cancunaca cunancama causacushca pueblocunallamantaj tigrashpa tiyarigrichijlla. Vinotapish, aceitetapish, p'ucushca granocunatapish usyapi tandashpa, huaquichinacunapi huaquichigrichijlla” nircami.

¹¹ Shinallataj Judá llajtamanta rishpa Moab, Amón, Edom shuti llajtacunapi cajcunapish, tucui caishuj llajtacunapi cajcunapishmi Babilonia llajtata jatun mandajca, Judá llajtapi huaquincunata saquishcata yachaj chayarcacuna. Shinallataj chaipi saquirishcacunata mandachunca, Safanpaj churi caj Ahicampaj churi Gedaliasta saquishcatapishmi yachaj chayarcacuna.

¹² Chaita yachashpaca, Judá llajtamanta caj tucui cai runacunami paicuna llujshishpa rishca allpacunallamantaj tigrarcacuna. Judá llajtapi caj Mizpa pueblomanpish Gedaliashuan rimanaman rircacunami. Paicunaca vinotapish, ima shujtaj granocunatapish achcatami tandarcacuna.

Ismael runaca Gedaliasta huañuchinata shujtajcunahuan yuyarishcamanta

¹³ Gedaliasca, Mizpa pueblopimi causacurca. Shuj punllami Carea runapaj churi Johananpish, urcucunapi miticushpa saquirishca caishuj mandaj soldadocunapish Gedaliaspajman shamurcacuna.

¹⁴ Paicunami Gedaliastaca: –Amón runacunata jatun mandaj Baalisca, Netaniaspaj churi Ismaeltamari canta huañuchichun cachashca. ¿Chaitaca manachu yachangui?– nircacunami. Shina nijpipish, Ahicampaj churi Gedaliasca mana crircachu.

¹⁵ Chaimantami Careapaj churi Johananca Mizpa pueblollapitaj Gedaliasllata cashna nirca: Netaniaspaj churi Ismaeltaca pi mana yachajllapi cunantaj rishpa huañuchimugrisha. ¿Maitataj canta huañuchichunca saquinguiyari? Canhuan tandanacushpa, cai Judá llajtapi causacujcunaca caita, chaitamari ringacuna. Huaquincunallapish saquirishca cai Judá runacunaca chingaringamari– nircami.

¹⁶ Shina nijpipish Ahicampaj churi Gedaliasca, Careapaj churi Johanantaca: –Ama chaita ruragrichu, Ismaeltaca manapish pai rurasha nicushcata yanga juchachicunguillami– nircami.