JEREMÍAS 34 - Dios Rimashca Shimicunami

Jatun mandaj Sedequiasman huillashcamanta

¹ Babilonia llajtata jatun mandaj Nabucodonosorca, pai mandacushca tucui llajtacunamanta ch'ican ch'ican runacunapuramanta tandachishca paipaj tucui soldadocunandijmi Jerusalenpi causajcunahuanpish, tucui caishuj pueblocunapi causajcunahuanpish macanacurca. Mandaj Dios chai punllacunapi Jeremiasta huillachishca shimicunami caipica tiyacun.

² Israelcunata Mandaj Diosca ñucataca cashnami nin: “Judá llajtata jatun mandaj Sedequiaspajman rishpa cashna nigri: Mandaj Diosca cashnami nin: Cai pueblotaca ñucatajmi Babilonia llajtata jatun mandajman cugrini. Pai japishpaca ninata japichishpami, tucui rupachinga.

³ Canpish paipaj maquimantaca manataj quishpiringuichu, ashtahuanpish prezu japishpa paipaj maquipi churangacunatajmi. Babilonia llajtata jatun mandajtaca ñahui ñahuimi ricungui, paipaj ñaupajpimi rimangui. Babilonia pueblomanpish apashca canguimi ninmi.

⁴ Shina cajpipish Judá llajtata jatun mandaj Sedequiaslla, Mandaj Dios rimashcata uyayari. Mandaj Diosca canmantaca cashnamari nin: Canca mana espadahuan huañuchishca canguichu.

⁵ Sumaj huañuitami charingui. Can huañujpica, cambaj ñaupa yaya jatun mandajcunapaj huañuipi shinallatajmi mishquijllata ashnaj jambicunata rupachingacuna. Shinallataj: ¡Aij, ñucanchij mandajlla! nishpa huacangacunapishmi. Ñuca huillachishcaca, chashnatajmi tucunga ninmi Mandaj Diosca” nircami.

⁶ Dios ima nishcata huillaj Jeremiasca, Jerusalenpimi Judá llajtata jatun mandaj Sedequiasmanca, tucui cai shimicunataca huillarca.

⁷ Babilonia llajtata jatun mandajpaj soldadocunaca Jerusalenpi causajcunahuanpish, Judá llajtapi tiyaj tucui caishuj pueblocunamanta saquirishca Laquis shuti, Azeca shuti pueblocunapi causajcunahuanpishmi macanacucurca. Judá llajtapica muyundijta jatun pircayuj pueblocunamantaca, chai ishquillami saquirishca carca.

Servijcunata cacharishpa cachashca jahuallataj cutin japishcamanta

⁸ Jatun mandaj Sedequiasca, tucui servijcunata cacharingapajmi, tucui Jerusalenpi causajcunahuan ari ninacurca. Chai punllacunapi Mandaj Dios Jeremiasta huillachishca shimicunami caipica tiyacun.

⁹ Jerusalenpi causajcunataca hebreocunapurallataj caj servijcunataca c'ari cachun, huarmi cachun tucuicunata cacharishpa cachachun. Judapi causajcunata, pipish ña ama servichishpa charichunmi ari nichirca.

¹⁰ Ña ama ashtahuan servichishpa, cacharishpa cachachun nishcataca tucui mandajcunapish, Jerusalenpi tucui causajcunapishmi ari nircacuna. Chaimantaca tucuicunami servij c'aricunatapish, huarmicunatapish cacharishpa cacharcacuna.

¹¹ Shina cashpapish q'uipataca, yangamari cacharishpa cachanchij nishpami, paicunata servijcunataca c'aricunatapish, huarmicunatapish cutintaj servichingapaj tucuicunata tigrachircacuna.

¹² Chaimantami Mandaj Diosca cai shimicunata huillachun nijpi, Jeremiasca cashna huillarca:

¹³ “Israelcunata Mandaj Diosca cashnami nin: Ñucaca cancunapaj ñaupa yayacunataca, Egipto llajtapi causajcunata servishpa, llaquinayajta causacujpimi llujshichimurcani. Paicunahuanca chaimanta llujshichimui punllami cashna nishpa ari ninacurcanchij:

¹⁴ Can hebreocunapurallataj maijanta cancunaman c'atujpica, sujta huatallata servichishpa charinguichij. Canchis huata callaripica, cacharishpa cachanguichijlla nircanimi. Shina mandashcataca cancunapaj yayacunaca mana cazurcacunachu, mana uyashun nircacunallapishchu.

¹⁵ Cancunaca cancunata servij cancunapaj familiacunata cacharishpa cachashpaca, ñuca munashcatami rurarcanguichij. Allita rurana yuyaita japishpami, ñucata mañana huasipi ñuca ñaupajpi ari nishpa, paicunataca cacharircanguichij.

¹⁶ Shina cashpapish cutin yuyarishpamari, paicuna imatapish ruragrichun cacharishpa cachashca c'aricunatapish, huarmicunatapish cutinllataj japinguichij. Chaimantaca cutinllataj servichishpamari, huatashcata shina charicunguichij. Chashna rurashpaca, ñuca ñaupajpi ari nishcata p'aquishpa, ñucatami yangata rurarcanguichij” ninmi.

¹⁷ Cancuna chashna rurashcamantami, Mandaj Diosca cashna nin: “Cancunaca ñucata mana cazushpami, cancunapaj familiacunataca servichicushcamanta mana cacharishpa cachanguichij. Chaimantami ñucapish espadahuan huañuchijcunatapish, jatun yaricaitapish, ungüitapish cancunata llaquichichun cachagrini. Chai jatun llaquihuanmi cancunataca, tucui cai pacha llajtacunapaj chaupipi jatunta pingachigrini. Ñuca, Mandaj Diostajmi chashna nini.

^18-19 Judá llajtata mandajcuna, Jerusalén pueblota mandajcuna, caishuj mandajcunapish, curacunapish, tucui cai llajtapi causajcunapishmi bizita huañuchishca aichata ishquipi ch'icanchishca chaupita pasashpa ñuca ñaupajpi ari nircacuna. Chai bizi aichata ch'icanchishca chaupita pasashpa paicunapaj shimihuan ñucaman ari nishcata p'aquishpa, mana pajtachijcunataca tucuicunatami llaquipi churagrini.

²⁰ Paicunata p'iñashpa huañuchishun nicujcunapaj maquipimi churagrini. Paicunapaj huañushca aichacunataca, huairata purij pajarocuna, sacha animalcunami micunga.

²¹ Cai Judá llajtata jatun mandaj Sedequiastapish, pai churashca mandajcunatapish paita p'iñashpa huañuchisha nicujcunapaj maquipimi churasha. Cunan cancunahuan macanacunata saquishpa rij, chai Babilonia llajtata jatun mandajpaj soldadocunapaj maquipimi churasha.

²² Cunan rishca cajpipish, ñucallatajmi cutin cai puebloman tigrachimusha. Paimi cancunahuan macanacushpa mishanga, cai pueblotaca ninahuanmi tucui rupachinga. Chashna rurashpami, cai Judá llajta pueblocunataca shuj runallatapish mana saquishpa, shitashca, chushajta saquisha ninmi Mandaj Diosca” nircami.