JEREMÍAS 28 - Dios Rimashca Shimicunami

Hananías shuti llulla huillajmanta

¹ Jatun mandaj Sedequías, Judá llajtata mandai callarishcaca, chuscu huatallami carca. Chai huatapaj pichca quillapimi, Azurpaj churi Hananías shuti huillajca ñucataca rimarca. Paica Gabaón pueblomantami carca. Paimi ñucataca Mandaj Diospaj huasipi, curacunapaj ñaupajpi tucui chaipi cajcunapaj ñaupajpi cashna nirca:

² –Tucuita Mandaj, israelcunapaj Diosca cashnami nin: Babilonia llajtata jatun mandaj churashca yugotaca p'aquigrinimi.

³ Chai Babilonia llajtata jatun mandaj Nabucodonosor cai ñuca huasimanta llujshichishpa, paipaj llajtaman apashca charinacunataca cunanmanta ishqui huatallapimi caiman tigrachimugrini.

⁴ Shinallataj cai Judá llajtamanta Babilonia llajtaman prezu apashcacunatapishmi tigrachimusha. Joacimpaj churi, cai Judá llajtata jatun mandaj Coniastami, tucui caishuj apashcacunandijta tigrachimusha. Ñucatajmi Babilonia llajtata jatun mandaj churashca yugotaca p'aquisha ninmi Mandaj Diosca– nircami.

⁵ Huillaj Hananías chashna nijpica, Dios ima nishcata huillaj Jeremiasca curacunapaj ñaupajpi, tucui chaipi tandanacushcacunapaj ñaupajpimi Mandaj Diospaj huasipica rimarca.

⁶ Dios ima nishcata huillaj Jeremiasca cashnami nirca: –Chashna cachun, Mandaj Diosca can nishca shina rurashca cachun. Mandaj Diospaj huasimanta apashca charinacunatapish, tucui prezu apashcacunatapish Babilonia llajtamanta utcami caiman tigrachishpa cachangacuna nishpa can huillashcataca, Mandaj Diosca chashnataj rurashpaca allitajchari canmanri.

⁷ Shina cajpipish cunanca cantapish, tucui caipi cajcunatapish ñuca rimashcata uyai.

⁸ Ñaupa huatacunaca, canpish, ñucapish manaraj huacharijpimi, shujtaj huillajcunapish tiyashca. Paicunaca jatun llajtacunapi, achca llajtacunapi jatun macanacuicunapish, llaquicunapish, ungüicunapish tiyanatami huillashcacuna.

⁹ Maijan huillajpish sumaj causai tiyanata huillajpica, pai nishca shinataj pajtajllapimi, Mandaj Diostaj huillachun cachashca cashcaca ricurin– nircami.

¹⁰ Chashna nijpica huillaj Hananiasca, Dios ima nishcata huillaj Jeremiaspaj cunga tullumanta yugota japishpami p'aquirca.

¹¹ Chai q'uipaca Hananiasca, tucui chaipi cajcunapaj ñaupajpimi cashna nirca: –Mandaj Diosca cashnami nin: Babilonia llajtata jatun mandaj Nabucodonosor churashca yugotaca, tucui llajtacunapaj cungamanta anchuchishpami, cai yugota p'aquishca shina p'aquigrini. Cunanmanta ishqui huatallapimi chaita ruragrini ninmi– nijpica, Jeremiasca rircallami.

¹² Dios ima nishcata huillaj Jeremiaspaj cunga tullumanta yugota japishpa Hananías p'aquishca q'uipa unillapimi, Mandaj Diosca Jeremiastaca cashna nirca:

¹³ “Ri, Hananiasta cashna nigri: Mandaj Diosca cashnami nin: Caspi yugotaca p'aquinguitajmari. Ashtahuanpish cunanca fierro yugotami rurachigrini ninmi.

¹⁴ Tucuita Mandaj israelcunapaj Diosca cashnapishmi nin: Babilonia llajtata jatun mandaj Nabucodonosorta servishpa causachunca, tucui llajtacunapaj cunga tullupimi fierro yugota churani. Tucuicunami paita servishpa causangacuna. Sacha animalcunatapishmi, pai munashcata rurachun paipaj maquipi churani ninmi nigri” nircami.

¹⁵ Chashna mandajpimi, Dios ima nishcata huillaj Jeremiasca, huillaj Hananiastaca cashna nirca: –Riqui Hananías, cantaca mana Mandaj Dioschu huillanaman cachashca. Canca cai runacunataca can llullashcallapimari shunguta churachingui.

¹⁶ Chaimanta Mandaj Diostajmi cashna nin: Canca paicunamanca ñucata c'ariyashpa shayarina yuyaitamari cushcangui. Chaimanta cantaca cai pachamanta anchuchigrinimi. Cai huatallatajmi huañungui ninmi– nircami.

¹⁷ Huillaj Hananiasca, chai huatallatajmi chai huatapaj canchis quillapi huañurca.