JEREMÍAS 26 - Dios Rimashca Shimicunami

Jeremiasta huañuchishun nishcamanta

¹ Josiaspaj churi jatun mandaj Joacim, Judá llajtata mandai callari huatami, Mandaj Diosca Jeremiastaca cashna nirca:

² “Mandaj Diostajmi cashna mandani: Ñuca huasimanca tucui Judá llajtapi tiyaj pueblocunamantami adorangapaj shamuncuna. Tucui shamujcunaman ñuca imallata huillachun nishcata, ñuca huasi ñaupajpi shayarishpa huillagri. Imata mana saquishpa tucuitataj huillangui.

³ Can huillashcata cazushpa, tucuicuna paicunapaj millai causaita saquingacunapishchari. Paicuna allichirijpica, millaita rurashcamanta ima shinalla llaquichisha nicushcataca jarcarishami.

⁴ Chaimanta tucui paicunamanca cashna huillagri: Mandaj Diosca cashnami nin: Ñucaca ñami mandashcacunata cancunapaj ñaupajpi churarcani. Chai mandashcacunata cazuchun ñuca rimashcataca uyaichigari.

⁵ Ñaupa huatacunamantapachami ñuca ima nishcata huillaj, ñucata servijcunatapish cancunaman huillachun cacharcani. Paicunata huasha huasha cachashpa huillachijpipish, cancunaca manataj uyarcanguichijchu.

⁶ Chashnallataj catijpica, cai huasitaca ima shinami Silo pueblota rurarcani, chashnallatajmi rurasha. Cai pueblotapish shujtaj llajtacunata mana alli nishpaca, Jerusalén shina tucushca alli canman ninatami rurasha ninmi ningui” nircami.

⁷ Mandaj Diospaj huasipi Jeremías chai tucui shimicunata huillajpica curacunapish, Dios ima nishcata huillajcunapish tucui chaipi cajcunapishmi uyarcacuna.

⁸ Mandaj Dios tucui chaipi cajcunaman imallata huillachun cachashcataca, Jeremías huillajpica, curacunapish, huillajcunapish, tucui chaipi cajcunapishmi paita japircacuna. Chaimantaca tucuicuna huaicashpami, cashna nircacuna: “Huañunami cangui.

⁹ ¿Imamantataj canca: Cai huasica Silo shinami saquiringa, cai pueblopish tucui urmachishcami canga. Shujllapish causangapaj mana saquiringachu nishpa, Mandaj Diospaj shutipi huillanguiyari?” nircacunami. Mandaj Diospaj huasipica, tucuicuna chashna nishpami, Jeremiasta huañuchishun nicurcacuna.

¹⁰ Judá llajtata mandajcuna chaita uyashpaca, jatun mandaj mandashpa tiyana huasimantami, Mandaj Diospaj huasiman huichiyarcacuna. Chaiman huichiyashpaca, chai huasiman yaicuna mushuj pungupimi tiyarircacuna.

¹¹ Chaipi tiyarijpimi curacunahuan, Dios ima nishcata huillajcunahuanca chai mandajcunatapish, chai tucui tandanacushcacunatapish cashna nircacuna: “Cai runaca huañunami can. Paica cai puebloca llaqui tucungami nishpamari huillan. Chaitaca cancunallataj uyarcanguichijmi” nircacunami.

¹² Chashna nijpimi, Jeremiasca tucui mandajcunatapish, tucui chaipi tandanacushcacunatapish cashna nirca: “Mandaj Diosmari cai huasipish, cai pueblopish llaqui tucunataca huillachun cacharca. Pai imallata nishcallatami cancunamanca tucuita huillarcani.

¹³ Chashna cashcamantaca, cancunata Mandaj Dios rimashcata cazuichij. Millai causaita, millaita ruracushcata saquishpa, ña allichirichij. Chashna rurajpica, pai Mandaj Diosca cancunata ima shinalla llaquichisha nicushcata jarcarishpa, mana llaquichingachu.

¹⁴ Ashtahuanpish ñucataca imatapish cancuna yuyashcata ruraichijlla, cancunapaj maquipimi cani. Cancunapi ima ashtahuan alli yuyachijpica, chaita ruraichijlla.

¹⁵ Shina cajpipish, cancunataca caillatami nisha nini: Ñucataca Mandaj Diosmari chai tucui shimicunataca, cancunapaj rinrinpi caparichun cacharca. Imata mana ñuca yuyaimanta llujshichishpa huillashcanichu. Chashna cashcamantaca, ñucata yanga huañuchishpaca, cancunallatajmi llaqui tucunguichij. Cai pueblotapish, cai pueblopi causajcunatapishmi llaquipi churanguichij” nircami.

¹⁶ Chashna nijpimi, mandajcunaca tucui chaipi tandanacushcacunatapish, curacunatapish, Dios ima nishcata huillajcunatapish cashna nircacuna: “Cai runaca ñucanchijta Mandaj Diostaj cachajpimi huillashca. Chashna cashcamantaca, imamanta mana huañuna canchu” nircacunami.

¹⁷ Paicuna chashna nijpica, Judá llajtapi causajcunata cunaj yuyajcunamanta maijancuna jatarishpami, chaipi tucui tandanacushca cajcunataca cashna nircacuna:

¹⁸ “Ezequías shuti jatun mandaj cai Judá llajtata mandacui huatacunapica, Moreset pueblomanta Miqueas shuti huillajmi, tucui cai llajtapi causajcunaman cashna nishpa huillashca: Tucuita Mandaj Diosca cashnami nin: Cai Sión urcuca, tarpuna allpacuna shina yapushcami canga. Cai Jerusalén pueblopish, rumi montonllami saquiringa. Ñuca huasi shayacun lomapipish, sachallami jundanga ninmi nishpami huillashca.

¹⁹ Chashna huillajpipish, Miqueastaca jatun mandaj Ezequiaspish, cai tucui Judá llajtapi causajcunapish mana huañuchishcacunachu. Ashtahuanpish pai jatun mandajca, Mandaj Diosta manchashpami, Mandaj Diospaj ñaupajpi mañashca. Chashna mañajpica, Mandaj Diosca paicunata llaquichishami nicushca cashpapish, jarcarishpa mana llaquichircachu. Chashna cashcamantaca ñucanchijca ¿imamantataj cai runataca yanga huañuchishpa, ñucanchijllataj jatun llaquipi yaicushunri?” nircacunami.

²⁰ Shinallataj Quiriat-jearim pueblomanta caj Urías shuti huillajpishmi, Mandaj Diospaj shutipi huillaj carca. Paica Semaiaspaj churimi carca. Paica cai pueblopish, cai llajtapish llaqui tucunataca Jeremías huillashca shinallatajmi huillarca.

²¹ Jatun mandaj Joacimpish, pai churashca mandajcunapish, tucui caishuj mandajcunapish, pai huillashcata uyashpaca huañuchisha nircami. Uriasca, jatun mandaj paita huañuchisha nicushcata uyashpa manchashpami, Egipto llajtaman miticushpa rirca.

²² Chaimantami jatun mandaj Joacimca, Acbor runapaj churi Elnatanta shujtajcunandij Egipto llajtaman cacharca.

²³ Paicunaca Uriastaca, Egiptomanta llujshichimushpami, jatun mandaj Joacimpaj maquipi churarcacuna. Paica espadahuan huañuchichishpami, huajchacuna huañujpi pambana jutcupi shitachirca.

²⁴ Jeremiastaca, Safanpaj churi Ahicam shuti mandajmi, chaipi tandanacushcacuna ama huañuchichunca, paicunapaj maquipi churachun mana saquirca.