JEREMÍAS 20 - Dios Rimashca Shimicunami

Pasur shuti curataca llaquichishami nishcamanta

¹ Imerpaj churi Pasur shuti curaca, Mandaj Diospaj huasipi cajcunata mandajmi carca. Paipish Jeremías chashna imallata huillashcataca uyarcami.

² Chaita uyashpami Pasurca, Dios ima nishcata huillaj Jeremiastaca anguhuan macachirca. Chashna macachishpaca Benjamín llajta ladoman llujshina janaj lado pungupimi shuj jutcu tablapi chaquicunata canichishpa prezu churarca. Chai pungutami Mandaj Diospaj huasimanpish yaicuna carca.

³ Chaimantaca cayandij punllami Pasurca, Jeremiastaca chai jutcu tablapi chaquicunata canichishcamantaca llujshichirca. Chaimanta llujshichijpimi Jeremiasca, Pasurtaca cashna nirca: “Mandaj Diosca cantaca ña mana Pasur shutipi cayagrinchu. Cunanca Magor-misabib nigrinmi.

⁴ Pai Mandaj Diostajmi cashna nin: Cantaca canllatajpish, canhuan alli apanacujcunapish mancharinatami ruragrini. Canhuan apanacujcunatapish, cambaj ñahui ricucuitami p'iñajcunaca espadahuan huañuchingacuna. Tucui Judá runacunatapish, Babilonia llajtata jatun mandajpaj maquipimi churagrini. Paimi Babilonia llajtaman prezu apashpa espadahuan huañuchinga.

⁵ Shinallataj cai pueblopi causajcuna tucui imalla charishcatapish, ima sumaj charinacunata rurashca tiyacujcunatapish, Judá llajtata jatun mandajcuna charishcacunatapishmi paicunata p'iñajcunaman cusha. Paicunami quichushpa Babilonia llajtaman apangacuna.

⁶ Can Pasurpish, tucui cambaj huasipi cajcunandijmi, Babilonia llajtaman prezu ringui. Chaipimi canpish, can llullashpa huillashcata uyaj canhuan alli apanacujcunapish huañushpa pambashca canguichij ninmi” nircami.

Dioshuan Jeremías llaquirishcamanta

⁷ Mandaj Dioslla, ñucataca inquitashcanguimari. Ñucaca can inquitashcamari causani. Ñucata yalli sinchi cashpamari mishahuashcangui. Punllantamari ñucataca tucuicuna chanzata rurashpa asincuna.

⁸ Punllantamari can Mandaj Dios huillachun nishca shina, jatun llaquipish, huañuipish shamunallata huillani. Chaimantamari ñucataca c'amishpa, asishpa pingachincuna.

⁹ Ñucaca: “Mandaj Diostaca mana ashtahuan yuyarishpa, paimanta ña ama ashtahuan huillasha” yuyarcanipishmi. Shina cajpipish cambaj shimica ñuca shungupica, tullucama nina rupachij shinami tucurca. Ñuca shungullapi charisha yuyashpapish manataj upajlla saquiri tucurcanichu.

¹⁰ Maipipish ñucamantaca achcacunami huashalla parlanacuncuna. “Maipipish manchachishpamari puricun, jacuchij mandajcunaman huillashunchij” ninacushpami, ñucahuan apanacujcunallataj imapi pandarijta chapancuna. “Ima shina umajta saquingapishchari. Chaipitajca japishcahuan huañuchishpa, ñucanchijmi mishashun” ninacuncunami.

¹¹ Shina cajpipish Mandaj Dioslla, canmari alli macanacuj jatun soldado shina ñucataca cuidacungui. Ñucata p'iñajcunaca mana mishai tucushpa urmangacunami. Huiñaita mana cungaripajtamari pingai tucushpa saquiringacuna.

¹² Tucuita Mandaj Dioslla, canca cashcata rurajcunataca ricuracunguimi. Shungucunata, yuyaicunataca callarishpami ricucungui. Chaimantami ñucata mitsachunca canman mingarini. Ñucata mitsashpa paicunataca ñuca ricucujpi llaquichiyari.

¹³ Mandaj Diosta cantaichigari, Mandaj Diosta alabaichigari. Paimari ñuca huajchataca, millai runacunapaj maquimanta quishpichihuarca.

¹⁴ Ñuca huacharishca punllataca, mana alli ninimi. Ñuca mama ñucata huachashca punllataca, ama pi yuyarishpa alli nishca cachun.

¹⁵ “Cambaj huahuaca c'arimari huacharin” nishpa ñuca yayata cushichij runaca, llaqui tucushca cachun.

¹⁶ Chai runaca Mandaj Dios, Judá llajta pueblocunata mana llaquishpa huiñaipaj llaquichishca shina llaqui tucushca cachun. Tutamantapish jatun llaquihuan caparirishca uyarichun. Chaupi punllapish jatun macanacuipi caparirishca uyarichun.

¹⁷ Ñuca mamapaj huijsallapitaj huañuchishca cajpichari, paipaj huijsapi pambashca saquiriman carcani. Ñucataca paipaj huijsapi chichu puricunmanllami carca.

¹⁸ Paipaj huijsamantaca ¿imapajtaj llujshircaniyari? C'amishpa, pingachishca, llaquinayajta causangapajllamari huacharishcani.