JEREMÍAS 15 - Dios Rimashca Shimicunami

Mandaj Diosca llaquichinataj cashcata huillashcamanta

¹ Mandaj Diosca ñucataca cashnami nirca: “Moiseshuan, Samuelhuan cunantaj ñuca ñaupajpi paicunamanta shayarijpipish, cai runacunahuanca manataj alli tucushachu. Ñuca ñaupajmanta anchuchun, llujshishpa richij nigri.

² ¿Maimantaj rishunri? nijpica, cashna ningui: Mandaj Diosca cashnami nin: Ungüihuan huañuna tiyacujcunaca, ungüihuan huañugrichijlla. Espadapi huañuna tiyacujcunaca, espadapi huañugrichijlla. Yaricaihuan huañuna tiyacujcunaca, yaricaihuan huañugrichijlla. Prezu apana tiyacujcunaca, prezu richijlla ninmi ningui” nircami.

³ Mandaj Diosca cashnapishmi nin: “Paicunapajca chuscu jatun llaquicunatami cachagrini. Puntaca espadahuanmi huañuchisha. Chai q'uipaca tucui c'utsashpa micuchun allcucunatami cachasha. Shinallataj tucui micushpa tucuchichunca, huairata purij pajarocunatapish, sacha animalcunatapishmi cachasha.

⁴ Ezequiaspaj churi Manasesca, Judá llajtata jatun mandaj cashpami, Jerusalenpica jatun millaita rurashpa causarca. Chaimantami tucui Judá runacunataca, tucui shujtaj llajtacunapi causajcuna mancharina jatun llaquipi churagrini.

⁵ Jerusalenpi causajcunalla, ¿pitaj cancunataca llaquingari? Cancuna llaqui tucujpipish ¿pitaj nanaringari? ¿Pitaj allillachu canguichij ninallamanpish shamungari?” ninmi.

⁶ Shinallataj Mandaj Diosca cashnami nin: “Cancunamari ñucata shitashpa, huashata ricuchircanguichij. Chaimantami cunanca ñuca maquihuan huajtashpa tucuchigrini. Ña manataj llaquishpa ashtahuan charicushalla ninichu.

⁷ Ñuca agllashcacunaca llajtamanta llujshijta huairachishpa caita chaita cachajpipish, huahuacuna illajta saquijpipish, millaita ruranataca manataj saquincunachu.

⁸ Mama cucha uripi tiyaj t'iyu allpatapish yalli achca huarmicunami cusa illajlla saquirircacuna. Huañuchijcunata apamushpami mamacunatapish, huahuacunatapish huañuchircani. Chaupi punllapimi, ñapish jatun llaquicunahuan manchachircani.

⁹ Canchis churicunayuj huarmipish pingai tucushpa shungu p'aquirircani. Inti jahuaman cajpirajmi, paipajca ña tutayashca shina carca. Imata mana rurai tucushpa musparircani. Paipaj churicunamanta saquirishcacunatapish paicunata p'iñajcuna espadahuan huañuchichunmi, paicunapaj maquipi churasha” ninmi Mandaj Diosca.

Jeremías llaquirishpa caparirishcamanta

¹⁰ ¡Aij, ñucalla! Ñuca mamitalla, ¿imataj tucushari? Ñucataca tucuicunahuan p'iñanacuchun, rimanacuchunllamari huachashcangui. Ñucaca mana piman ima cullquita mañachishcanichu, mana piman mañashcanipishchu. Shina cajpipish ñucataca tucuicunamari ima llaquipish tucushca alli canman nincuna.

¹¹ Mandaj Dioslla, ñucata p'iñajcunata llaqui japijpi llaquilla puricujpica, cantamari paicunata ayudachun mañarcani. Paicunamanta mana chashna mañashca cajpica, paicuna ñucata llaqui tucuchun nishca shina pajtachunlla.

¹² Janaj llajtapi tiyaj fierrotapish, broncetapish ¿pitaj p'aqui tucungari?

¹³ Cancunapaj juchacunamantaca cancunapaj tucui llajtapi imalla tiyajtami shuhuacuna japishcahuan apachun paicunaman cusha. Ima sumaj charinacunatapish imata mana pagashpa apangacunallami.

¹⁴ Cancunatapish mana rijsishca llajtapimi p'iñajcunata servishpa causachun cachagrini. Cancunahuanca nina lunyacuj shina p'iñarishcami cani. Nina japirishpami cancunataca tucuchinga ninmi.

Jeremías mañajpi Mandaj Dios cutichishcamanta

¹⁵ Mandaj Dioslla, ñucaca canta c'uyashcamanta, c'amishca causacujtaca canllataj yachanguimi, yuyarishpa ricuj shamuyari. Ñucata p'iñajcunataca llaquichiyari. Ama ashtahuan ashtahuan p'iñashpa shitahuaichu.

¹⁶ Tucuita Mandaj Dioslla, ñucaca canhuanmi casha nihuarcanguimari. Chaimantamari cambaj shimicunata ñucaman cujpica, cushicushpa ñuca shungupi chasquij carcani. Cambaj shimi uyarijpica, japishcahuanmari micuj carcani.

¹⁷ Canta chanzata rurajcunahuan tandanacushpa mana tiyarij carcanichu. Can ima nishcata huillaj cashcamantapish, mana jatun tucushcanichu. Can p'iñarishcata ñuca shungupi jundachijpimi, ñucalla purini.

¹⁸ ¿Imamantataj ñuca nanaica manataj anchurinchu imatagari? ¿Imamantataj ñuca chugrica ima jambihuan mana alliyashpa nanacunllachu imatagari? ¿Ñucapajca ima ricurishcahuan chingarijlla shina, llujshicushcahuan chaquirijlla yacu shinachu cagringui imatagari?

¹⁹ Mandaj Diosca cashnami nirca: “Can ñucaman cutirijpica, ñucapish canta chasquishami. Cutin ñucata servingapaj ñuca ñaupajpi cai tucunguimi. Ima yangacunata rimanata saquishpa, alli shimicunallata rimashpaca, cutintaj ñuca ima nishcata huillanguillami. Canca ama paicunaman tigrarichu. Ashtahuanpish paicuna cambajman cutirichun saquiyari.

²⁰ Chashna rurajpica cai runacunapaj ñaupajpica, jatun bronce patata shinami churasha. Canhuan ch'imbapurangapaj shayarishpapish, manataj mishangacunachu. Canta cuidangapaj, mitsangapajca ñucatajmi canhuan casha. Ñuca, Mandaj Diostajmi chashna nini.

²¹ C'ari c'ari millai runacunapaj maquimantapish quishpichishpa huaquichishallami” nircami.