JEREMÍAS 11 - Dios Rimashca Shimicunami

Dioshuan ari ninacushcata israelcuna p'aquishcamanta

¹ Mandaj Diosca Jeremiastaca cashnami nirca:

² “Dioshuan ari ninacushca shimicunata uyaichij. Cai shimicunataca tucui Judá llajtapi causajcunamanpish, Jerusalenpi causajcunamanpish huillaichij.

³ Can Jeremiasca cashna ni: Israelcunata Mandaj Diosca cashnami nin: Ñucahuan ari ninacushca cai shimicunata mana cazujcunaca, llaqui tucushca cachun.

⁴ Cancunapaj ñaupa yayacunata Egipto llajtamanta llujshichimushpami, cai shimicunataca curcani. Fierrota yacuyachina hornomanta shina llujshichimushpami, paicunataca cashna mandarcani: Ñuca rimashcata uyanguichij. Imatapish ñuca mandashca shinataj rurashpa causanguichij. Chashna causashpaca ñuca agllashca runacunami canguichij. Ñucapish cancunapaj Diosmi casha.

⁵ Cancuna ñucata cazujpica, cancunapaj ñaupa yayacunaman lechepish, mishquipish yacu shina tiyaj sumaj llajtatami cusha nishcataca cancunallamantaj saquishallami nircanimi. Chai llajtapimi cunanca causacunguichij ninmi ni” nircami. Chashna nijpica: “Mandaj Dioslla, can nishca shina cachun” nircanimi.

⁶ Chashna nijpica, Mandaj Diosca cashnami nirca: “Cai shimicunataca Judá llajtapi tucui causajcunamanpish, Jerusalenpi causajcunamanpish callecunapi cashna huillagri: Dioshuan ari ninacushca cai shimicunata uyashpa, chai shina causaichij.

⁷ Cancunapaj ñaupa yayacunata Egipto llajtamanta llujshichimui punllamantapachami, ñuca mandashcata uyaichij nishpa rimarcani, cunarcani. Cancunatapish cai tucui huatacunata mana upalla saquishcanichu. Ashtahuanpish chai shinallatajmi cunani.

⁸ Shina cajpipish manataj uyanguichijchu, manataj yuyaita churanguichijchu. Ashtahuanpish tucuicunami cancunapaj millai, ch'ahuan shungu yuyachishcata ruranguichij. Chaimantami cunanca ñucahuan ari ninacushca shimicunapurapi quillcashca tiyacuj tucui llaquicunata cancunapaj jahuapi cachagrini. Cai shimicunataca pajtachichun nishpa cushca jahua mana pajtachishcamantami, chashna ruragrini ninmi ni” nircami.

⁹ Mandaj Diosca ñucamanca cashnapishmi nirca: “Judá llajtapi, Jerusalén pueblopi causajcunaca ñucatamari c'ariyangapaj jatarincuna.

¹⁰ Tucuicunamari ñuca rimashcata mana cazushun nishpa, shujtaj dioscunata mashcashpa chaicunata cungurij paicunapaj ñaupa yayacuna rurashca juchallatataj rurancuna. Chashna rurashpamari israelcunapish, Judá runacunapish paicunapaj ñaupa yayacunahuan ñuca ari ninacushcata p'aquishcacuna” ninmi.

¹¹ Chaimantami pai Mandaj Diostaj cashnapish nin: “Cunanca paicunapajca mana llujshi tucuipaj jatun llaquitami apamugrini. Chai llaquita apacushpa ñucata mañajpipish, manataj uyashachu.

¹² Chaipica tucui Judá llajta pueblocunamantapish, Jerusalenmantapish paicuna inciensota cushpa rupachij cashca dioscunatami caparishpa mañagringacuna. Chai dioscunaca paicuna llaquipi cajpica, mana llujshichi tucungachu.

¹³ Judá runacunaca tucui pueblocunapimari diosta charincuna. Jerusalenpi causajcunapish tucui callecunapimari dioscunata charincuna. Baalcunaman inciensota cushpa rupachingapajmi, tucuipi chai millanana altarcunata shayachircacuna.

¹⁴ Chashna cashcamantaca, canca ama paicunamanta ñucata mañanguichu, ama ñucata caparinguichu. Ñucaca llaquipi cashpa, paicunataj mañajpipish mana uyashachu.

¹⁵ Ñuca c'uyashca huarmilla, cai tucui millaitami rurashpa causangui. Chashna rurashca jahuaca, ñuca huasipica imata mana mañanaman shamunachu cangui. ¿Canca animalcunata huañuchishpa, aichacunata ñucaman cushcachu llaquimanta canta quishpichinata yuyangui? ¿Chaita cushpaca cushicushpa saquirishallami yuyanguichu?” ninmi.

¹⁶ Mandaj Dios ñucaca sarun huatacunaca cantaca: “Sumaj granocunata aparishca, p'angasapa jatun olivo yura nijmi carcani. Ashtahuanpish cunanca sinchita culun nishcahuan ninata japichishpami tucui p'angacunata rupachishpa, tucui ramacunata p'aquigrini.

¹⁷ Canta tarpuj, tucuita Mandaj Diostajmari cantaca llaquichishami nini. Israelcunapish, can Judá runacunapish Baalman inciensota cushpa rupachishpa, millaita rurashpa ñucata p'iñachishcamantami chashna ruragrini” nircami.

Dios rimashcata huillajpi Jeremiasta huañuchishun nishcamanta

¹⁸ Ñucata huañuchingapaj yuyarinacushcataca, Mandaj Diosmari ricuchihuarca. Chaipimari yacharcani. Canmari paicuna imata rurasha nicushcataca ricuchihuarcangui.

¹⁹ Ñucataca: “Cai runataca alli granota aparishca yurata urmachij shina huañuchishunchij. Cai pachapi causajcunapuramanta anchuchishunchij. Chashna rurajpica, paitaca pi mana ashtahuan yuyaringachu” ninacushcami carca. Ashtahuanpish ñucaca huañuchinaman apacushca malta c'ari oveja shina, imata mana yachashcachu carcani.

²⁰ Tucuita Mandaj Dioslla, ashtahuanpish canca tucui runacunapaj shungu yuyaita callarishpa ricujmi cangui. Tucui imamantapish cashcata ricushpa mitsajmi cangui. Cunanca ñucata cashna llaquichishun nicushcataca, cambaj maquipimi mingarini. Ñucamanta paicunata can llaquichishcatamari ricusha nini.

²¹ Anatot pueblopi causajcunaca ñucataca: “Mandaj Dios huillanaman cachashcataca ña ama huillaichu. Mana cashpaca canta huañuchishunmi” nircacunami. Chashna nij runacunatami Mandaj Diosca rimarca.

²² Tucuita Mandaj Diosca cashnami nirca: “Ñucami paicunataca llaquichigrini. Chairaj runacunaca espadapimi huañungacuna. Huambraraj churicunahuan, ushushicunahuanca yaricaihuanmi huañungacuna.

²³ Paicunapuramantaca shujllapish mana causaj saquiringachu. Ñucatajmi chai Anatot pueblopi causajcunapajca, jatun llaqui huatata apamugrini” nircami.