ISAÍAS 64 - Dios Rimashca Shimicunami

¹ ¡Jahua pachata lliquishpa uriyamushpachari alli canguiman. Quiquinpaj ñaupajpica, urcucunapish chujchunmanmi.

² Fierrota yacuyachij lunyacuj nina shamushca shina, yacuta t'imbuchij nina shamushca shina shamushpachari, canta p'iñajcunamanca jatun cashcata ricuchinguiman! Llajtacunaca quiquinpaj ñaupajpimi chujchunmancuna.

³ Ñucanchij manapish shuyacushca jatun mancharinacunata rurangapajmi uriyamurcangui. Chaipica urcucunapish quiquinpaj ñaupajpica yacuyarcami.

⁴ Shujtaj dioscunaca paicunapi shunguta churajcunapajca Mandaj Dios paipi shunguta churajcunapaj rurashca shina rurajtaca, ñaupa punllacunamantapacha pi mana paicunapaj rinrinhuan uyashcachu, ñahuihuanpish mana ricushcachu.

⁵ Quiquinca cushicuihuan cashcata rurana yuyailla rurajcunata tupanamanmi llujshircangui. Quiquinpaj mandashcapi nishca shina quiquinta yuyarijcunata tupanamanmi llujshircangui. Ashtahuanpish ñucanchijllataj juchallishcamantami quiquinca p'iñarircangui. Ñucanchijllatajmari yallitaj achca punllacunata juchallina yuyailla purishcanchij. Chashnaca ¿quishpiri tucushunchu imatagari?

⁶ Ashtahuanpish ñucanchijca tucuicunamari mapacuna shina tucushcanchij. Ñucanchij cashcata ruranchij nishcacunapish mapa llachapa shinami tucushca. Tucui ñucanchijca p'angacuna shinami urmarcanchij. Ñucanchij millaita rurashcacunallatajmari huaira shina apashca.

⁷ ¡Quiquinta mañajcunaca pi mana tiyanchu. Quiquinpi shunguta churashpa quiquinllata yuyarijcunaca pi mana tiyanchu! Chaimantami quiquinpaj ñahuita ñucanchijmanta anchuchircangui. Ñucanchij juchacunallataj ñacachichunmi saquishcangui.

⁸ Mandaj Dioslla, quiquinmari ñucanchij yaya cangui. Ñucanchijca lodollami canchij, quiquinca allpamanta imatapish rurajmi cangui. Ñucanchijca tucuicuna quiquinpaj maquihuan rurashcami canchij.

⁹ Mandaj Dioslla, ama yallitaj p'iñarihuaichu. Ñucanchij mana allita rurashcatapish huiñaicamaca ama chai yuyailla cahuaichu. ¡Riqui, tucui ñucanchijca quiquin agllashcacunami canchij, ñucanchijta ricuhuayari!

¹⁰ Quiquinpajlla ch'icanchishca pueblocunaca shitashcamari. Sionca shitashca pambamari tucushca. Jerusalenca tucui chingachishcamari tucushca.

¹¹ Quiquinpajlla ch'icanchishca huasipimari ñucanchij ñaupa yayacunaca quiquinta alabajcuna carca. Chaica cunanca ninahuan tucuchishcamari cashca. ¡Ñucanchij charina sumajcunapish tucuimari chingachishca cashca!

¹² Mandaj Dioslla ¿cai tucuita ricushpapish casijlla saquinguillachu imatagari? ¿Chashna upalla llaquichishpa caticunguillachu?