ISAÍAS 61 - Dios Rimashca Shimicunami

Siónpi causajcunata quishpichinami

¹ Mandaj Jatun Diospaj Espiritumari ñuca jahuapi. Mandaj Diosmari ñucataca aceitehuan churarca. Ñucatamari alli huillaita huajchacunaman huillachun cacharca. Shungu p'aquicunata alliyachichun, prezu apashcacunaman ña llujshina tiyashcata huillachunmi cacharca. Prezucunata cacharichichunmi cacharca.

² Mandaj Dios quishpichinata munashca huata chayamushcata huillachun, mana cazujcunata ñucanchij Taita Dios llaquichina cashcata huillachun, tucui llaquilla causacujcunata cushichichunpishmi cacharca.

³ Llaquijlla caj Sionmanca ushpahuan shitarishca canapaj randica achijyachijta cuchun. Llaquijlla canapaj randica, cushijlla cana aceiteta cuchun. Llaquijlla shungu canapaj randica, cushijlla cashcata ricuchij churanata churachichunmi cacharca. Paicunaca: “Cashcata ruraj yuracuna nishcami cangacuna. Mandaj Dios pai jatun cashcata ricuchingapaj tarpushca yuracuna” nishcami cangacuna.

⁴ Ñaupa punllapi urmashca Jerusalentaca cutinmi shayachingacuna. Uni huatacunata shitashca cashcataca cutinmi jatarichingacuna. Urmachishca pueblocunataca cutinmi allichingacuna. Huahua huahuacunamantapacha rumi montonlla cashcacunatapish cutinmi allichingacuna.

⁵ Manapish Israel cajcunami cancunapaj ovejacunataca michingacuna. Mana rijsishcacunapaj churicunami cancunapaj chagracunapica trabajangacuna. Cancunapaj uva chagracunapipish paicunami trabajangacuna.

⁶ Cancunaca Mandaj Diospaj curacuna nishcami canguichij. Ñucanchij Taita Diospajta rurajcuna nishcami canguichij. Shujtaj llajtacuna imalla charishcacunatami micunguichij. Paicuna sumaj cashcahuanmi jatunyachishca canguichij.

⁷ Yallitaj pingachishca, yallitaj yanganchishca canapaj randica, quiquin llajtacunallapitajmi cancunataca allimi canguichij ningacuna. Jatun llaquita apashcamantaca, quiquin allpapica yallitaj charijcunami canguichij. Huiñaipaj cushicuitami charinguichij.

⁸ Mandaj Dios ñucaca, cashcata ruraj canata c'uyajmi cani. Ñucaman cushpa tucui rupachingapaj shuhuashpa apamujcunataca p'iñanimi. Ñuca nishca shina rurajcunamanca paicuna nishca shinallatajmi cusha. Paicunahuanca huiñaipajmi ari nisha.

⁹ Paicunapaj huahua huahuacunaca, shujtaj llajtacuna rijsishcami canga. Cutin pai mushujyachishcacunaca shujtaj gentecuna rijsishcami canga. Tucui paicunata ricujcunami Mandaj Diospaj huahua huahuacunami, pai alli nishcacunami ningacuna.

¹⁰ Mandaj Diospimi ñucaca yallitaj cushicusha. Ñuca Taita Diospimi ñuca almaca cushicunga. Paimi ñucamanca churanata shinaca quishpirinata churachirca. Cashcata ruranahuanmi pilluchirca. Noviota shinami sumajta allichirca. Noviata shinami achca valijcunahuan sumajta allichirca.

¹¹ Ima shinami allpaca muyuta tarpujpica mushujta huiñachin, huertapi tarpujpipish ima shinami huiñachin, chai shinallatajmi Mandaj Jatun Diosca paicunataca tucui llajtacuna ricucunpi cashcata rurajcunata, paita alabajcunata ruranga.