ISAÍAS 58 - Dios Rimashca Shimicunami

Dios mandashca shina ayunanami

¹ ¡Jacobpaj huahua huahuacuna juchallishcamanta, ñuca agllashcacuna ñucata c'ariyashcamantaca ama pararishpa cunga pajtashcata capariyari! ¡Trompetapi tocaj shina sinchita caparishpa huillayari!

² Cashcata rurajcuna shina, Taita Dios mandashcata pajtachicujcuna shinami paicunaca punllanta ñucata mashcancuna. Ñuca ñancunatami yachashun nincuna. Paicunaca cashcata rurajcuna shinami ñucataca paicunapaj allita rurachun mañancuna. Taita Diosman c'uchuyanatami munancuna.

³ Cancunaca: Ayunajpipish mana uyajpica ¿imapajtaj ayunashunri? Ñucanchij llaquilla tucujpipish mana ricujpica ¿imapajtaj llaquilla tucushunri? ninguichijmi. Riquichij, cancuna ayunacui punllapica cancunapaj allitarajmi mashcanguichij. Cancunapaj trabajajcunatapish llaquichishpami charinguichij.

⁴ Riquichij, p'iñanacushpa, ch'imbapura rimanacungapajllami ayunanguichij. Huajtanacushpa chugrichinacungapajllami ayunanguichij. Cancuna mañashcata jahua pachapi uyachunca, cunancama ayunacushca shinaca ama ayunaichijchu.

⁵ Cancunaca junco shina umata cumurichishpa llaquilla tucushpami ayunashpa cainanguichij. Cañamazuhuan mantashpa ushpata shitarishpami ayunanguichij. ¿Chashna ayunachunchari ñucaca mandarcani? ¿Chashna rurashpachu ayuno cashcata yuyanguichij? ¿Mandaj Dios munashcata rurashpa cainacushcatachu yuyanguichij?

⁶ Ñucaca ashtahuanpish cashna ayunachunmi mandarcani. Diosta mana rijsij canapi huatashca canamanta cachariringapaj. Llaquichicushcata cacharingapaj. Llaquichicushcacuna richun cacharishpa saquingapaj. Yugoshcacunata yugota p'aquingapaj.

⁷ Yaricaihuan cajman cambaj micunata caraj cangapaj. Huasita mana charij puricujcunaman pozachij cangapaj. Lluchulla cajta ricushpa churachij cangapaj. Cambaj huauqui ima llaquihuan cajta ricushca jahua, ñahuita ama shujman churaj cangapaj ayunachunmi mandarcani. Chaitaca ¿manachu yuyaringui?

⁸ Chashna rurajpica cambaj shungu pacarijpi inti llujshishpa achijyachij shinami achijyanga. Can quishpirinaca utcami chayamunga. Can cashcata ruranaca canta ñaupashcami ringa. Mandaj Diospaj achij nicuj sumajmi huashataca canta cuidanga.

⁹ Chaipica Mandaj Diosta mañanguimi, paica can mañashcata uyangami. Can caparishpa mañajpica paica: Caipimi cani ningami. Yugoshca shina llaquichicushcata saquijpi, dedohuan manchachinata saquijpi, yangata rimanata saquishpa,

¹⁰ yaricaihuan cajcunaman cambaj micunata carajpi, llaquilla cajcunaman paicunapaj ima illashcata cujpica, can amsa cashcaca achijmi tucunga. Can amsa cashcaca chaupi punlla shinami canga.

¹¹ Mandaj Diosmi cantaca huiñaita michinga. Chaquishca pambacunapipish cambaj alma cushicujtami caranga. Cambaj tullucunatapish sinchiyachingami. Canca larca yacucunayuj huerta shinami cangui. Mana tucurij yacucuna shina pajchacuj yacu shinami cangui.

¹² Ñaupa punllapi urmachishca Jerusalentaca, cambaj cajcunami cutin shayachingacuna. Huahua huahuacuna ñaupaman callari rumita churashcataca huahua huahuacuna q'uipa chai callari rumi jahuapica canmi ashtahuan alli callari rumita churangui. Canca: Muyundij pirca jutcurishcacunata allichij, urmashca huasicunata cutin shayachij nishcami cangui.

Samana punllaca imapaj cashcami

¹³ Samana punllapi imata rurangapaj cambaj chaquihuanca ama puringuichu. Ñucapajlla ch'icanchishca punllapica cambaj munaitaca ama ruranguichu. Chai punllataca: “Mandaj Dios ñucapajlla ch'icanchishca jatun punlla nishpa, pai cushicuna punllami” nishpa shutichingui. Chashna nishpaca cambaj quiquin munaita mana purishpa, cambaj quiquin ñanta mana purishpa, cambaj munaillata mana mashcashpa, cambaj quiquin yuyaillamanta mana rimashpa huaquichishpaca,

¹⁴ Mandaj Diospimi cushicungui. Ñucami cantaca cai pachapi caj urcucuna jahuaman huichiyachisha. Cambaj yaya Jacobman cushca allpacunamantami canmanca carasha ninmi. Mandaj Diosmi paipaj shimihuantaj chashna nishca.