ISAÍAS 55 - Dios Rimashca Shimicunami

Mandaj Diosca imata mana cujpipish llaquij cashcami

¹ ¡Yacunaihuan cajcuna tucuicuna shamuichij. Yacuman shamuichij! Cullquita mana charishpapish shamuichijlla. Cullqui illajlla randishpa micuichijlla. Shamuichijlla, cullqui illajlla imata mana cushpa vinota, lecheta randichijlla.

² ¿Ima nishpataj manapish micuna cajta randishpa cullquitaca tucuchinguichij? Cancuna trabajashcamanta japishcatapish yangapimari tucuchinguichij. Alli uyaichigari: Alli micunata micuichigari. Sumaj micunata micushpamari cancunapaj almaca cushijlla canga.

³ Ñucapajman shamuichij. Cancunapaj rinrinta ñuca ladoman churashpa uyaichij. Uyaichij, cancunapaj almaca causangami. Pi mana cuyuchipaj c'uyaihuan Davidman ari nishcallapitajmi, cancunahuanpish huiñaipaj ari ninacusha.

⁴ Riqui, ñucami paitaca gentecunaman ñucamanta huillaj cachun churarcani. Llajtacunata mandaj cachun, yachachij cachunpishmi churarcani.

⁵ Riqui, can mana rijsishca gentecunatami cayangui. Canta mana rijsijcunami cambajman callpamungacuna. Mandaj cambaj Taita Diosmanta, israelcunapaj jucha illaj Diosmanta, canta alli nishcapi churaj Taita Diosmantami chashna shamungacuna.

⁶ ¡Mandaj Diostaca, japi tucuna cajpiraj mashcaichigari. Cancunapaj c'uchullapi cajpiraj cayaichigari!

⁷ Diosta mana rijsij cambaj ñanta saquishpa, Mandaj Diosman cutiri. Millai runa millai yuyaita saquishpa, Mandaj Diosman cutiri. Paimi paitaca llaquinga. Ñucanchij Diospaj perdonca yallitaj jatunmi.

⁸ Ñuca yuyaica mana cancunapaj yuyai shinachu. Ñuca ñancunapish mana cancunapaj ñan shinachu ninmi Mandaj Diosca.

⁹ Ima shinami jahua pachaca cai pachamanta jahuaman, chai shinallatajmi ñuca ñancunaca cancunapaj ñancunamantaca ashtahuan jahuaman. Ñuca yuyaipish cancunapaj yuyaimanta maihuan yallimi.

¹⁰ Tamyapish, rasupish jahua pachamanta urmashpaca, mana chaillamantaj cutin tigranchu. Ashtahuanpish allpata nuyuchishpa granocunata p'ucuchishpami, tarpuj runaman muyuta cun. Micujmanpish tandatami cun.

¹¹ Ñuca shimimanta llujshij shimicunapish chai shinallataj ñucapajmanca, mana chushajlla tigrangachu. Ñuca munashcata rurashpatajmi tigranga. Ñuca imallaman cachashcataca rurashpa catingatajmi.

¹² Cushicushpami llujshiringuichij, sumajllatami tigranguichij. Urcucunapish, lomacunapish cancunapaj ñaupajpimi cushicuihuan cantangacuna. Chagracunapi tiyaj tucui yuracunapish cushicushpami maquipi huajtangacuna.

¹³ Zarza cashapaj randica, cipresmi huiñanga. Chinipaj randica, arrayanmi huiñanga. Chaicunami Mandaj Diospaj shutica jatun cashcata ricuchinga. Chaicunaca huiñai huiñaipaj mana chingarij cashcata ricuchijmi canga ninmi.