ISAÍAS 53 - Dios Rimashca Shimicunami

¹ ¿Ñucanchij huillashcataca pitaj crishcari? Mandaj Dios paipaj maquihuan imallata rurana cashcataca ¿pimantaj ricuchishcari?

² Chaquishca allpapi yura sapimanta retoñaj shinami paipaj ñaupajpica huiñanga. Paica alli ñahui mana cangachu. Paica sumaj ricunanqui ñahuica mana canchu. Ñucanchij catingapaj munana ñahuillatapish mana charircachu.

³ Runacunapurapica yanganchishca, mana nishpa shitashcami carca. Paica llaquita ima shina apanata yachajmi carca. Tucuicunami mana ricunachircanchij. Tucuicunami mana munarcanchij. Tucuicunami mana c'uyarcanchij.

⁴ Ashtahuanpish paica ñucanchij ungüicunatami aparirca. Ñucanchij nanaicunatami llaquita aparca. Ashtahuanpish ñucanchijca paitaca, Dios chugrichishpa, llaquichishpa azoticushcatami yuyarcanchij.

⁵ Ashtahuanpish paica ñucanchij c'ariyashcacunamantami chugrichishca carca. Ñucanchij juchacunamantami paica molirishca carca. Ñucanchij sumaj causaita charichunmi, llaquita apanaca paipaj jahuapi urmarca. Paipaj chugrihuanmi ñucanchijca jambishca carcanchij.

⁶ Tucui ñucanchijca caita chaita rishca ovejacuna shinamari ch'icanyashcanchij. Cada quiquinmi quiquin ñanta rishcanchij. Ashtahuanpish Mandaj Diosca, tucui ñucanchij juchacunataca paimanmari apachirca.

⁷ Paica llaquichishca, llaquihuan cashpapish mana shimi llujshircachu. Malta ovejata shinami huañuchinaman apashca carca. Rutujcunapaj ñaupajpi oveja mana shimi llujshishpa upalla caj shina upalla carcallami.

⁸ Prezu apashpa yanga juchachishpami huañuchircacuna. Pai huiñaicunapish pi mana mitsarcachu. Cai pachapi causajcunapuramanta anchuchircami. Ñuca agllashcacuna mana cazushcamantami chugrichishpa huañuchirca.

⁹ Paica Diosta mana rijsijcunahuanmi pambanalla tucurca. Ashtahuanpish achcata charijcunahuanmi pambarca. Paica ima millaita mana ruraj cajpipish, paipaj shimihuanca mana umaj cajpipish,

¹⁰ Mandaj Diosmari ñucanchijmanta paillataj curishpa llaquita apachun munarca. Ñucanchij juchamanta paipaj causaita cushcamantaca paita catijcuna tiyajta ricungami, huiñai huiñaita causangapishmi. Mandaj Diosca pai imalla rurasha nishcataca paipaj maquipi churashpami ruranga.

¹¹ Paipaj alma llaquita apashcamanta p'ucushca granota ricushpaca cushicushpami saquiringa. Paicuna mana allita rurashcataca pai aparishpami, cashcata ruraj ñucapajta rurajca pai yachaj cashcahuan achcacunata justificanga.

¹² Chaimanta ñucaca paimanca jatuncunapurapi canatami cusha. Mishashpa quichushcatapish c'ari c'aricunahuanmi chaupinacunga. Paica huañuchichun paillataj japi tucushpamari, millaita rurajcunahuan huañuchishca carca. Juchayujcunapaj randi huañushpamari, achcacunapaj juchata aparca. Millaita rurajcunamantapish mañarcami.