ISAÍAS 48 - Dios Rimashca Shimicunami

Israelcuna mana pajtachishcamanta Taita Dios sinchita rimashcami

¹ Jacobpaj huahuacuna, caita uyaichij. Cancunaca Israel shutitami apanguichij. Judapaj huahua huahuacuna, caita uyaichij. Mandaj Diospaj shutipi imatapish pajtachishami nijcuna caita uyaichij. Cancunaca israelcunapaj Diosta yuyarijcunami canguichij. Paita yuyarina shinatajca mana ruranguichijchu. Cashcatatajca mana ruranguichijchu.

² Cancunaca jucha illaj llajtapajmi nishcami canguichij. Cancunaca Israelcunapaj Taita Diospimi shunguta churanguichij. Paipaj shutica tucuita Mandaj Diosmi.

³ Ña imalla tucushcacunataca, ñaupamanmi huillarcani. Ñuca shimiman llujshishcacunataca chaitatajmi pajtachircani. Utcami rurarcani. Huillashca shinatajmi tucurca.

⁴ Ñucaca cancuna ch'ahuanyashcacuna cashcataca rijsinimi. Cancunapaj cunga tulluca racu fierro shinami, frentepish bronce shinami.

⁵ Ñuca imallata ruragricushcataca manaraj rurashpami, achca huatacuna illajpiraj ña huillarcani. Ñuca rurashca diosmi chashna rurashca, tacashpa rurashca imamanpish rijchaj diosmi caicunataca cachashca ama nichunmi ñaupaman huillarcani.

⁶ Tucuita uyashcata, ricushcataca ¿manachu cancuna huillana carcanguichij? Can mana yachashca pacallapi tiyacuj mushujcunatami cunanca canman huillagrini.

⁷ Caitaca cunanllami ruranata yuyarircani. Ñaupa punllacunamanpish mana yuyarircanichu. Caina punllallapish mana yuyarircanichu. Chaimantami manaraj uyashcanguichij. Cancunallataj chaitaca ñami yacharcanchij ama nichunmi chaitaca cunanlla yuyarircani.

⁸ Cancunaca nunca manaraj uyarcanguichijchu, nunca manaraj yacharcanguichijchu. Cancunapaj rinrinca uyanapajca manaraj pascarishcachu carca. Canca imatapish manataj pajtachij cashpa, mana cazuj cajpimi mamapaj huijsamanta pacha cantaca: Caica mana cazujmi nishpa shutichircani.

⁹ Ñuca shutita c'uyashcamantami, p'iñarishpapish manaraj llaquichircani. Ñucata alabachunmi cantaca mana chingachishpa jarcarircani.

¹⁰ Riqui, cantaca chuyayachircanimi. Cullquita chuyayachij shinaca mana chuyayachircanichu. Hornopi rupachij shina llaquicunahuanmi cantaca agllarcani.

¹¹ Ñucaca ñuca quiquinllatataj c'uyashcamantami chashna rurarcani. Ñuca shutita ama yanganchishca cangapajmi chashna rurarcani. Chaimanta ñucata alli ninapaj randi pi shujtajta alli nichunca mana saquishachu.

Mandaj Diosmi pai agllashcacunataca quishpichinga

¹² “Jacob, ñucata uyai. Israel, canca ñuca agllashcami cangui. Ñucallatajmi callarichijpish cani. Ñucallatajmi tucurichijpish cani.

¹³ Cai pachaca ñuca maquihuan rurashcami. Ñuca alli maqui shunguhuanmi, jahua pachatapish medircani. Tucuicunata tiyachun nishpa shutichijpica tiyarcallami.

¹⁴ Tucui cancuna tandanacushpa uyaichij. ¿Tucui chaicunata huillajca paicunapurapica tiyanchari? Mandaj Dios c'uyashca runami Babiloniapica Dios munashcata ruranga. Paipaj maquimi caldeocunapaj jahuapi llaquichingapaj canga.

¹⁵ Ñucami paitaca rimashpa cayashpa pushamurcani. Chaimanta pai rurana cashcataca ashtahuanmi rurashpa catinga.

¹⁶ Ñucapajman c'uchuyashpa caita uyaichij: Callarimantapacha pacallapica mana rimashcanichu. Tucuita callarichicushpapish chaipimi carcani. Tucui imalla tucucujpipish chaipimi cani” ninmi. Cunanca Mandaj Jatun Diosmi paipaj Espirituhuan ñucataca cacharca.

¹⁷ Mandaj Dios canta Quishpichij, Israelpaj jucha illaj Diosca cashnami nin: “Ñucaca Mandaj Diosmi cani. Cambaj allipaj yachachij cambaj Diosmi cani. Can catina ñanta yachachij Diosmi cani.

¹⁸ ¡Ñuca mandashcacunata can cazushca cajpica, tucuipi can ima shinalla canaca jatun yacu shinami canman! Can cashcata ruranaca mama cucha yacu jataricuj shinami canman.

¹⁹ Cambaj huahua huahuacunaca ñutu allpa shinami canman carca. Canmanta mirarishcacunaca t'iyu allpa shinami canman carca. Paipaj shutica ñuca ñaupajmantaca mana anchuchishcachu, mana p'ichashcachu canman carca” ninmi.

²⁰ Babiloniamanta llujshichij. Caldeocunapaj chaupimanta miticushpa richij. Cushicushpa huillaichigari. Tucuicunaman huillaichij. Paicunamanca: Mandaj Diosca paipajta ruraj Jacobtaca quishpichinmari nishpa, tucui cai pachata rishpa huillaichij.

²¹ Shitashca pambata pushamucushpapish, yacunaihuantaca mana pushamurcachu. Jatun rumimantami yacuta llujshichirca. Jatun rumita chaupijpica jatun yacumi pajcharca.

²² Mandaj Jatun Diosca: “Millaicunapajca sumaj causai mana tiyanchu” nishcami.