ISAÍAS 47 - Dios Rimashca Shimicunami

Babilonia pueblo imalla tucuna cashcami

¹ Babiloniapaj ushushi, c'arihuan manaraj chayarinacushca huarmi uriyashpa ñutu allpapi tiyari. Caldeocunapaj ushushi, tiyana illajllami cangui, pambapi tiyari. Cantaca ña mana sumaj atirida huarmimi cangui ningacunachu.

² Molinopi granota cutailla. Ch'ungurishcata anchuchi. Anacota huichichishpa llucha changalla, yacuta ch'imbai.

³ Cambaj pinganayaj aicha lluchulla tucujpi, shujtajcuna ricujpi pingaimi tucungui. Cancuna ima shinami millaita rurarcanguichij chai shinallatajmi rurasha. Chaimantaca pi mana quishpiri tucungachu ninmi.

⁴ Ñucanchijta Quishpichijmari chashna nin. Paipaj shutica tucuita Mandaj Dios shutimi. Israelcunapaj jucha illaj Diosmi.

⁵ “Caldeocunapaj ushushi, upajlla tiyarishpa amsaman yaicui. Cantaca: Llajtacunata mandaj huarmi ña mana ningacunachu”.

⁶ Ñuca agllashcacunahuanmi p'iñarircani. Paicunatami yangata rurarcani. Chaimi cambaj maquipi churarcani. Canca manataj llaquishpami llaquichircangui. Yuyajcunamanpish cambaj yallitaj llashaj yugotami apachircangui.

⁷ Canca: Huiñaitami mandaj huarmi casha nircanguimi. Cashna tucuna cashcataca mana yuyarircanguichu. Can ima shina tucurinataca mana yuyarircanguichu.

⁸ Huainayana yuyaihuan allichirishca huarmi uyai. Canca ima tucuna cashcata mana yuyashpami tiyacungui. Cambaj shungupica cashnami niricungui: Ñucaca ñucami cani, pi shujtajca mana tiyanchu. Viudapish, huahua illajllapish manataj saquirishachu niricunguimi.

⁹ Viuda canapish, huahua illaj canapish ishquindijmi chai punllaca cambaj jahuaman ñapish shamunga. Chai llaquicuna ama japichun brujocunahuan pajtachiricujpipish chai llaquica tucui fuerzahuanmi cambaj jahuaman shamunga.

¹⁰ Canca millaita rurajtaca: Pi mana ricucunchu yuyashpami chai yuyailla millaita rurarcangui. Yachaj tucushca cashcahuan, alli yuyaiyuj tucushca cashcahuanca canllatajmi umaringui. Chaimantami: Ñucallami mandaj cani, pi shujtajca mana tiyanchu niringui.

¹¹ Maimanta shamushcata mana yachashca llaquimi cambaj jahuamanca shamunga. Cambaj jahuamanca mana mitsari tucuipaj llaquimi shamunga. Can mana yuyashca llaquimi cambaj jahuamanca ñapish shamunga.

¹² Cunanca brujocunahuan pajtachirinata caticuilla. Canca huambramanta pachami chaihuan pajtachirishpa amañarishca cangui. Chaicunahuanca jarcari tucunguipishchari, fuerzasapa tucunguipishchari.

¹³ Chai cunashcacunahuanca ñami shaicushca cangui. Jahua pachata chapashpa, luzerocunata ricushpa, quillacunata yupashpa q'uipa punllacuna cambaj ima shamunata huillajcunaca cunan canmanta shayarishpa mitsachunri.

¹⁴ Riqui, paicunaca t'amo shinallami cangacuna. Ninami rupachinga. Lunyacuj ninamantaca paicunaca mana quishpiri tucungacunachu. Nina brazusllapish mana saquiringachu. Tiyarishpa cunungapajllapish, mana unillatapish rupangachu.

¹⁵ Brujocunahuan can shaicuita trabajashca cambaj brujocunaca chashnami tucurcacuna. Can huambramanta trabajashca brujocunaca chashnami cangacuna. Paicunaca tucuicunami quiquin ñanta ringacuna. Canta quishpichijca pi mana tiyangachu.