ISAÍAS 46 - Dios Rimashca Shimicunami

¹ Bel nishca diosca, uri singamari urmashca. Nebo diosca pambapimari urmashca. Chai dioscunaman rijchajta rurashcacunatapish animalcunamanmi apachishpa apancuna. Aparij animalcunamanmi apachishpa apancuna. Cancuna apashpa purinalla dioscunataca aparij animalcunami shaicuita aparishca rincuna.

² Yanganchishcami carcacuna. Tucuicunami tandalla urmarcacuna. Apachishpa apacunmantaca mana quishpiri tucurcachu. Ashtahuanpish prezu rircallacunami.

³ Jacobpaj huahua huahuacuna uyaichigari. Mana huañushpa puchushca tucui israelcuna uyaichigari. Mamapaj huijsamantapacha ñuca cuidamushcacuna uyaichigari. Mamapaj huijsamantapacha ñuca rigrapi apamushcacuna uyaichigari.

⁴ Cancuna yuyajyangacamapish ñucallatajmi cuidasha. Cancuna puzujlla uma tucungacamapish ñucallatajmi charirasha. Cancunata ruraj ñucallatajmi cancunataca pushasha. Cancunataca ñucami charirasha. Cancunataca ñucami huaquichisha.

⁵ ¿Ñucataca maijanman rijchaj cashcatataj yuyanguichij? ¿Pihuantaj ch'imbapuranguichij? ¿Ñucanchij chaicuna shina cangapajca pihuantaj ch'imbapuranguichij?

⁶ Curitaca muchilamantami llujshichincuna. Cullquitaca balanzacunapimi pezancuna. Chaicunahuanca cungurishpa adorangapajmi cullquimanta imatapish rurajman shuj diosta rurachin.

⁷ Rigra jahuapi aparishpa rishpaca, paita maipi churanapimi churancuna. Chaipica maiman mana cuyurishpa tiyacunllami. Caparijpipish imata mana cutichinchu. Llaquimantapish, mana quishpichinchu.

⁸ Chaita cancunallataj alli yuyarishpa pingai tucuichigari. ¡C'ariyajcuna cancunallataj yuyaita japichigari!

⁹ Ñaupa huatacunamanta ñuca imallata rurashcata yuyarichij. Ñucallami Dios cani, shujtaj Diosca mana tiyanchu. Ima shujtajca ñuca shinaca mana tiyanchu.

¹⁰ Ñucami q'uipa punlla imalla tucunataca, callarimantapacha tucuita huillani. Ñucaca ñaupa punllamantatajmi q'uipa punllapi ñuca imata ruragrishpaca manaraj chaita rurashpa huillani. Cashnami nini: Ñuca imalla rurana tucushcaca ruraricungallami. Ñuca imallatami rurasha nircani chaitaca rurashatajmi.

¹¹ Inti llujshin llajtamantami shuj angata cayarcani. Paica ñuca imalla nishcata ruraj runami. Ñucami pushamusha nircani, pushamushatajmi. Ñuca imalla yuyarishcataca chaitatajmi rurasha.

¹² Rumi shungucuna, uyaichigari. Cashcata ruranamanta carupi cajcuna uyaichigari.

¹³ Cashcata rurashpa ñuca quishpichinaca ñami c'uchuyamugrin. Ñuca quishpichinaca mana uniyangachu. Sionpimi quishpirinataca churagrini. Ñuca jatun cashcataca Israelpimi churagrini.