ISAÍAS 43 - Dios Rimashca Shimicunami

Mandaj Diosllami quishpichij

¹ Jacob, canta callarichij Diosca Israel, canta ruraj Mandaj Diosca cunanca cashnami nin: “Ama manchaichu, ñucami cantaca quishpichircani. Ñucami cantaca shutipi cayarcani, canca ñucapajmi cangui.

² Yacuta ch'imbacujpipish ñucami canhuan casha. Jatun yacucunata ch'imbacushpapish, mana millpuringuichu. Nina jahuata pasashpapish, mana rupanguichu. Lunyacuj ninapish, canpica mana japiringachu.

³ Mandaj Dios ñucami cambaj Taita Dios cani. Israelcunapaj jucha illaj Diosmi canta Quishpichij cani. Canta llujshichingapajca Egiptocunatami curcani. Cambaj randica Etiopiacunata, Sebacunatami curcani.

⁴ Ñuca ñahuipica, canca munananquimi cangui. Ñuca c'uyashcami cangui. Alli nishcami cangui. Cambaj randica shujtaj runacunatami cusha. Cambaj causaimantaca shujtaj llajtacunatami cusha.

⁵ Ama manchaichu, ñucamari canhuan cani. Cambaj huahua huahuacunataca inti llujshin ladomantami apamusha. Inti huashicun ladomantami cambaj huahua huahuacunataca tandachisha.

⁶ Janaj ladotaca: “Ñuca huahuacunata cachai” nishami. Ura ladotaca: “Ñuca huahuacunataca ama charicuillachu” nishami. Caru llajtacuna ñuca churicunata pushamuichij. Tucui cai pachapi tiyaj llajtacuna ñuca ushushicunata apamuichij.

⁷ Tucui ñuca shutihuan cajcunataca ñucata jatunyachijcuna cachunmi callarichircani, rurarcani nishami.

Israelcunaca ricushpa huillajcuna shina cashcami

⁸ Rinrinyuj cashpapish mana uyaj, ñahuiyuj cashpapish mana ricuj ñuca agllashcacunata pushamuichij.

⁹ Tucui llajtacuna shuj shinalla tandanacuichigari. Tucui pueblocuna tandanacuichigari. Paicunamanta ¿maijantaj tucui caicuna imalla tucuna cashcataca huillarcari? Ña imalla tucushcacunatapish ¿pitaj huillarcari? Paicuna huillashcata uyajcuna tiyajpica, paicunata pushamuichij. Paicuna uyashcata huillajpica chashnatajmi cashca” nishunmi.

¹⁰ Mandaj Diosca cashnami nin: “Ñucaca ñaupamantapacha ñucallatajmi cani. Pi shujtaj dios mana ñucapaj ñaupa tiyarcachu, q'uipatapish pi shujtaj dios mana tiyangachu. Ñucaca cancunataca chaita yachachun, ñucapi shunguta churashpa causachunmi agllarcani. Chaimanta cancunami ñucamanta uyashcata, ricushcata huillajcuna, ñucapajta rurajcuna canguichij.

¹¹ Ñucaca Mandaj Dios ñucami cani. Pi shujtaj quishpichij mana tiyanchu” ninmi.

¹² Ñucami huillarcani, quishpichircani, huillachircani. Cancunapurapica shujtajcunapaj diosca mana tiyarcachu. Ñucami Taita Diosmi cani. Cancunami ñucamanta huillajcuna canguichij ninmi Mandaj Diosca.

¹³ Punlla manaraj tiyajpimi ñucaca ña tiyarcani. Ñuca maquimanta cacharichijca pi mana tiyanchu. Ñuca imata rurasha nishcataca, ¿pitaj jarcangari? ninmi.

¹⁴ Cancunata Quishpichij israelcunapaj jucha illaj Mandaj Diosca cashnami nin: Cancunata quishpichichunca Babiloniamanmi gentecunata cachasha. Paicuna rijpica cancunata llaquichicujcunaca tucuicunami miticushpa callparcacuna. Jatun barcocunatami charinchij nishpa jatun tucucuj caldeocunaca chai barcocunallapitajmi miticushpa rircacuna.

¹⁵ Ñucaca jucha illaj cancunapaj Mandaj Diosmi cani. Israelcunata callarichij paicunapaj jatun Mandajmi cani.

¹⁶ Mama cucha chaupita ñanta pascaj, jatun yacucuna chaupita ñanta pascaj, Mandaj Diosca cashnami nin:

¹⁷ Carrota, caballocunata, soldadocunata, alli macanacujcunata llujshimujca tucui chaicunandijmi manataj jatarinapaj urmarca. Mecha huañuj shinami chingarircacuna.

¹⁸ “Ña chashna tucushcacunataca ama yuyarichijchu. Ñaupaman tucushcacunataca ña ama yuyarichijchu.

¹⁹ Riqui, ñucaca mushujtami ruragrini. ¿Manachu ricunguichij? Ñallami luzman llujshinga. Shitashca pambapica cutinmi ñanta pascasha. Chaquishca allpapica jatun yacutami surcusha.

²⁰ Ñuca agllashcacuna ubyachun shitashca pambacunapi yacucunata surcujpi, ima mana p'ucun chaquishca allpapi jatun yacucunata surcujpica, manchanana animalcuna, chacalcuna, avestruzpaj huahuacunami ñucataca alabangacuna.

²¹ Cai israelcunataca ñucapajllami rurarcani. Paicunami ñucata alabanataca huillangacuna.

²² Jacob ñucataca mana mañarcanguichu. Israel ñucapajlla canataca shaicurcanguimi.

²³ Tucuita cushpa rupachina animalcunatapish ñucaman cungapaj mana apamurcanguichijchu. Animalcunata cushpa rurachishpa adoranatapish mana adorarcanguichijchu. Ñucaman cuna cashcacunahuanpish ñucapajta rurachun mana mañarcanichu. Inciensota cuchun nishpapish mana shaicuchircanichu.

²⁴ Mishquijllata ashnacuj huirutaca, ñucapajca mana cullquihuan randircanguichijchu. Animalcunapaj huirata cushpa ñucata mana cushichircanguichijchu. Ashtahuanpish cancunapaj llashacuj juchatami ñucaman apachircanguichij. Cancunapaj millaita rurashcahuanmi ñucataca p'iñachircanguichij.

²⁵ Cancuna c'ariyashcacunata p'ichaj ñucaca ñucami cani. Ñuca quiquinllatataj c'uyashpami, chashna p'ichani. Cancunapaj juchacunataca manataj yuyarishachu.

²⁶ Ñucata imata nishun nishpaca nichijlla. Ishquindij ch'imbapura ima cajpipish ricushunllami. ¡Ima juchachina illajlla cashpaca canraj rimailla!

²⁷ Cambaj punta yayapish juchallircami. Canta yachachijcunapish, ñucata c'ariyarcacunami.

²⁸ Chaimantami ñucapajlla ucupi mandajcunatapish yangata rurarcani. Jacobpaj huahua huahuacunataca llaqui tucushca cachunmi churarcani. Israelcunataca c'amishca asishca cachunmi saquircani” nircami.