ISAÍAS 40 - Dios Rimashca Shimicunami

Mandaj Diosca Sionta cushichishcami

¹ “¡Cushichichij, cushichichij ñuca agllashcacunata!” ninmi cancunapaj Taita Diosca.

² Jerusalenpi causajcunaman caparishpa paicunapaj shunguman chayajta cashna nishpa huillaichij. Cancuna llaquita apana punllaca ñamari tucurishca. Cancunapaj juchacunataca ñami perdonashca. Cancunapaj juchamantaca Mandaj Diospaj maquihuan llaquichicujpica ishquihuan yallitami llaquicunata chasquishcanguichij ninmi.

³ Shitashca pambapi caparijca: “¡Mandaj Diospaj ñanta allichichij. Shitashca pambacunataca ñucanchij Taita Diospaj llambujlla ñanta ruraichij!

⁴ ¡Tucui pugru pambacunata rumicunahuan churashpa allichichij. Tucui urcucunatapish, lomacunatapish pambajllata ruraichij! ¡Huishtu ñancunatapish derechaichij. Jutcu jutcu ñancunatapish llambujllata ruraichij!

⁵ Chaipimi Mandaj Dios sumaj achij nicuj cashcaca ricuringa. Chaitaca tucui gentecunami tandanacushpa ricungacuna”. Mandaj Diosca, paipaj shimihuantajmi chashna nishca.

⁶ “Caparijca capariyari” nijpimi ñucaca: “¿Imatataj caparishpa huillana caniyari?” nijpica: “Tucui gentecunami q'uihua shinalla. Pai sumaj cashcaca chagrapi tiyaj sisa shinallami.

⁷ Mandaj Diospaj huaira p'ucujpica q'uihuaca chaquirinllami. Sisaca urmanllami. Gentecunaca chai q'uihua shinallami. Chaica chashnatajmi.

⁸ Q'uihuaca chaquirinllami. Sisaca urmanllami. Ashtahuanpish ñucanchij Taita Diospaj shimi nishcaca pajtacungallami” nircami.

⁹ Sionmanta huillaj, shuj jatun urcuman huichiyai. Jerusalenmanta huillaj, tucui fuerzahuan caparishpa huillayari. Mana manchashpa jatariyari. Judá llajtapi caj pueblocunamanca: “¡Caipimi cancunapaj Taita Diosca!” nichigari.

¹⁰ Riqui, Mandaj Jatun Diosca tucuita rurai tucuj cashcahuanmi shamunga. Paipaj maquihuanmi tucuita mandanga. Imallata rurashca shinallataj cuna cashcataca paimari apamunga. Cuna cashcaca paipaj ñaupajpimari shamunga.

¹¹ Paica ovejacunata michij shinami paipaj ovejacunataca michinga. Malta c'ari ovejacunataca paipaj rigrapimi apanga. Marcashpami apanga. Cunanlla huacharishca llullu bachujcunatapish sumajta cuidashpami michinga.

Imahuan mana ch'imbapuraipaj Israelcunapaj Taita Diosmi

¹² ¿Pitaj mama cucha yacutaca, paipaj maqui shunguhuan medircari? ¿Pitaj jahua pachataca paipaj dedocunahuan medircari? ¿Pitaj tucui cai pacha allpatapish quimsa dedohuan tandachishpa montonashcari? ¿Pitaj urcucunata, lomacunatapish balanzapi pezashpa churashcari?

¹³ Mandaj Diostaca ¿pitaj yuyaita cushpa yachachishcari? Mandaj Diostaca ¿pitaj cunashpa yachachishcari?

¹⁴ Alli cashcata mana alli cashcata yachangapajca ¿pitataj cunachun mañashcari? Allita mandaj canataca paitaca ¿pitaj yachachishcari? Alli ñanpi purinataca ¿pitaj yachachishcari? Alli yuyaiyuj canataca ¿pitaj yachachishcari?

¹⁵ Taita Diospajca llajtacunaca, baldemanta yacu shutushca shinallami. Iñulla ñutu allpata balanzapi churashca shinallami. Mama cucha chaupipi caj llajtacunaca ñutu allpa shinallami.

¹⁶ Libanoca Diosman cushpa rupachingapajpish mana pajtanchu. Chai urcupi tiyaj tucui animalcunapish Diosman cungapajca mana pajtanchu.

¹⁷ Tucui llajtacunapish paipaj ñaupajpica mana tiyashca shinallatajmi. Paipaj ñaupajpica ima mana canchu.

¹⁸ Taita Diostaca ¿imahuantaj ch'imbapurai tucunguichigari? Mana cashpaca paiman rijchajtapish imata mana rurai tucunguichijchu.

¹⁹ Imatapish ruranata yachajca imamanpish rijchaj diostami ruran. Cullquimanta imatapish ruranata yachajca curihuanmi chai jahuata llihuin. Cullqui cadenacunatami ruran.

²⁰ Huajcha runaca polilla mana japina caspita mashcashpami, imatapish ruranata alli yachajta mashcashpa mana cuyurij diosta rurachin.

²¹ ¿Manachu yachanguichij? ¿Manachu uyashcanguichij? Cancunamanca callarimanta pacha ¿manachu huillashca canga? Cai pachata rurashcapachamanta ¿manachu pi cancunamanca yachachirca?

²² Taita Diosca, cai pachata muyunchishcapaj jahuapimi tiyacun. Chai jahuamanta ricujpica cai pachapi causajcunaca langostacuna shinallami. Paica jahua pachataca, shuj linsota shinami chutashca. Causanapaj carpa huasita shayachij shinami churashca.

²³ Paica jatun tucushcacunataca mana tiyashca shinatami ruran. Cai pachapi mandajcunatapish chashnacunataca yangacuna cachunmi churan.

²⁴ Allpapi nunca mana plantashca yura shinami canga. Allpapi nunca mana tarpushca yura shinami canga. Paipaj sapica allpa ucuta nunca mana rijsij shinami canga. Chaimanta huaira p'ucujpica utcami chaquiringa. Acapana shamushpapish chaquishca p'angacunata shinallami apanga.

²⁵ Jucha illaj Diosca: “Ñucaman rijchajtaca ¿imatataj ruranguichigari? ¿Ñucataca imahuantaj ch'imbapuranguichigari?” ninmi.

²⁶ Cancunapaj ñahuihuan huichilla ricuichigari. Tucui caicunata pi rurashcata ricuichigari. Jahuapi ima tiyajcunataca paimi tucuita yupashpa maita rina cashcata cachan. Tucui chaicunataca paicunapaj shutipimi cayan shujllapish mana illangachu. ¡Chashnami paica tucuita rurai tucuj, tucuita mandai tucuj!

²⁷ Jacobpaj huahua huahua israelcuna ¿ima nishpataj cancunaca: “Mandaj Diosca ñucanchij ima shina puricujtaca mana ricucunchu. Ñucanchijta mitsana cashcataca mana yuyarinchu”? ninguichigari.

²⁸ Tucui cai pachata rurajca huiñaita causaj Mandaj Dios cashcataca ¿Manachu yacharcangui? ¿Manachu uyarcangui? Paica mana shaicurinchu mana urmarinchu. Paipaj yuyaitaca pi mana tucuita yachai tucunchu.

²⁹ Paimari shaicushcacunamanca, fuerzata cun. Fuerzata mana charijcunamanpish fuerzata mirachin.

³⁰ Huambracunapish, shaicuncunami urmarincunami. Q'uipa huiñaicunaca irquiyancunami urmarincunami.

³¹ Ashtahuanpish Mandaj Diospi shunguta churajcunaca mushuj fuerzatami charingacuna. Aguilacuna shinami jataringacuna. Callpashpapish mana shaicungacunachu. Purishpapish mana urmaringacunachu.