ISAÍAS 4 - Dios Rimashca Shimicunami

¹ Chai punllapica canchis huarmicunami shuj c'arillata quichunacushpa chutanacushpa cashna ningacuna: “Ñucanchijca micunata carachunpish mana nishunchu, churanata churachichunpish mana nishunchu. Ashtahuanca ñucanchijta cambaj huarmi cachun japishpa ñucanchij pingaihuan cajta anchuchihuai” ningacunami.

Q'uipa punllapi Jerusalén sumaj canata huillashcami

² Chai punllacunapica Mandaj Dios retoñachishca yuraca alli nishca canapaj, jatun nishca canapajmi canga. Chai llajtapi p'ucushca granocunaca saquirij israelcunata jatun nishca alli nishca canapajmi canga.

³ Sionpi puchurishcacunapish, Jerusalenpi causaihuan saquirishcacunapish, jucha illajmi nishcacunami canga. Tucui Jerusalenpi causaiyujcunapaj shuticunata quillcashcacuna,

⁴ Jatun Dios Sionpi causaj huarmicunata tucui mapata p'ichashcacuna, Jerusalén yahuarlla cajta llaquichij espirituhuan, tucuchij espirituhuan maillashcacunami chashna nishca cangacuna.

⁵ Mandaj Diosca, Sión urcu jahuapi causajcunapaj huasicuna jahuapi, chaipi tandanacushcacunapaj jahuapica punllaca amsa p'uyutami churanga. Tutaca nina lunyacuj achij nicujtami churanga. Tucui chaicunapaj jahuapica Jatun Diosmi paipaj sumaj cashcahuan carpa shina llandushca canga.

⁶ Chai carpaca punllapish inti rupachinamanta miticunapajmi canga. Huairandij tamyandij c'ulun nishpa rundu tamyahuan cajpi miticunapajpishmi canga.