ISAÍAS 39 - Dios Rimashca Shimicunami

Babiloniamanta cachashcacunata Ezequías chasquishcami

¹ Chai punllacunapimi, Baladanpaj churi Merodac-baladán Babilonia llajtata jatun mandajca, huillashpa purijcunataca quillcacunandij convidanacunandij Ezequiaspajman cacharca. Ezequías ungushca cashcamanta alliyashcata yachashpami cacharca.

² Ezequiasca paicunahuan cushicushpami paipaj huasipi imalla huaquichishcacunataca, cullquita, curita, mishquijllata ashnacujcunata, ashtahuan alli aceiteta, macanacunacunata huaquichinacunata, paipaj huaquichinacunapi imalla tiyajcunatapish tucuita paicunaman ricuchirca. Ezequiasca paipaj huasipipish, pai mandacunpipish imata mana saquishpa tucuitami ricuchirca.

³ Profeta Isaías jatun mandaj Ezequiaspajman shamushpaca: –¿Chai runacunaca maimantataj shamushcacuna, imatataj nincunari?– nijpi Ezequiasca: –Caru Babiloniamantami shamushcacuna– nirca.

⁴ Isaiasca: –Cambaj huasipica ¿imatataj ricurcacuna?– nijpi Ezequiasca: –Ñuca huasipi tucui imalla tiyashcatami ricurcacuna. Ñucapaj huaquichinacunapi tiyajcunaca paicuna mana ricushcaca ima mana saquirinchu– nircami.

⁵ Chaimi Isaiasca Ezequiastaca: –Tucuita Mandaj Dios imata nishca cai shimicunata uyai:

⁶ Cambaj huasipi tucui imalla tiyajcunata, cambaj ñaupa yayacuna cunancama tucui imallata huaquichishcacunata Babiloniaman apana punllacunami chayamucun. Imata mana saquishpami apangacuna ninmi Mandaj Diosca.

⁷ Canmanta llujshishca maijan cambaj churicunataca Babiloniaman apajpi, paicunaca chai llajtata jatun mandajpaj huasipimi eunucocuna canga ninmi– nirca.

⁸ Chaimi Ezequiasca Isaiastaca: –Mandaj Dios canta ñucaman huillachishca shimicunaca allimi– nishpaca: –Ñuca causai punllacunallapipish sumaj causai ima manchai illaj canami tiyanga– nircami.