ISAÍAS 31 - Dios Rimashca Shimicunami

Egipciocunaca runacunallami mana dioscunachu

¹ Egiptocuna ayudachun nishpa Egiptoman uriyajcunalla. Caballocunata, carrocunata charin nishpalla shunguta churajcunalla. Achcacuna cashcallamanta, caballocunapi tiyarijcuna cashcallamanta, c'ari c'aricuna cashcallamanta shunguta churajcunalla. ¡Aij, imachari tucungacuna! Ashtahuanpish Israelcunapaj jucha illaj Diospica shunguta mana churancunachu. Mandaj Diostaca mana mashcancunachu.

² Ashtahuanpish Mandaj Diospish yachajmari. Paipi shunguta mana churajcunataca llaquichingami. Pai imata nishcataca pajtachingami. Millaita rurajcunapaj huahua huahuacunata llaquichingapajca jataringatajmi. Millaita rurajcunapura tucushpa paicunata ama llaquichichun mitsajcunataca llaquichingatajmi.

³ Egipciocunaca mana Dioschu, gentecunallami. Paicunapaj caballocunapish aichayuj animalcunallami, mana espirituchu. Llaquichingapaj Mandaj Dios paipaj maquita chutajpica, mitsajcunapish urmangami. Mitsachun mañajcunapish urmangami. Tucuicunami shuj cutintaj chingaringacuna.

⁴ Mandaj Diosca ñucamanca cashnami nirca: “León cashpa, uchilla león cashpapish ovejata huañuchishpa micucujpi tauca michijcuna tandanacushpa quichungapaj shamujpipish mana manchanchu. Caparinacushpa shamujpipish mana manchanchu. Tucuita Mandaj Diosca Sión urcu jahuapi, paipaj urcu jahuapi macanacunaman uriyamushpapish chashnallatajmi ruranga.

⁵ Pajarocuna paicunapaj tazinta cuidashpa tazin jahuata muyucujlla shinami tucuita Mandaj Diosca Jerusalentaca cuidashpa, huaquichishpa, mitsashpa quishpichinga” nircami.

⁶ ¡Israelcuna, cancuna yallitaj c'ariyashpa llaquichishca Diosllamantaj cutirichij!

⁷ Chai punllapica cullquimanta, curimanta rurashcalla dioscunatami shitangacuna. Chaicunataca cancunapaj juchayuj maquicunallahuantajmi cancunapajllataj rurarcanguichij.

⁸ Chai punllapica Asiriocunaca urmangacunami. Mana runapaj espadahuan huañuchishca cangachu. Mana runapaj espadahuan tucuchishca cangachu. Espadahuan huañuchinamanta miticujpipish q'uipa huiñaicunataca imata mana cushpa yallitaj llaquichishpa trabajachishcami causangacuna.

⁹ Paicunapaj sinchi jatun mandajcunapish manchaihuan callpangacunami. Paicunapaj soldadocunata mandajcunapish manchaihuanmi banderata shitashpa callpangacuna. Mandaj Diosca paicunata llaquichina nina lunyacujtaca Sionpimi charicuni. Hornotaca Jerusalenpimi charicuni ninmi.