ISAÍAS 28 - Dios Rimashca Shimicunami

Efraín ailluta llaquichinata huillachishcami

¹ Efraincuna machashpa jatun tucuna coronalla. ¡Aij, imachari tucunga! Vinohuan machashcalla causanaca alli granota p'ucuj pugru pamba allpa uma quinripi caj sumaj sisa chaquirij shinami paicuna jatun canaca chingaringa.

² Riquichij, Mandaj Diosca imatapish rurai tucuj c'ari c'aritami ña charicun. Paica: Yallitaj llaquichij rundu shinami, ñutuchij jatun acapana shinami, yallitaj yacu jundashpa tapaj shinami. Paimi chai pueblotaca c'ari c'ari canahuan pambaman shitanga.

³ Efraincuna machashpa jatun tucuna coronataca paipaj chaquicunahuanmi sarunga.

⁴ Alli granota p'ucuj pugru pamba allpa uma quinripi caj sumaj sisa chaquirij shinami paicuna jatun canaca chingaringa. Usya callari punllacunapi punta yaicuj higo granocunata ricushpaca, japishcahuanmi micuncuna. Chai shinamari chai pueblotaca, shamushcahuan chingachinga.

⁵ Mana huañushpa puchushcacunapajca chai punllapica tucuita Mandaj Diosca achij nicuj sumaj corona shinami canga. Umapi churarina sumaj diadema shinami canga.

⁶ Mandanapi tiyarijpajca paica cashcata ruraj espiritumi canga. Ama shuhuachun pungupi chapajcunapajca fuerzami canga.

⁷ Ashtahuanpish paicunapish vinota ubyashpami musparircacuna. Sidrata ubyashpami yuyai illaj tucurcacuna. Curapish, profetapish sidrata ubyashpami pandarircacuna. Vinota ubyashpami musparircacuna. Sidrata ubyashpami yuyaita chingachircacuna. Machashpa musparishpallami muscuipimi ricunchij nishpa huillarcacuna. Mandanapipish pandami mandarcacuna.

⁸ Tucui mezami shungu tigrashca mapahuan junda. Mirgallapish mapa illajca mana tiyanchu.

⁹ ¿Pitataj yachachicunchij yuyan? Mana cashpaca ¿yachaitaca pimantaj entendichicunchij yuyan? ¿Raquishca huahuacunaman? ¿Cunanlla raquishca huahuacunamanchu yachachicun?

¹⁰ Paicunamanca chai mandashcacunallatatajmi cutin cutin yachachicun. Ña mandashcallatatajmi cutin cutin mandacun. Shuj filapi quillcashcallatatajmi cutin cutin yachachicun. Chai filallatatajmi cutin cutin yachachicun. Ashataca caipi ashataca chaipimi yachachicun.

¹¹ Chaimanta paicunataca Diosca chapu chaputa rimashcahuan, caru llajta rimaihuanmi rimanga.

¹² Paicunamanca paica cashnami nirca: “Caimi samarinaca. Shaicushcaman samarinata cuichij. Caipimi samarinaca tiyan” nircami. Ashtahuanpish paicunaca mana uyashun nircacunachu.

¹³ Chaimantami Mandaj Diosca paicunamanca chai mandashcacunallatataj cutin cutin yachachinga. Ña mandashcallatatajmi cutin cutin mandanga. Shuj filapi quillcashcallatatajmi cutin cutin yachachinga. Chai filallatatajmi cutin cutin yachachinga. Ashataca caipi ashataca chaipimi yachachinga. Paicuna ñaupajman ricunchij yuyashcapish allajman urmangacama, jatun llaqui tucungacama, prezu japishpa huatangacamami chashna rimacungalla.

Jerusalenpi causajcunata cunashcami

¹⁴ Cai Jerusalenpi causajcunata mandaj chanzata ruraj c'aricuna, Mandaj Dios rimashcata uyaichij.

¹⁵ Cancunaca cashnami nircanguichij: “Ñucanchijca huañuihuanmi shuj yuyailla tucurcanchij. Seolhuanpish ñami ari ninacurcanchij. Chaimanta yallitaj jatun yacu shina shamushpapish ñucanchijtaca mana llaquichingachu. Llullashcami ñucanchijtaca pacanga. Umashcami ñucanchijta huaquichinga” nicunguichijmi.

¹⁶ Chaimantami Mandaj Jatun Diosca cashna nin: “Riquichij, ñucaca Sionpica, huasita callarinapajca shuj rumitami churarcani. Chaipica tucuimanta agllashca rumi, esquinapi churana rumi, achca valij rumi, pi mana cuyuchipaj rumitami churarcani. Maijanpish paipi crijca imata mana manchangachu.

¹⁷ Cashcata rurashpa mandanaca cordelta chutashca shinami canga. Cashcata ruranaca nivelashcami canga” ninmi. Llullashcapi miticunataca rundumi p'ichanga. Llullashcapi paca tucunataca yacu jundashpami apanga.

¹⁸ Cancuna huañuihuan shuj yuyailla tucushcapish chingachishcami canga. Seolhuan cancuna ñami ari ninacurcanchij nishcapish chingaringami. Yacu jundai shina llaquicuna shamushpami cancunataca sarunga.

¹⁹ Chai yacu jundai shamui callarishpaca cancunataca llaquichicungallami. Tucui tutamantacunami llaquichicungalla. Punllapish tutapish llaquichicungallami. Chaita uyashpa entendishpaca yallitaj mancharinami canga.

²⁰ Camapish uchijlla cashcamanta mana chutari tucuipajmi canga. C'atapish uchilla cashcamanta mana pilluri tucuipajmi canga.

²¹ Mandaj Diosca, Perazim urcupi jatarishca shinami jataringa. Gabaón pugru pambapi p'iñarishca shinami p'iñaringa. Pai rurana cashcata rurangapaj, pi mana entendipajta pai rurana cashcata rurangapaj, pai trabajana cashcata trabajangapaj, pi mana entendipaj paipaj trabajota rurangapajmi jataringa.

²² Cancunata huatashcacunata ama ashtahuan quichquichun cunanca ama ashtahuan chanzata ruraichijchu. Tucuita Mandaj Jatun Diosca, tucui cai llajtatami tucuchisha nirca. Chaitaca ñucamantajmi huillarca.

²³ Ñuca rimashcata alli uyaichij. Ñuca ima nishcata uyashpa alli entendichij.

²⁴ Tarpungapaj yapujca mana yapushpalla causacunllachu. P'ulucunata ñutuillaca mana causacunllachu.

²⁵ Allpata ñutushpa sumajta allichishpaca, eneldota cashpa, cominota cashpa tarpunmi. Trigotaca trigo huachupi, cebadataca cebadata tarpunapi, avenataca muyujta tarpuna cashcallapitajmi tarpun.

²⁶ Ima shina tarpunataca paipaj Diosmi yachachin. Ima shina ruranatami cashna yachachin:

²⁷ Eneldotaca mana trillanahuan trillanchu. Cominotapish mana carreta ruedahuan trillanchu. Eneldotaca, caspillahuanmi chaspin. Cominotaca uchilla varallahuanmi huajtan.

²⁸ Trigotaca trillanmi, grano urmancamallami trillan. Carreta ruedahuan trillashpapish mana saruchicunllachu. Trillana quirucunahuanpish tucui chingaringacamaca mana trillacunllachu.

²⁹ Tucui chaicunataca tucuita Mandaj Diosmi yachachin. Mancharinata cunaj cashcata, yallitaj yachaj cashcata ricuchingapajmi chashna yachachin.