ISAÍAS 27 - Dios Rimashca Shimicunami

Israelcunata llaquimanta llujshichijpi tigrashcami

¹ Chai punllapica Mandaj Diosca paipaj sinchi, jatun alli espadahuanmi leviatán nishca yallitaj callpaj culebrata, leviatán nishca jatun culebrata llaquichinga. Mama cuchapi tiyaj dragontapishmi huañuchinga.

² Chai punllapica: “Pucajlla vinota rurana uva chagrata cantaichij” ningami.

³ “Mandaj Dios ñucami cuidaj cani. Punllapi cutin cutinmi yacutapish churasha. Pi ama llaquichichun tutai punllami cuidasha.

⁴ Ñucapica p'iñarinaca mana tiyanchu. Ñuca macanacuita jarcangapajca ¿pitaj cashata, casha q'uihuata churangari? Tucui chaicunataca ñucami sarusha. Tandachishpami tucuita rupachisha.

⁵ Ñuca cachashca quishpichijpi ¿maijan chariringachu? Ñucahuan sumaj causaita mashcachun ari, ñucahuan sumaj causaita mashcachun”.

⁶ Jacobpaj sapi urata janajta rigarina punllacuna chayamungami. Israelcunamantaca retoñashpami sisanga. Tucui cai pachapimi p'ucushca granoca jundanga.

⁷ ¿Chugrichijtaca pai chugrichishca shinallachu chugrichinga? ¿Huañuchijcunataca paicuna huañuchishca shinallachu huañuchinga?

⁸ Paipi retoñashcacunataca ricushpalla llaquichingui. Inti llujshin ladomanta huaira quillapi sinchi huairallahuanmi llaquichinga.

⁹ Chashna rurashpami Jacob millaita rurashcataca perdonanga. Rumimanta rurashca altarcunata tucui urmachishpa, cal rumicunata shina ñutu allpata saquishpa, Asera diosman rijchajcunataca ña manataj cutin rurashpa, intiman rijchaj dioscunatapish ña manataj rurashpami paicunapaj juchacunata perdonashcamanta p'ucushca granoca ricuringa.

¹⁰ Muyundijta sinchi pircayuj puebloca chingachishcami saquiringa. Achcacuna causacushca puebloca, shitashca pambami saquiringa. Chaipica huagracunatami michinga. Chaipica animalcunapaj corralmi canga. Yura ramacunatapish huagracunami micungacuna.

¹¹ Chai yura ramacuna chaquijpica, p'aquishcami canga. Huarmicuna shamushpami ninata japichingacuna. Cai Israelcunaca mana yuyaita charijcunami. Chaimanta paicunata rurajca mana llaquingachu. Paicunata rurajca manataj llaquingachu.

¹² Chai punllapica Mandaj Diosca Éufrates jatun yacumanta callarishpaca, Egipto jatun yacucamami trillashpa llaquichinga. Israelcuna cancunataca shuj shujllami tandachinga.

¹³ Chai punllapica cashnapishmi canga. Jatun trompetapi tocajpica Asiria llajtata urata janajta cachashcacunami shamungacuna. Llajtamanta Egiptoman llujshichishpa cachashcacunapish tandanacumungacunami. Paicunaca Diospajlla urcu Jerusalenpimi Mandaj Diosta adorangacuna.