ISAÍAS 24 - Dios Rimashca Shimicunami

Tucui cai pachata Dios llaquichina cashcami

¹ Riquichij, Mandaj Diosca tucui cai pachatamari ñutushpa chushajta saquigrin. Tucui cai pachapi causajcunataca urata janajtami cachanga. Tucuita anchuchishpami chushajta saquinga.

² Chaipica tucuicunapaj ima shinami llaqui, chai shinallatajmi curapajpish canga. Amopajta rurajpaj ima shinami canga, chai shinallatajmi amopajpish canga. Amapajta ruraj huarmipaj ima shinami canga, chai shinallatajmi amapajpish canga. C'atujpaj ima shinami canga, chai shinallatajmi randijpajpish canga. Randijpaj ima shinami canga, chai shinallatajmi c'atujpajpish canga. Mañajpaj ima shinami canga, chai shinallatajmi mañachijpajpish canga. Mañachishcata japijpaj ima shinami canga, chai shinallatajmi mañachijpajpish canga. Divijpaj ima shinami canga, chai shinallatajmi diviyachijpajpish canga.

³ Tucui allpami chushajlla saquiringa. Tucui imapish illajmi saquiringa. Mandaj Diosmi tucui chaicunataca huillan.

⁴ Allpaca llaquimari tucushca, chushajmari saquirishca. Cai pachaca ungushcamari urmashcamari. Cai pachapi ashtahuan charij llajtacunapish ungushcamari.

⁵ Allpaca paipi causajcunapaj juchamantamari yanga tucushca. Mandashcacunatamari mana cazushca. Chaitataj ruranacunatamari p'aquishca. Huiñaipaj ari ninacushcatamari p'aquishca.

⁶ Chaimantami llaqui tucushca canman nishcaca tucui cai pachata tucuchirca. Chaipi causajcunatapish tucuicunatami jatunta llaquichirca. Chaimi cai pachapi causajcunaca tucui tucuchishca carca. Cai pachapi causajcunaca ashacunallami tucurca.

⁷ Uva chagraca ungurcami. Vinopish ashallayarcami. Cushijlla shungucuna cashcaca tucuicunami aij nicurcacuna.

⁸ Panderocunapi tocashpa cushicunapish tucurircami. C'ulun ninacushpa cushicunapish tucurircami. Arpapi tocashpa cushicunapish tucurircami.

⁹ Ña mana vinota ubyashpa cantangacunachu. Machajcunapajca sidraca mana ubyaipaj jayajmi canga.

¹⁰ Pinganayajta causashcamantami, puebloca urmachishca saquirishca. Pi ama yaicuchunmi huasicunapish tucui huichcashca cashca.

¹¹ Vino illashcamantami ñancunapi caparishpa puricuncuna. Yallitaj cushicunaca chulunyashcamari. Cushicunataca cai pachamanta anchuchishcamari.

¹² Puebloca ñutuchishcami saquirirca. Punguca mirga mirga p'aquimi siricurca.

¹³ Tucui cai pachapi causajcuna, tucui gentecunami olivos yurata chaspishpa cozichashca aceituna shina ashalla canga. Uvata pallashca q'uipa ch'alanapaj huaquincunalla saquirishca shinami canga.

¹⁴ Chai llaquimanta saquirijcunaca cushicushpa sinchita caparishpami cantangacuna. Mandaj Dios jatun cashcataca mama cucha ladomantapishmi caparishpa cantangacuna.

¹⁵ Chashna cashcamantaca Mandaj Diostaca, pugru pambacunapi causajcuna alabaichigari. Mama cucha uripi causajcunapish israelcunata Mandaj Diostaca jatunyachishca cachun.

¹⁶ Tucui cai pachamantami: “Cashcata rurajca jatun nishca cachun” nishpa cantacujta uyarcanchij. Chaimi ñucaca: ¡Aij ñucalla llaquihuanmari huañucuni, llaquihuanmari huañucuni! Mana cazujcunaca ña manataj cazuncunachu. Yallitaj mana cazuj millaicunami tucuncuna.

¹⁷ ¡Cai pachapi causajcuna mancharinami, jutcumi, linchimi cancunapajca ña chapacun!

¹⁸ Manchaihuan callpacujca jutcupimi urmanga. Jutcumanta llujshishpa callpacushpapish linchipimi pillurishpa urmanga. Jahua pacha ventanacunaca pascashcami canga. Cai pachata aparijpish chujchungami.

¹⁹ Cai pachaca ñuturingami. Cai pachaca tucuimi mirga mirga tucunga. Tucui cai pachaca yallitajmi chujchunga.

²⁰ Allpaca machashca shinami huaracaringa. Shuj chugllata shinallami cuyuchishca canga. Allpaca jucha yallitaj llashajpi urmangami. Cutinca ña manataj jataringachu.

²¹ Chai punllaca Mandaj Diosca jahua huairapi mandajcunatapish llaquichingami. Cai pachapipish llajtacunata jatun mandajcunatami llaquichinga.

²² Chaicunataca tucuicunatami montonanga. Pamba ucupi prezushcacunata shinami montonanga. Carcelpi huichcashcami saquiringacuna. Achca punllacuna q'uipaca llaquichishcami canga.

²³ Tucuita Mandaj Diosca Sión urcupi caj Jerusalenpimi mandacunga. Pai agllashca cunaj yuyajcunapaj ñaupajpimi achij nicuj mandacunga. Chaipica lunaca pingai tucungami. Intica musparingami.