ISAÍAS 22 - Dios Rimashca Shimicunami

Muscuipi shina ricuna pugru pamba imalla tucuna cashcata huillachishcami

¹ Muscuipi shina ricuna pugru pamba imalla tucunata huillachishcami: Cunanca ¿ima tucushpataj tucui cancunaca huasi jahuacunaman huichiyarcanguichij?

² Canca yallitajmi bullacungui. Cushijlla puebloca tucuicunami musparishpa bullacuncuna. Cai pueblopi causajcunaca mana espadapi huañurcacunachu, mana jatun macanacuipi huañurcacunachu.

³ Tucui cambaj mandajcunaca tandallami arcohuan huañuchinamanta miticushpa callparcacuna. Ashtahuanpish huatashpa prezu apashcallatajmi tucurcacuna. Pueblopi saquirijcunapish tucuicunami huatashpa prezu apashcallataj carcacuna. Caruta miticushpa callpacushpapish tucuicunami prezu apashca carcacuna.

⁴ Chaimantami cashna nircani: “Ñuca llajtapi causajcunata ñutuchishca cashcamanta ñuca yallitaj amijta huacachun saquichijlla. Ama ashtahuan huacaichu nishpa cushichinataca ama yuyaichijchu.

⁵ Manchaihuan caparinacui, llaquihuan cana, musparina punllata tucuita Mandaj Jatun Dios cachashca punllamari chayamun. Muscuipi shina ricuna pugru pambapimari muyundij pircacunata urmachingapaj urcuman uyarijta caparinacucun” nircanimi.

⁶ Elammitacunaca puntajlla caspicunandij cajoncunatapish apashca, carrocunandij, caballopi tiyarishca ña shamunallacunami. Kircunapish ñami escudocunata llujshichincuna.

⁷ Cambaj sumaj pugru pambapica carrocunami jundarca. Puebloman yaicuna pungupica caballopi tiyarijcunami carpacunata shayachishpa tiyarincuna.

⁸ Judata mitsajcunaca urmarcamari. Chai punllapica macanacunacunata huaquichina yuracuna chaupipi tiyaj huasillatami chapararcanguichij.

⁹ Davidpaj pueblo pirca jutcucunapish ashtahuan ashtahuan jutcurishcatami ricurcanguichij. Uraman caj tanquepipish yacuta tandarcanguichijmi.

¹⁰ Jerusalén pueblo huasicunatapish tucuitami yuparcanguichij. Chai pueblota muyujta pircangapajca huasicunatami urmachircanguichij.

¹¹ Mauca tanquemanta yacuta tandachingapajpish ishqui pirca chaupipica yacu tandanatami rurarcanguichij. Chashna cashpapish pi chai llaquita cachacujtaca mana yuyarircanguichijchu. Chashna rurana cashcataca ñaupa huatacunamanta allichijtapish mana mancharcanguichijchu.

¹² Chaimi tucuita Mandaj Jatun Diosca cancunataca umata lluchuta ruturishpa, cañamazuta churarishpa chai punllapi jatunta llaquirishpa caparishpa huacachun cayarca.

¹³ Ashtahuanpish chashna ruranapaj randica yallitajmari cushicunguichij. Huagracunata huañuchishpa, ovejacunata huañuchishpa, aichata micushpa, vinota ubyashpaca: “Micushunchij ubyashunchij cayaca ñami huañugrinchij” ninguichijmi.

¹⁴ Tucuita Mandaj Jatun Dios ricurishpami ñuca rinrinpi cashna nirca: “Chai juchamantaca paicuna huañungacama manataj perdonashachu” ninmi tucuita Mandaj Jatun Diosca.

Sebnapaj randi cullquita huaquichichunca Eliaquimta churashcami

¹⁵ Tucuita Mandaj Diosca cashnami nin: Chai cullquita huaquichijta tupanaman ri. Chai mayordomo Sebnahuan tupashpaca cashna ni:

¹⁶ Canca ¿imatataj caipica charinguiyari? ¿Pitataj caipica charinguiyari? ¿Ima nishpataj canta churana jutcutaca caipi rurarcanguiyari? Lomapi jutcuta rurajcuna shinami rurashcangui. Rumi urcupi causana jutcuta rurajcuna shinami rurashcangui.

¹⁷ Cunanca cantaca Mandaj Diosca shujtajmanmi apagrin. Llaquinayajtami prezu cachagrin. Cantaca cumurichingami.

¹⁸ Cantaca jatun pambapi pelotata mana llaquishpa jaitashpa caruta singuchishpa cachaj shinami caruta cachagrin. Chaipimi huañungui. Can jatun tucushpa purina carrocunapish chaipimi canga. Cambaj amopaj huasipi cajcunapaj pingaipajmi chashna tucungui.

¹⁹ Can maipi cashcamantaca ñucami aisashpa shitagrini. Can tiyacunmantaca t'angashpami shitagrini.

²⁰ Chai punllapica, Hilciaspaj churi, ñucapajta ruraj Eliaquimtami cayasha.

²¹ Paimanmi cambaj churanacunataca churachisha. Cambaj talabartetaca paimanmi chumbillichisha. Can mandanatapish paipaj maquipimi churasha. Jerusalenpi causajcunapajpish, Judapi causajcunapajpish paimi yaya canga.

²² Davidpaj huasi llavetapish paipaj rigra jahuapimi churasha. Pai pascashcataca pi mana huichcangachu, pai huichcashcataca pi mana pascangachu.

²³ Paitaca clavota clavaj shinami, pi mana cuyuchipaj sinchipi churasha. Chai mandanapi pai tiyacujpica paipaj yayapaj huahua huahuacunaca alli nishcami canga.

²⁴ Paipaj yayapaj huasipi alli nishca, jatun nishca canataca paipimi tucuita huarcunga. Churicunapish, nietocunapish uchilla vasocunamanta, uchilla tasacunamanta callarishpaca jatun tasacunacamami paipi huarcuringacuna ninmi.

²⁵ Chai punllapica tucuita Mandaj Diosca cashnami canga ninmi: Pi mana cuyuchipaj sinchipi churashca clavotaca anchuchishcami canga. Chai clavota p'aquijpica chaipi huarcushcacunaca urmangami. Chai clavopi tucui huarcushcacuna urmashpaca tucuimi chingaringa ninmi. Mandaj Diosmi chashna nin.