ISAÍAS 21 - Dios Rimashca Shimicunami

Mama cucha c'uchupi caj shitashca pambapi causajcuna imalla tucuna cashcata huillachishcami

¹ Mama cucha c'uchupi caj shitashca pambapi causajcuna imalla tucunataca cashami huillachishca: Neguevmantaca jatun acapanami shamun. Jatun acapana shinallatajmi manchanana llajtapi caj shitashca pambamantaca shamuncuna.

² Mandaj Diosca sinchi mancharinatami muscuipi shina ricuchirca: Huashalla llaquichijca huashalla llaquichinllami. Ñutujca ñutunllami. “Elam llajtapi causajcuna huichiyaichigari. Media llajtapi causajcuna muyundijta shayarichigari. Paicuna aij nicujtaca upallachircanimi” nircami.

³ Chaimantami ñucaca huasha nanaihuan chujchucurcani. Huachana nanaihuan caj huarmita shinamari llaquica ñucataca japirca. Chaita uyashpaca llaquillami carcani. Chaita ricushpaca musparircanimi.

⁴ Ñuca shunguca musparinmari. Caitajta ricushpaca upayanimari. Cushijlla cana tutaca manchaihuan canami tucushca.

⁵ Mezataca churancunami. Linsocunahuanmi jahuata churancuna. Micuncunami, ubyancunami. Mandajcuna jatarichigari. Escudotaca huiraichigari.

⁶ Jatun Diosmari ñucataca cashna nin: “Tucui ima ricurijpipish huillachun chapajta churai” nircami.

⁷ Chapaj runaca ishqui ishqui caballocuna carrocunata aisashca callpacujtami ricurca. Burrocunapipish, camellocunapipish tiyarishcacuna shamucujtami ricurca. Chaita ricushpaca ashtahuan alli alli ricushpami,

⁸ chapaj runaca león huacarij shina cashna caparirca: “Jatun Dios, chapana torrepica tutai punllami alli chaparacuni. Ñuca maipi canamantaca manataj anchunichu.

⁹ Chashna chapacushpami ishqui ishqui caballocuna carrocunata aisashca shamucujta ricurcani”. Paicunamanta shujca: “¡Babiloniaca urmanca, urmanca! Paicunapaj rurashcalla dioscunaca ñuturishpami pambapi siricun” nircami.

¹⁰ Ñuca llajtapi causajcunalla, trillashpa huairachishcacunami canguichij. Israelcunapaj Dios, tucuita Mandaj Dios imata nishcata uyashcatami cancunamanca huillarcani.

Duma llajta imalla tucuna cashcata huillachishcami

¹¹ Duma llajta imalla tucunataca cashnami huillachishca: Ñucataca maijantajshimi Seir llajtamantaca: “Chapaj runa, cai tutaca ¿ima horastaj? Chapaj runa, cai tutaca ¿ima horastaj?” nishpa caparirca.

¹² Chapaj runaca: “Ñallami pacarigrin, pacarishpapish utcami tutayanga. Tapusha nishpaca cutin tapunaman tigramunguichijlla” nircami.

Arabia llajtata llaquichinata huillachishcami

¹³ Arabia llajta imalla tucunataca cashnami huillachishca: Tandanacushpa caiman chaiman puricuj Dedancunalla. Arabia llajta mapa q'uihuacuna pambacunapimi pacaringuichij.

¹⁴ Yacunaihuan huañucujcunata tupanaman llujshichigari. Tema llajtapi causajcuna, yacuta apashpa richigari. Miticushpa ricujcunata micunahuan ayudaichigari.

¹⁵ Paicunaca espadahuan huañuchigrijpimari callpacuncuna. Lluchulla espadahuan huañuchigrijpimari miticugricuncuna. Arcohuan shitanalla caticujpimari miticugricuncuna. Jatun macanacuimantamari miticugricuncuna.

¹⁶ Mandaj Diosca ñucamanca cashnami nirca: “Caimanta huatapica Cedar llajta alli nishca canaca shujpi shujpi trabajaj runapaj huatacuna shinallapimi utca shitashca saquiringa.

¹⁷ Cedarpi mana huañushpa saquirij alli c'ari c'ari flechata shitajcunaca ashallami canga”. Mandaj Dios israelcunapaj Taita Diosmi chashna nirca.