ISAÍAS 20 - Dios Rimashca Shimicunami

Egipto llajtatapish, Etiopía llajtatapish Asiriocuna japina cashcata huillachishcami

¹ Asiria llajtata jatun mandaj Sargonca soldadocunata mandajtami Asdodman cacharca. Chai huatapi pai shamushpami Asdodpi causajcunahuan macanacushpa chai pueblotaca japirca.

² Chai punllacunapimi Mandaj Diosca, Amozpaj churi Isaiastaca: “Can churashca cañamazuta llujshichi, cambaj chaquicunamantapish pargatecunata llujshichi” nijpimi, Isaiasca tucuita llujshichishpa lluchulla, pargatecuna illajlla purirca.

³ Chaipimi Mandaj Diosca: “Ñucapajta ruraj Isaiasca quimsa huatatami lluchulla, pargatecuna illajlla puricurca. Chashna purishpaca Egiptopi, Etiopiapi causajcuna ima tucunatami ricuchirca.

⁴ Asiria llajtata jatun mandajca Egiptocunata prezu apacushpa, Etiopiacunata paicunapaj llajtamanta pushacushpaca, q'uipa huiñaicuna cachun, yuyajcuna cachun lluchullacunata, pargate illajllacunatami apangacuna. Egipciocunapaj pingai cachunca lluchu siquicunallatami apangacuna.

⁵ Chashna rurajpica, Etiopiapi shunguta churashpa causaj llajtacunapish, Egiptomanta jatun tucuj llajtacunapish musparingacunami, pingaringacunami.

⁶ Chai punllacunapica, cai cucha uripi causajcunaca: Riquichij, ñucanchij shunguta churashca llajtacunaca imami tucun. Asiria llajtata jatun mandaj llaquichinaman shamujpica ñucanchijta mitsachunca paicunapajmanmari rij carcanchij. Cunanca imami tucun. Cunanca ¿ima shinataj quishpirishunyari? ningacunami” nircami.