ISAÍAS 17 - Dios Rimashca Shimicunami

Damasco pueblota llaquichinata huillashcami

¹ Damasco pueblo imalla tucuna cashcataca cashnami huillachishca: “Riqui, Damascoca ña mana pueblo cangachu. Rumi montonllami canga.

² Aroer llajtapi caj pueblocunaca shitashcami saquiringa. Chai pambaca animalcunapaj corral-llami canga. Chaipimi canlla animalcunaca pi mana manchachishca pacaringacuna.

³ Efraín llajtata ayudajcunaca tucuringami. Damascopi mandashpa tiyanapish illangami. Siriapi cajcuna mana huañushpa puchujcunaca Israelpurapi jatun nishca cana illajcuna shinallatajmi tucungacuna” ninmi Tucuita Mandaj Diosca.

Israelcunata llaquichinata huillashcami

⁴ Chai punllaca, Jacobpaj huahuacuna jatun tucunaca ashallayangami. Paicuna huirayashcacuna cashcapish irquiyangacunami.

⁵ Granota cozichana punllapi cozichaj cozichashca shinami canga. Gavillata marcashpa tandachij shinami canga. Refaim pugru pambapi ch'alajcuna ch'alashca shina chushajmi saquiringa.

⁶ Olivota pallajcuna olivo yurata cuyuchishpa pallacujpi huaquin ramacunapica ishqui, mana cashpaca quimsami saquirin. Ashtahuan alli achcata p'ucuj ramapica chuscu, mana cashpaca pichcami saquirin. Chai shinallatajmi israelcunaca, caipi chaipi huaquincunalla saquiringacuna ninmi israelcunata Mandaj Diosca.

⁷ Chai punllapica runaca paita Ruraj Diospimi shunguta churanga. Israelcunapaj jucha illaj Diostami chaparanga.

⁸ Paicunapaj maquihuan rurashca altarpi tiyacujcunapica ña mana shunguta churangacunachu. Paicunapaj maquihuan rurashcacunataca ña mana chapangacunachu. Asera diosman rijchajta rurashcacunapipish, intiman rijchajta rurashcacunapipish ña mana shunguta churangacunachu.

⁹ Chai punllapica paicunapaj muyundijta jatun pircayuj pueblocunaca punta cuti granui callaricuj yura huaquinllata granushca shina, granota pallashca q'uipa yura ramacunapi shuj ishquilla granocuna saquirishca shinami huaquincunalla causangacuna. Israelcunapaj juchamantami chashna tucuchishca canga.

¹⁰ Israel-lla canta quishpichij Diostamari cungarishcangui. Can miticuna jatun rumitamari mana yuyarircangui. Chashna caruyashpapish canca sumaj yuracunata, caru llajtamanta uva yuracunata apamushpami tarpuni yuyanguimi.

¹¹ Tarpushca punllallapitaj huiñachishpapish, cayandij punllapajtaj p'ucuchishpapish ashtahuanpish cozichana punllapica maillatami cozichangui.

¹² ¡Aij, achca pueblocunalla. Mama cucha huajiaj shinamari caparingacuna! ¡Aij, caparinacucuj llajtacunalla! Achca yacucuna huajiaj shinamari caparingacuna.

¹³ Pueblocunaca caparinacungami. Achca yacucuna huajiaj shinami caparinacunga. Ashtahuanpish Dios paicunata sinchita rimajpica, carutami miticushpa ringacuna. Urcumanta t'amuta huaira ñaupachishpa rij shinami ringa. Acapana ñutu allpata apashca shinami ringa.

¹⁴ Llaqui punllapi chishiyamuitaca mancharinami canga. Chashna cashpapish p'iñajca pacarinapajca ña mana tiyangachu. Ñucanchijta llapicujcunami chashna tucunga. Ñucanchijpajta quichushpa apajcunami chashna tucunga.