ISAÍAS 12 - Dios Rimashca Shimicunami

Diosta pagui nishpa cantashcami

¹ Chai punllapica cashnami ningui: “Mandaj Dios, quiquintami cantasha. Quiquinca ñucahuan p'iñarishca p'iña cashca cashpapish, quiquin p'iñarishcaca ñami quiquinmanta anchushca. Ñucataca ñami cushichishcangui.

² Taita Diosmi ñucata Quishpichij. Paillapimi shunguta churani, pita mana manchanichu. Paica ñucapaj muyundij pirca shinami. Ñuca cantanaca Mandaj Diosmari. Paimari ñucata quishpichijca cashca” ninguimi.

³ Cancunaca cushicushpami quishpichij pugyucunamanta yacuta huishichinguichij.

⁴ Chai punllapica cashnami ninguichij: “Mandaj Diosta cantaichij. Paipaj shutita caparichij. Pai imallata rurashcataca, shujtajcunaman huillaichij. Paipaj shuti jatunyachishca cashcata yuyarichij.

⁵ Mandaj Diosca mancharinacunatamari rurashca. Salmocunahuan cantaichij. Chaitaca tucui cai pachapi yachashca cachun.

⁶ Siónpi causajcuna, cushicuichigari, cantaichigari. Israelcunapaj jucha illaj Diosca cambaj chaupipica jatunmari” ninguichijmi.