Hechos 8 - Dios Rimashca Shimicunami

Tandanacushca crijcunata Saulo llaquichishcami

¹ Sauloca, Estebanta huañuchijta ricushpaca allimi nircami. Chai punllacunallatajmi, Jerusalenpi caj tandanacushca crijcunataca llaquichina yuyailla tucushpa jatunta llaquichi callarircacuna. Chaimi tandanacushca crijcunaca tucuicuna caita chaita miticushpa Judea, Samaria llajtacunata rircacuna. Apostolcunallami mana maiman rircacuna.

² Taita Diosta yuyarij runacunami Estebanta apashpa pambarcacuna. Pai huañushcamantaca achcatami huacarcacuna.

³ Sauloca, tandanacushca crijcunata chingachisha nishpami, huasin huasin yaicushpa c'aricunata, huarmicunatapish llujshichishpa carcelman cacharca.

Samariapi alli huillaita huillashcami

⁴ Llaquichijpi Jesrusalenmanta caita chaita rijcunaca, maita rishpapish alli huillaita huillashpami rircacuna.

⁵ Felipepish Samaria puebloman rishpaca chaipipish Cristomanta huillarcami.

⁶ Felipe huillacujpica tucuicunami shuj yuyailla uyarcacuna. Pi mana rurai tucuipajta rurajpipish tucuicunami ricurcacuna.

⁷ Mapayachij espíritu japishcacunatapish achcacunamantami chai espiritucunata llujshichishpa cacharca. Chai espiritucunaca jatunta caparishpami llujshircacuna. Suchucunatapish, mana puri tucujcunatapish achcacunatami alliyachirca.

⁸ Chai pueblopica chai tucuita rurajta ricushpaca jatun cushicuimi carca.

⁹ Chai pueblopica Simón shuti shuj runami causarca. Paica alli yumbomi cani nishpami, chai llajtapi causajcunataca pai imalla rurashcahuan manchachishpa causarca.

¹⁰ Uchillacunamanta callarishpa jatuncunacamami chai runa yachachishcataca alli uyashpa: –Cai runaca Jatun Diospaj poderhuanmari– nijcuna carca.

¹¹ Alli yumbomi cani nishpa pai imalla rurashcacunahuan ña unita umashpa manchachishca cashpami, tucuicuna paita alli uyajcuna carca.

¹² Chashna cashpapish Taita Dios mandacun alli huillaita, Jesucristomantapish Felipe huillajpi crishpami c'aricunapish, huarmicunapish bautizarircacuna.

¹³ Chai Simonpish crishpa bautizarishpaca, Felipehuanmi purirca. Paica Felipe pi mana rurai tucuipaj jatun mancharinacunata, ricuchinacunata rurajta ricushpami jatunta mancharirca.

¹⁴ Apostolcuna Jerusalenpi cashpaca, Samaria pueblopipish Taita Diospaj Shimita huillajpi chasquishcatami yachaj chayarcacuna. Chaimi Pedrota, Juanta chaiman cacharcacuna.

¹⁵ Paicuna chaiman chayashpaca, jucha illaj Espirituta chasquichunmi, paicunamanta Taita Diosta mañarcacuna.

¹⁶ Espirituca paicunapajmanca manaraj uriyamushcachu carca. Jesuspaj shutillapimi bautizashca carcacuna.

¹⁷ Chaimantami paicunapaj jahuapi maquita churajpi, jucha illaj Espirituta chasquircacuna.

¹⁸ Apostolcuna maquita churajpi, chai crijcunapajman jucha illaj Espíritu shamujtami Simonca ricurca. Chaimi Simonca paimanpish chai rurai tucunata cuchun nishpa cullquita cusha nishpa,

¹⁹ cashna nirca: –Maijanpaj jahuapi ñuca maquita churashpa jucha illaj Espirituta chasquichij cangapaj ñucamanpish chai rurai tucunata cuichij– nircami.

²⁰ Chaimi Pedroca cashna nirca: –Taita Dios c'uyashpalla cushcata cullquihuan randisha yuyashcamanta cambaj cullquindij chingarigri.

²¹ Canca Taita Diospaj ñaupajpica mana alli shungumi cangui. Chaimanta canca cai ruranapica imata mana charinguichu.

²² Canca mana alli shungu canata saquishpa Taita Diosta mañai. Can chashna mana allita yuyacushcata Taita Dios perdonangapishchari.

²³ Cantaca hiel shina jayaj cajta millaita ruranapi huatashca cajtami ricuni– nijpimi,

²⁴ Simonca: –Cancuna nishca shina ama tucungapaj ñucamanta Jatun Diosta rogashpa mañaichij– nirca.

²⁵ Pedrondij, Juandij Samariamanta manaraj Jerusalenman tigrashpami Jesucristomanta imallata ricushcata chai llajtapi huillarcacuna. Taita Diospaj Shimitapish yachachircacunami. Chai q'uipa Jerusalenman tigracushpapish tucui ñancunapimi samaritanocunaman alli huillaita huillashpa rircacuna.

Etiopiamanta caj runaman Felipe huillashcami

²⁶ Jatun Diospaj shuj angelmi Felipetaca: “Jatari, Jerusalenmanta Gaza puebloman rina ura shitashca pamba ñanman ri” nirca.

²⁷ Chaimi Felipeca jatarishcahuan rirca. Ñanta pai ricushpaca Etiope llajtamanta eunuco runahuanmi tuparca. Paica Etiopia llajtata jatun mandaj Candace huarmipaj cullquitapish, tucui imalla charishcacunatapish cuidajmi carca. Chai runaca Jerusalenpi Taita Diosta adorangapajmi shamushca carca.

²⁸ Carretapi tiyarishpami, profeta Isaías quillcashca librota rezaihuan tigracurca.

²⁹ Felipetaca, jucha illaj Espiritumi: “Chai carretaman c'uchuyai” nijpi,

³⁰ Felipe c'uchuyashpaca, profeta Isaías quillcashcata rezacujta uyashpami: –¿Can rezacushca imata nisha nishcata entendinguichu?– nirca.

³¹ Chaimi eunocu runaca: –Pi mana yachachijpica ¿ima shinataj entendishari?– nishpaca carretaman Felipe huichiyashpa paihuan tiyarichunmi rogarca.

³² Chai Quillcachishcata pai rezacushcapica cashnami nirca: “Ovejata shinami huañuchinaman pushashca carca. Rutujpaj ñaupajpi malta oveja upalla caj shinami, shimi mana llujshirca.

³³ Paita p'iñashpa llaquichicujpipish, pi mana mitsarcachu. Paitaca cai pachapica huañuchircacunami. Chaimanta paica huahua huahuacunayujmi carca nishpaca ¿pitaj parlai tucungari?” nishcatami rezacurca.

³⁴ Chashna nishcatami eunuco runaca Felipetaca: –Caillata ñucaman huillapai: Caitaca ¿pimantataj profetaca nishca canga, paillamantatajchu mana cashpaca, pi shujtajmantachu nishca canga?– nishpa tapujpimi,

³⁵ Felipeca, chai rezacushca Quillcallamantataj callarishpa Jesusmanta alli huillaita huillarca.

³⁶ Parlanacuihuan ñanta ricushpaca yacu tiyan c'uchuta pasagrishpami eunuco runaca: –Caipica yacu tiyanmari. ¿Manachu ñucaca cunanllataj bautizari tucuni?– nijpi,

³⁷ Felipeca: –Tucui shungumanta crishpaca, ari pudinguimi– nijpi, paica: –Jesucristotaca, Taita Diospaj Churi cashcatami crini– nirca.

³⁸ Chaimi carretata shayachichun mandashpaca, ishquindijtaj yacuman uriyashpa, Felipeca eunuco runata bautizarca.

³⁹ Yacumanta ña llujshijpica, Jatun Diospaj Espíritu Felipeta apajpimi, eunuco runaca paitaca mana ashtahuan ricurca. Chashna cajpipish cushicushpa ñanta rircallami.

⁴⁰ Felipeca, Azoto pueblopi ricurircallami. Azotomanta callarishpa Cesareaman chayangacamami tucui pueblocunapi alli huillaita huillashpa rirca.