Hechos 7 - Dios Rimashca Shimicunami

Estebanca Taita Diosta p'iñashpa huillajca mana canichu cucujpipish paitaca huañushcami

¹ Chaimi curacunata jatun mandajca Estebantaca: –Paicuna huillashcaca ¿chashnatajchu?– nijpi,

² Estebanca: –Huauquicuna, yayacuna ñucata uyaichij. Tucuita rurai tucuj Taita Diosca, ñucanchij yaya Abrahammanca, manaraj Haranpi causagrijpimi, Mesopotamiapi cajpiraj ricurirca.

³ Chaipica: “Cambaj llajtamanta llujshishpa, cambaj familiatapish saquishpa ri. Ñucami can maiman rina cashcataca ricuchisha” nircami.

⁴ Chaimi Abrahamca caldeocunapaj llajtamanta llujshishpa, Haranpi causagrirca. Chaimantaca paipaj yaya huañujpimi, cunan cancuna causacun cai llajtamanca Taita Dios pushamurca.

⁵ Cai llajtapica paimanca chaqui saruillatapish allpataca mana curcachu. Ashtahuanpish chai punllacunapica Abrahamca huahua illajlla cajpipish Taita Diosca: “Can huañushca qu'ipa cambaj huahua huahuacunamanmi cai allpataca cusha” nircami.

⁶ Taita Diosca Abrahamtaca cashnapish nircami: “Cambaj huahua huahuacunaca quiquin llajtamanta rishpami caru llajtapi causanga. Chai llajta runacunaca paicunataca chuscu patsaj huatacunatami achcata macashpa servichishpa charingacuna.

⁷ Servichishpa charicuj llajtataca ñucami jatunta llaquichisha. Chai q'uipaca cambaj huahua huahuacunata chai llajtamanta llujshichishpa pushamujpica, cai llajtapimi ñucapajta rurangacuna” (nishcami Taita Diosca).

⁸ Abrahamtaca Taita Diosca pai cusha nishcata chasquij cashcata ricuchingapajca circuncisionta rurachunmi mandarca. Chaimi Abrahamca, paipaj churi Isaactaca huacharishca pusaj punllapi circuncisionta rurachirca. Chashnallatajmi Isaacca Jacobta, Jacobca paipaj chunga ishqui churicunata circuncisionta rurachirca. Paicunaca ñucanchij callari yayacunami.

⁹ Callari yayacunaca, envidiamantami Josetaca c'atushpa Egiptoman cacharca. C'atushpa cachajpipish Taita Diosca Josehuan cashpami,

¹⁰ llaquicunahuan José cajpipish Taita Diosca tucuipi huaquichirca. Chaimantami Josetaca Faraonpaj ñaupajpica mana c'uyaipajta c'uyajta, alli yachaj cajta ricuchirca. Chashna cajpimi, Egiptota jatun mandaj Faraonca Josetaca tucui chai llajtatapish, paipaj quiquin huasipi tiyajtapish mandachun churarca.

¹¹ Chai punllacunallapitajmi tucui Egipto llajtapipish, cai Canaán llajtapipish yaricai, jatun llaquicunapish tiyarca. Chaimi ñucanchij ñaupa yayacunaca cai llajtapica ima micunata mana charircacuna.

¹² Chaimi Jacobca, Egiptopica trigo huaquichishca tiyashcata yachashpa, ñucanchij yayacunata punta cutin cacharca.

¹³ Josepaj huauquicuna q'uipata rijpimi Joseca paicunapaj huauqui cashcata yachaj chayachirca. Chaipimi Faraonpish Josetaca pi familiamanta cashcata yachaj chayarca.

¹⁴ Chai q'uipami Joseca paipaj yaya Jacobtaca, tucui familiandij pushanaman cacharca. Paicunaca canchis chunga pichcapuracunami carca.

¹⁵ Chaimantami Jacobca, Egiptopi causanaman rirca. Chaipimi paipish, ñucanchij ñaupa yayacunapish huañurcacuna.

¹⁶ Paicunapaj tullucunataca, Siquem llajtamanmi apamurcacuna. Chai Siquem llajtapimi Abrahamca, Hamorpaj churicunaman pambana jutcundij allpataca randishca carca. Chai jutcupimi tullucunataca churarcacuna.

¹⁷ Abrahamman cai llajtata Taita Dios cusha nishca punllacuna pajtamugrijpica, israelcunaca Egiptopica achcatami mirarircacuna.

¹⁸ Chai punllacunallapitajmi Egiptopica, Joseta mana rijsij jatun mandaj mandai callarirca.

¹⁹ Chai jatun mandajca yachaj tucushca cashpami, ñucanchij ñaupa yayacunataca ama ashtahuan mirarichun nishpa c'ari llullu huahuacunata huañuchichishpa jatunta llaquichirca.

²⁰ Chai punllacunapimi Moisesca huacharirca. Paica, Taita Dios munashcami carca. Quimsa quillatami paipaj yaya mamaca paitaca huasipi charircacuna.

²¹ Huañuchunpish nishpa yacupi pacashcatami Faraonpaj ushushi japishpaca, quiquin huahuata shina huiñachirca.

²² Chashna cashpami Moisesca Egipto llajtapaj tucui yachanacunatapish yachashca carca. Paica rimanatapish ima ruranacunatapish alli yachajmi carca.

²³ Chuscu chunga huatayuj tucujpimi, Moisespaj shungumanca paipura Israel huauquicunata ricugrina yuyai shamurca.

²⁴ Chaipimi Egipto runa Israel runata macacujta ricushpa Israel runata mitsashpa Egipto runataca huañuchirca.

²⁵ “Ñuca aillu Israelcunata llaquichicuj runacunapaj maquimanta llujshichichunca Taita Diosca ñucata churashcata yuyangapishchari” nishpami paica chashna rurarca. Ashtahuanpish paicunaca, mana chashna yuyarcacunachu.

²⁶ Cayandij punllaca israelcunapura macanacucujtami japirca. Paicunataca alli tucunacuchisha yuyashpami: “Huauquindijcunami canguichij. ¿Ima nishpataj quiquinpurallatajca macanacucunguichij?” nirca.

²⁷ Ashtahuanpish macacuj runaca, mana cazushpami cashna nirca: “¿Pitaj cantaca ñucanchijta mandachun, juez cachunpish churarca?

²⁸ ¿Ñucatapish egipcio runata caina huañuchij shinallatajchu huañuchisha ningui?” nijta,

²⁹ uyashpaca Moisesca, Madián llajtamanmi miticushpa rirca. Chaipimi caru llajtamanta causacushpapish ishqui churiyuj tucurca.

³⁰ Chuscu chunga huatata causashca q'uipami, Sinaí urcu c'uchu shitashca pambapi cashpa shuj zarza yura rupacujta ricurca. Chai nina rupacun chaupipica shuj angelmi ricurirca.

³¹ Chaipimi Moisesca achcata mancharishpa alli ricungapaj c'uchuyagrishpaca, Jatun Dios cashna rimashcata uyarca:

³² “Ñucaca cambaj ñaupa yayacuna, Abrahampaj, Isaacpaj, Jacbpaj Taita Diosmi cani” nircami. Chaipica Moisesca manchaihuan chujchushpami mana ashtahuan ricui tucurca.

³³ Chaimi Jatun Diosca: “Can shayacun pambaca ima mapa illajlla ñucapajllamari. Chaimanta cambaj pargateta chaquimanta surcui.

³⁴ Ñuca agllashcacunaca Egiptopica yallitaj llaquitami apacun. Paicuna aij nicujtapish uyanimi. Chaimantami paicunata llujshichingapaj uriyamurcani. Shamui ñucami cantaca Egiptoman cachagrini” nircami.

³⁵ Chai Moisestami: “¿Pitaj cantaca mandaj cachun, juez cachunpish churarca?” nishpa israelcunaca mana cazurcacuna. Paillatatajmi Taita Diosca mandaj cachun, cacharichij cachunpish, zarza yurapi ricurij angelhuan cacharca.

³⁶ Paimi ñucanchij ñaupa yayacunataca Egiptomantaca cashna llujshichirca. Chai llajtapipish, Puca Cucha jatun yacupipish, shitashca pambapipish chuscu chunga huatacunatami pi mana ruraipajcunata, ricuchinacunatapish rurarca.

³⁷ Chai Moisesmi israelcunataca: “Cancunata Mandaj Taita Diosca ñucata cachashca shinallatajmi, cancunapuramanta shuj profetata cachanga. Pai ima nishcata cazunguichij” nircami.

³⁸ Chai Moisesllatajmi shitashca pambapi ñucanchij ñaupa yayacuna tandanacushcapurapipish carca. Paihuanmi Sinaí urcupi ángel rimarca. Chai rimashcataca ñucanchij ñaupa yayacunamanmi Moisesca huillarca. Paillatajmi causaita cuj shimicunatapish Taita Dios cushcata chasquishpa ñucanchijmanpish cujpi charinchij.

³⁹ Ashtahuanpish ñucanchij ñaupa yayacunaca Moisestaca mana cazushpami paita shitashpa Egiptollamantaj tigrashun yuyarcacuna.

⁴⁰ Chaipimi Aarontaca: “Ñucanchijta Egiptomanta pushamuj Moisesca imachari tucun, mana ricurinchu. Ñucanchijta pushachun, dioscunata ñucanchijpaj rurai” nircacuna.

⁴¹ Chaimi bizi diosta rurashpa, chai manapish dios cajman sacrificiota curcacuna. Paicunapaj maquihuan rurashca dioshuanmi cushicurcacuna.

⁴² Chaimi Taita Diosca paicunamanta anchushpa jahua pacha luzerocunata adorachun saquirca. Profetacunata Taita Dios Quillcachishcapi nishca shinami tucurca: “Israelcuna chuscu chunga huatacunatami shitashca pambapi carcanguichij. ¿Chaipica ñucamanchari animalcunata huañuchishpaca curcanguichij?

⁴³ Chaipaj randica, Moloc diostami pai tiyana huasindij aparishpa purircanguichij. Shinallataj Refán nishca diospaj luzerotapish rurashpami apashpa purircanguichij. Chaicunata adorangapajmi diostajllacunata rurarcanguichij. Chaimantami Babiloniata pasashpa causachun cachasha” nircami.

⁴⁴ Ñucanchij ñaupa yayacunaca shitashca pambapica, mandashcata huaquichina carpa huasitami charircacuna. Chaitaca ima shina ruranata Moisesman Taita Dios ricuchishca shinallatatajmi rurashca carca.

⁴⁵ Ñucanchij ñaupa yayacunaca chai huasitaca paicunapaj yayacunamantami maquin maquin japishpa shamurcacuna. Chai q'uipaca Josuemi paicunata pushamujpi chai shitashca pambamantaca cunan ñucanchij causacun llajtacama apashpa shamurcacuna. Ñucanchij yayacuna cai cusha nishca llajtapi causachun nishpami Taita Diosca chai mana israelcunataca cai llajtamanta llujshichishpa cacharca. Chai q'uipapish David mandaj tucungacamami chai carpa huasitaca charircacuna.

⁴⁶ Davidca Taita Dios yallitaj c'uyashca cashpami, paitaca Jacobpaj taita Dios ñucaca cambaj huasita rurasha ninimi nishpa mañarca.

⁴⁷ Chashna cajpipish Davidpaj churi Salomonmi chai huasitaca rurarca.

⁴⁸ Jahua pachapi caj Taita Diosca maquihuan rurashca huasipica mana causanchu. Profeta quillcashpa cashna nishca shinaca:

⁴⁹ “Jahua pachaca, ñuca mandashpa tiyanami. Cai allpaca, ñuca chaqui sarunami ninmi Jatun Diosca. Shina cajpica ¿ima shinataj ñuca huasitaca ruranguichij? Ñuca samarinaca ¿maipitaj canga?

⁵⁰ ¿Manachu tucui caicunataca ñuca maquihuan rurarcani?” ninmi.

⁵¹ ¡Cancunaca mana circuncisionta rurashcacunapaj shungucuna, rinrincuna shina rumiyashcacunami canguichij! Chaimantami cancunaca Jucha illaj Espiritutapish manataj cazujcuna canguichij. Cancunapaj ñaupa yayacunapish chashnallatajmi mana cazujcuna carca. Cancunapish chashnallatajmi canguichij.

⁵² Cancunapaj ñaupa yayacunaca profetacunataca tucuicunatami llaquichircacuna. Cashcata ruraj shamungami nishpa huillashcamantami paicunataca huañuchircacuna. Pai ña shamujpica cancunapish paitaca millai runacunaman cushpami huañuchichircanguichij.

⁵³ Cancunaca Taita Dios mandashcataca angelcuna cujpi chasquishpapish mana cazurcanguichijchu– nircami.

⁵⁴ Esteban chashna nijta uyashpaca, tucui chaipi cajcunami canirishpa shungupi achcata p'iñarircacuna.

⁵⁵ Estebanca jahua pachata huichilla ricushpaca jucha illaj Espirituhuan junda cashcamantami Taita Diosca tucuita rurai tucuj sumaj cashcata, Jesuspish paipaj alli ladoman cajta ricushpa,

⁵⁶ cashna nirca: –¡Riquiyari! Jahua pacha pascarishcata, runa Aichayujpish Taita Diospaj alli ladopi cajtamari ricuni– nirca.

⁵⁷ Chaita mana uyashun nishpami, paicunapaj rinrinta taparishpa achcata caparirinacushpa Estebantaca huaicashpa japircacuna.

⁵⁸ Paita japishpaca chai pueblomanta llujshichishpami, chai llullashpa huillajcunaca paicunapaj churanacunatapish Saulo shuti mosoman mingashpa Estebanta huañuchingapaj rumihuan shitarcacuna.

⁵⁹ Paicuna rumihuan shitacujpimi, Estebanca, “Mandaj Jesús ñuca espirituta chasquipai” nishpa mañarca.

⁶⁰ Chaipi cungurishpa sinchita caparishpaca: “Jatun Dioslla, paicuna cashna millaita ruracushcata ama yuyaringui” nishpaca huañurcallami.