Hechos 4 - Dios Rimashca Shimicunami

Pedrotapish Juantapish mandajcunapuralla tandanacushcapajman pushashcami

¹ Chaipi cajcunaman paicuna chashna huillacujpirajmi, curacunaca Taita Diospaj huasita cuidajcunata pushajcunandij, saduceocunandij ñapish paicunapajman chayarcacuna.

² Jesucristohuan shujlla tucushca cashpallami huañushcacunapaj chaupimanta causarinaca tiyan nishpa yachachicujpimi p'iñarircacuna.

³ Chaimi paicunata japishpaca ña chishi cashcamanta cayandij punllacama carcelpi churarcacuna.

⁴ Chashna rurajpipish paicuna huillashcata uyajcunaca achcacunami crircacuna. C'aricunallami pichca huaranga shina carca.

⁵ Cayandij punllaca llajtata mandajcuna, cunaj yuyajcuna, mandashcacunata quillcajcunapishmi Jerusalenpi tandanacurcacuna.

⁶ Chaipica curacunata jatun pushaj Anás, Caifás, Juan, Alejandro, curacunata jatun pushajcunapaj tucui familiacunapishmi carca.

⁷ Pedrota Juanta paicuna tandanacushcapaj ñaupajman pushamushpaca: –¿Pi mandajpitaj, pipaj shutipitaj cancunaca tucui caicunataca ruranguichij?– nijpi,

⁸ Pedroca, jucha illaj Espirituhuan junda cashpami cashna nirca: –Llajtata mandajcuna, Israelcunata cunaj yuyajcuna:

⁹ Cunan shuj ungushca runata alliyachishpa paipaj allita rurashcamantachu “¿ima shinataj paita alliyachircanguichij?” nishpa tapunguichij.

¹⁰ Cancuna tapushcataca cancunapish, Israelpi tucui causajcunapish yachachun huillasha. Nazaretmanta Jesucristotaca, cancunami chacatashpa huañuchircanguichij. Cancuna huañuchijpipish Taita Diosmi paitaca huañushcacunapaj chaupimanta causachirca. Paipaj shutipi alliyachijpimi, cai runaca cancunapaj ñaupajpi alliyashca shayacun.

¹¹ Chai Jesustaca cancunaca huasita rurajcuna mana nishpa rumita shitaj shinami rurarcanguichij. Ashtahuanpish chai rumillatajmari huasita rurangapaj callaripi churana rumi tucushca.

¹² Ashtahuanpish pi shujtaj Quishpichijca mana tiyanchu. Cai pachapi causajcunata quishpichichunca Taita Diosca pi shujtajtaca mana cushcachu. Jesusllami quishpichi tucun– nircami.

¹³ Pedropish, Juanpish mana manchashpa rimajta uyashpami mandajcunaca: –¿Ima shinataj mana jatun yachanaman rishca yanga runacunaca chashna rimanchu imamí?– nishpami achcata mancharircacuna. Chashna nicushpapish paicunataca, Jesushuan purijcuna cashcatami yuyarircacuna.

¹⁴ Chai alliyachishca runapish, Pedrohuan, Juanhuan shayacujta ricushpa paicunataca, imata mana ni tucurcacunachu.

¹⁵ Chaimantami paicunataca mandajcunapuralla tandanacushcamanta llujshichishpa paicunapuralla parlanacushpa,

¹⁶ cashna nircacuna: –¿Imatataj cai runacunataca rurashun? Paicunaca pi mana rurai tucuipaj mancharinataca Jerusalenpimi rurashpa ricuchin. Tucui chaipi causajcunami chashna rurashcataca alli yachancuna. Chaimanta mana chashnachu rurashca nishpapish mana ni tucunchijchu.

¹⁷ Shina cajpipish paicuna chashna ruracushcaca, ama ashtahuan yacharichun, cunanmanta pacha chai runapaj shutimantaca, ama piman huillachun manchachishunchij– nircacunami.

¹⁸ Paicunata cayashpaca: –Chai Jesús ima shina tucushcataca ñataj piman rimanguichijman, yachachinguichijman– nishpami mandarcacuna.

¹⁹ Chaipica Pedroca, Juandijmi paicunamanca cashna cutichircacuna: –Taita Diosta cazunapaj randica ¿cancunata cazunachu alli? Chaitaca cancunallataj Taita Diospaj ñaupajpi alli yuyarichij.

²⁰ Ñucanchij imallata ricushcata, uyashcata huillanataca mana saqui tucunchijchu– nircacunami.

²¹ Paicuna pi mana rurai tucuipajta rurajta ricushpa, tucuicuna Taita Diosta allimari cangui nicushcamantami ima shina mana llaquichi tucurcacuna. Chaimantami chai runamantaca ñataj piman huillanguichijman nishpa manchachishca q'uipaca cacharishpa cacharcallacuna.

²² Pi mana alliyachipajta alliyachishca runaca, chuscu chunga huatacuna yallitami charirca.

Mana manchashpa Jesucristomanta huillaj cangapaj mañashcami

²³ Mandajcuna cacharishpa cachajpi caishuj crijcunapajman shamushpaca, curacunata pushajcuna, cunaj yuyajcunapish imalla nishcatami tucuita parlarcacuna.

²⁴ Chaita uyashpaca, tucuicunami shuj yuyailla Taita Diostaca cashna nishpa mañarcacuna: “Tucuicunapaj jahuapi caj Jatun Dios, canca jahua pachata, cai pachata, mama cuchata, chaicunapi tucui imalla tiyajcunatapish ruraj Taita Diosmi cangui.

²⁵ Cambajta ruraj Davidtami cashna huillachircangui: “Mana judiocunaca ¿ima nishpataj p'iñarincuna? Llajtapi cajcunapish ¿ima nishpataj yangata yuyancuna?

²⁶ Cai pachata jatun mandajcunapish, llajtacunata mandajcunapish Jatun Diostapish, pai cachashca Cristotapish p'iñashpami shuj yuyailla tandanacun” nishcami.

²⁷ Chashna nishca shinallatajmi cai pueblopica, Herodesca, Poncio Pilatohuan, israelcunaca mana israelcunahuan tandanacurcacuna. Paicunaca Quishpichij cachun churashca cambaj jucha illaj Churi Jesusta p'iñashpami, shuj yuyailla tucurcacuna.

²⁸ Can ñaupaman chashna rurasha nishpa yuyarishca shinallatajmi, paicunaca rurarcacuna.

²⁹ Jatun Dioslla cunanca paicuna manchachishun yuyashpa jarcashcata ricuhuai. Ñucanchij cambajta rurajcunataca, canmanta huillangapaj imatapish mana manchana yuyaita cuhuai.

³⁰ Quiquinca tucuita rurai tucuj cashcahuan ñucanchijtaca ungushcacunata alliyachijcunata, ricuchinacunata rurajcunata, pi mana ruraipajta rurajcunata cambaj Churi Jesushuan rurahuai” nishpami mañarcacuna.

³¹ Chai q'uipaca, paicuna tandanacushpa tiyacun huasimi chujchurca. Paicunaca tucuicunami jucha illaj Espirituhuan junda carcacuna. Chashna cashpami Taita Diospaj Shimitaca mana manchashpa huillarcacuna.

Tucui ima charishcacunapish tucuicunapajmi carca

³² Crijcunaca tucuicunami shuj shungulla, shuj yuyailla carcacuna. Pi mana “caica ñucapajmi, chaica ñucapajmi” nircachu. Tucui imalla charishcacunapish tucuicunapajmi carca.

³³ Mandaj Jesús causarishcata paicuna ricushcataca, jatun poderhuanmi apostolcunaca huillarcacuna. Mana c'uyaipajta c'uyaica, tucui paicunapaj jahuapimi yallitaj carca.

³⁴ Chaimantami paicunapurapica, maijanpish ima illaj mana carcacuna. Charijcunaca allpata, huasita c'atushpami chai cullquitaca apamujcuna carca.

³⁵ Chai c'atushca cullquitaca apostolcunapajmanmi apamurcacuna. Chaimi paicunaca imata mana charijcunaman chaupishpa curcacuna.

³⁶ Chipremanta José shuti levita runapish, paicunahuanmi carca. Paitaca apostolcunaca Bernabé nijcunami carca. (Bernabé nishcaca, “Cushichij” nisha ninmi).

³⁷ Chai runaca pai charishca allpata c'atushpami, cullquita apamushpaca apostolcunaman curca.