Hechos 3 - Dios Rimashca Shimicunami

Suchu runata Pedro alliyachishcami

¹ Pedroca Juandijmi chaupi chishi shinata, Taita Diospaj huasipi Taita Diosta mañagrij cashcamanta Taita Diosta mañangapaj rirca.

² Chaipica huacharimanta pacha suchu runami tiyarca. Paitaca Taita Diospaj huasiman yaicuna Sumaj nishca pungupimi, punllanta saquij apajcuna carca. Chaipimi Taita Diospaj huasiman yaicujcunata mañashpa tiyaj carca.

³ Pedrondij, Juandij Taita Diospaj huasiman yaicugrijta ricushpami, chai runaca imallatapish cuchun nishpa mañarca.

⁴ Pedroca, Juandij paita ricushpami: –Ñucanchijta ricui– nirca.

⁵ Chaimi chai runaca imallatapish cungapishchari nishpa paicunata chapacurca.

⁶ Chaimi Pedroca: –Ñucaca cullquita curita mana charinichu. Chaipaj randica ñuca imata charishcatami cuni: Nazaretmanta Jesucristopaj shutipi jatarishpa, puri– nirca.

⁷ Chaimi alli maquimanta japishpa jatarichinca, chai runapaj chaqui mucucunaca sinchiyarijpi,

⁸ saltashpa, shayarishpa puri callarirca. Chaimantaca paicunahuanmi Taita Diospaj huasimanca purishpa, saltashpa, Taita Diosta alabashpa yaicurca.

⁹ Paitaca tucuicunami puricujta, Taita Diosta alabacujta ricurcacuna.

¹⁰ Chai suchu runataca, Taita Diospaj huasi Sumaj nishca pungupi, mañashpa tiyaj cashcatami rijsircacuna. Chaimantami ima shinashi chashnaca tucurca nishpa, yallitaj mancharircacuna.

Pedroca caihuanca ishqui cutin huillashcami

¹¹ Pedroca, Juandij Salomonpaj corredorpi shayacujpimi, suchu cashcata alliyachishca runaca paicunapi charirishca shayacurca. Chaita ricushpaca tucuicuna achcata mancharinacushpami paicuna shayacunman tandanacurcacuna.

¹² Chaita ricushpami Pedroca: “Israelcuna, ¿ima nishpataj mancharishca canguichij? ¿ima nishpataj ñucanchijta ricuracunguichij? ¿Ñucanchij imatapish rurai tucuj cashcamanta, Taita Diosta cazuj cashcallamanta alliyachishcatachu yuyanguichij?

¹³ Ñucanchij ñaupa yaya Abrahampaj, Isaacpaj, Jacobpaj Taita Diosmi paipaj Churi Jesucristota jatunyachirca. Paitami cancunaca Pilatopajman pusharcanguichij. Pilato cacharisha nijpipish, paipaj ñaupajpimi ama cacharichu nircanguichij.

¹⁴ Cancunaca ima Jucha Illaj, Cashcata Rurajtaraj mana cacharichishpami, huañuchij runataraj cacharichun mañarcanguichij.

¹⁵ Ashtahuanpish cancunaca Causaita Cujtarajmi huañuchircanguichij. Paitami Taita Diosca, huañushcacunapaj chaupimanta causachirca. Ñucanchijca chaita ricushcata huillajcunami canchij.

¹⁶ Ñucanchijca cai runataca Jesús alliyachinatami crircanchij. Chaita crijpi Jesús alliyachijpimi, cancuna rijsishca cunan ricucun runaca tucui cancunapaj ñaupajpi allitaj alliyachishca shayacujta cancunallataj ricucunguichij.

¹⁷ Caipi caj tucui huauquicuna, cancunapish, cancunapaj mandajcunapish imata ruracushcata mana yachashpa Jesusta huañuchishcatami yachani.

¹⁸ “Cristoca jatun llaquita apangami” nishpa profetacunata ñaupaman pai huillashcatami Taita Diosca pajtachishca.

¹⁹ Chaimanta cancunapaj juchacunata p'ichachunca, mana allita ruracushcata saquishpa paipajlla tucuichij. Chaimi Jatun Diosca cushicushpa causana punllacunata cunga.

²⁰ Ñaupaman cachasha nishpa huillachishca Jesucristota cachashpami Taita Diosca chashnaca ruranga.

²¹ Jesusca tucuita mushujyachina punllacuna chayamungacamami, jahua pachapi canga. Chashna tucunataca Taita Diosca paipaj jucha illaj profetacunatami ñaupaman huillachishca.

²² Chaimi Moisespish ñucanchij ñaupa yayacunamanca cashna nishca: “Cancunapaj Mandaj Jatun Diosca, ñucata cachashca shinallatajmi cancunapuramanta shuj profetata cachanga. Tucui pai ima nishcata cazunguichij.

²³ Chai profeta yachachishcata maijanpish mana uyajpica, Taita Diospajlla cajcunapuramanta llujshichishcami canga” ninmi.

²⁴ Samuelmanta callarishpami profetacunaca tucuicuna cai punllacuna imalla tucuna cashcataca ña huillarcacuna.

²⁵ Cancunaca profetacunapaj huahuacuna, ñucanchij yayacunaman Taita Dios cushami nishpa ari nishcata japijcunami canguichij. Chashna cana cajpimi Taita Diosca Abrahamtaca: “Cambaj huahua huahuamantami cai pachapi causajcunaca tucuicuna allicunata chasquingacuna” nishca.

²⁶ Taita Diosca paipaj Churita causachishpaca, cancunaman allicunata cuchunmi cancunapajmanraj cacharca. Cancunataca cada quiquinta millaita ruracushcata saquichingapajmi chashna cacharca” nircami.