Hechos 2 - Dios Rimashca Shimicunami

Taita Diospaj jucha illaj Espíritu shamushcami

¹ Pentecostés punlla chayamujpica, Jesusta catijcunaca tucuicuna tandanacushpa shuj yuyaillami carca.

² Paicuna chashna tandancushca cajpica, ñapish shuj jatun huaira huajiashpa p'ucuj shina jahua pachamanta shamushpami paicuna tiyacun huasipi jundarca.

³ Chaica nina lunyacuj shina ricurishpami, c'allucunatajlla asha asha p'itirishpa chaipi tiyacujcunapaj jahuapi tiyarirca.

⁴ Chaimantaca tucuicunami jucha illaj Espirituhuan junda tucurcacuna. Espíritu rimachishca shinallatajmi, shujtaj rimaicunapi rimai callarircacuna.

⁵ Tucui llajtacunapi causacushca judiocunami chai punllapica Jerusalenman shamushpa chaipi causacurcacuna. Paicunaca Taita Diosta yuyarijcunami carcacuna.

⁶ Chai huajiashcata uyashpaca, chai tucuicunami tandanacumurcacuna. Paicunaca paicunapaj quiquin rimaipi rimacujta uyashpami musparircacuna.

⁷ Musparinacushpa mancharishpami cashna nircacuna: –Riquichij, ¿manachu tucui cai rimacujcunaca galileocunalla?

⁸ ¿Ima shinataj ñucanchij huacharimanta pacha rimashca rimaipi rimacujta uyanchijchu imamí?

⁹ Ñucanchijca ch'ican ch'ican cai llajtacunamantami canchij. Partomanta, Medomanta, Elammanta, Mesopotamiamanta, Judeamanta, Capadociamanta Pontomanta, Asiamanta,

¹⁰ Frigiamanta, Panfiliamanta, Egiptomantami canchij. Shinallataj Cirenemanta chainijman caj África llajtapi caj llajtacunamantapish, Romamantapishmi caipi causacunchij. Huaquincunaca judiocunataj, huaquincunaca judio tucushcacunami canchij.

¹¹ Cretamanta, Arabiamantapishmi caipi canchij. Tucuicunami Taita Dios chai tucui allita rurashcataca, ñucanchij quiquin rimaipi uyanchij– ninacurcacunami.

¹² Chashna tucuicuna musparishpa mancharishpami imapaj chashna cashcata mana entendishpa caishuj chaishuj: –¿Imatashi caica nisha nin?– ninacurcacuna.

¹³ Ashtahuanpish shujtajcunaca: –Llullu vinohuanmari machashcacuna– nishpami asircacuna.

Pedro punta huillai callarishcami

¹⁴ Chaipimi Pedroca, chunga shuj apostolcunandij shayarishpaca, sinchita rimashpa cashna nirca: “Judiocuna, Jerusalenpi tucui causajcuna, tucui chaicuna imata nisha nishcata entendingapajca ñuca huillashcata alli uyapaichij.

¹⁵ Cunan iscun horas tutamantallamari, maitataj ñucanchijca cancuna yuyashca shina, machashcacunaca cashun ari.

¹⁶ Tucui caicunaca profeta Joel cashna nishcamari pajtacun:

¹⁷ “Taita Diosca cashnami nishca: Q'uipa punllacunapica, ñuca Espiritutami tucuicunapaj jahuapi tallisha. Chaipica cancunapaj churicuna, ushushicunapishmi Taita Dios huillachishcata huillangacuna. Cancunapaj q'uipa huiñaicunaca, muscuipi shinami ricungacuna. Cancunapaj yuyajcunapish muscungacunami.

¹⁸ Chai punllacunapica ñucapajta ruraj c'aricunapi, huarmicunapimi ñuca Espirituta tallisha. Chaipica ñuca huillachishcatami huillangacuna.

¹⁹ Jahua pachapica, pi mana ricushca mancharinatami ricuchisha. Cai pachapipish pi mana ricushca mancharinata rurashpami yahuarta, ninata, p'uyul cushnitapish ricuchisha.

²⁰ Intica amsayangami, lunapish yahuarmi tucunga. Jatun Dios shamuna punllapajmi chashna tucunga.

²¹ Chaipica Mandaj Jesuspaj shutipi maijanpish mañajca quishpichishcami canga” ninmi.

²² Tucui israelcuna, cai huillashcata uyaichij: Nazaretmanta Jesustami Taita Diosca pai cachashca cashcata ricuchingapaj, pi mana ricushcata rurachirca. Shinallataj pi mana ruraipajcunatapish, mancharinacunatapishmi rurachirca. Chaitaca tucui cancunallataj yachanguichijmi.

²³ Chaitaca Taita Diosca pai yachaj cashcahuanmi ima shina canata ñaupaman allichirca. Chaimantami cancunaca paitaca japishpa millai runacunapaj maquipi churashpa, chacatashpa huañuchichircanguichij.

²⁴ Chashna rurajpipish, Taita Diosmi paitaca llaqui nanai huañuimanta cacharichishpa causachirca. Chaimanta paitaca, huañuica mana imata ashtahuan rurai tucunchu.

²⁵ Davidpish Jesusmantaca cashnami nin: “Jatun Diostaca ñuca c'uchupimi punllanta ricurcani. Ñuca alli ladopi cajpimi, ñucaca imata mana manchani. Ñucata ama pi manchachichunca paica ñuca alli ladopimi.

²⁶ Chaimanta ñuca shunguca cushicurcami. Ñuca c'alluhuanpish cushicushpami cantani. Ñuca aichapish Taita Diospi shunguta churashpami samarin.

²⁷ Ñuca almataca Hadespi mana saquinguichu. Jucha illaj cambaj runataca ismuchun mana saquinguichu.

²⁸ Huiñai causaiman chayachij ñantapish canmi rijsichircangui. Can ñucahuan cashcamantami, yallitaj cushicuni” ninmi.

²⁹ Huauquicuna, callari yaya Davidmantaca mana manchashpami huillai tucuni. Paica huañurcami, pambashcami carca. Paita maipi pambashcatapish cunancama yachanchijmi.

³⁰ Davidca profetami carca. Chaimantami paitaca Taita Diosca cambaj huahua huahuamantami Quishpichij Cristoca shamushpa, can mandashpa tiyarinapi tiyaringa nirca. Taita Diosca pai rurasha nishcataca pajtachinataj cashcataca Davidca yacharcami.

³¹ Davidca Cristo causarina cashcataca ñaupaman ricushca shina cashpami paipaj almataca, Hadespi mana saquingachu, paipaj aichatapish ismuchun mana saquingachu nishpa huillarca.

³² Chai Jesustami Taita Diosca causachirca. Chaitami ñucanchijca tucui ricushcata huillajcuna canchij.

³³ Paitami Taita Diosca jatun canapi churashpa, paipaj alli ladoman tiyachirca. Chaimantami Taita Diosca pai cusha nishca jucha illaj Espirituta Jesusman cujpi, paica ñucanchijman cun. Chaitami cunan cancunaca ricucunguichij, uyacunguichij.

³⁴ Mana Davidchu jahua pachamanca chashna tucushpa rirca. Paillatajmi cashna nin: “Jatun Diosca ñucata Mandajtaca cashnami nirca: Canca ñuca alli ladoman tiyari.

³⁵ Canta p'iñajcunata cambaj chaqui sarunapi ñuca churangacama” ninmi nishcami.

³⁶ Tucui israelcunami caitaca allitaj yachana canguichij. Chai cancuna chacatashca Jesusllatatajmi Mandaj cachunpish, Quishpichij Cristo cachunpish Taita Diosca churarca” nircami.

³⁷ Chaita uyashpaca, shungumanta llaquirishpami Pedrotapish, caishuj apostolcunatapish: –Huauquicuna, ¿imatataj rurana canchij?– nijpi,

³⁸ Pedroca: –Taita Diosman cutirichij, cancunapaj juchacunata perdonachun Taita Dios cusha nishca jucha illaj Espirituta chasquingapaj Jesucristopaj shutipi bautizarichij.

³⁹ Taita Dios cusha nishcaca cancunapajpish, cancunapaj huahuacunapajpish, tucui cai pachapi cajcunata ñucanchij Jatun Dios maijanllata quishpichisha nishcacunapajpishmi– nircami.

⁴⁰ Pedroca ashtahuan shujtaj shimicunahuan cunashpa yuyachishpaca: –Cai punllapi causacuj millaicunahuan, ama llaquichishca cangapajca llujshimuichij– nircami.

⁴¹ Chai huillashcata cazujcunaca bautizarircacunami. Chai punllaca, quimsa huaranga shinami mirarishpa caishuj crijcunahuan tandanacurcacuna.

⁴² Paicunaca apostolcuna yachachishcata yachana yuyailla yachashpami catircacuna. Caishujhuan, chaishujhuanpish shuj shinallami carcacuna. Jesús huañushcata yuyarishpa tandata chaupishpa micunapipish, Taita Diosta mañanapipish tucuicuna shuj shinallami catircacuna.

Punta crijcunapaj causaimi

⁴³ Apostolcunaca mancharinacunata, pi mana ruraipajcunatapish achcatami rurarcacuna. Chaimantami tucuicunaman achca manchai shamurca.

⁴⁴ Tucui crijcunami shuj yuyailla carcacuna. Paicuna tucui ima charinacunapish tucuicunapajmi carca.

⁴⁵ Paicunapaj allpacunatapish, ima charishcacunatapish c'aturcacunami. Chai cullquitaca, caishuj chaishujmanmi imalla illashcapaj chaupircacuna.

⁴⁶ Taita Diospaj huasipipish, punllantami shuj yuyailla tandanacurcacuna. Jesús huañushcata yuyarishpa tandata micunatapish paicunapaj huasicunapipish micurcacunami. Chaitaca tucuicuna cushicushpa alli shunguhuanmi micurcacuna.

⁴⁷ Taita Diosta chashna alabajpi chaita ricujcunaca tucuicunami paicunahuanca alli carca. Mandaj Jesusca pai quishpichina cashcacunataca quishpichishpa punllantami tandanacushca crijcunahuan mirachirca.