Hechos 16 - Dios Rimashca Shimicunami

Pablohuan Silashuan Timoteo rishcami

¹ Chai q'uipami Pabloca Silasndij Derbe puebloman, Listra puebloman chayarcacuna. Chaipica Jesusta catij Timoteo shuti runami causarca. Paica, Jesusta catij judía huarmipaj churimi carca. Paipaj yayaca griegomi carca.

² Listrapi, Iconiopi, caj tandanacushca crijcunaca Timoteotaca alli causajmi nircacunami.

³ Pabloca paitami, paihuan richun munarca. Paipaj yaya griego cashcataca, tucui chaipi causaj judiocuna yachashcamantami, paicuna ama juchachichun nishpa Timoteotaca circuncisionta rurachirca.

⁴ Chaimanta rishpaca apostolcunahuan, cunaj yuyajcunahuan tucushpa crijcuna imallata rurana cashcata, cazuna cashcata Jerusalenpi yuyarinacushcatami, tucui pueblocunapi cushpa huillashpa rircacuna.

⁵ Tandanacushca crijcunaca ashtahuan sinchi crijcuna tucurca. Crijcunapish punllantami ashtahuan mirarircacuna.

Macedonia runata muscuipi shina Pablo ricushcami

⁶ Chaimanta paicuna rishpaca, Asia llajtapi Taita Diospaj Shimita huillashun nijpimi, jucha illaj Espirituca huillachun mana saquirca. Chaimantami Frigia, Galacia llajtacunata pasashpa,

⁷ Misia llajtaman chayashpaca Bitinia llajtaman yaicunata yuyarcacuna. Chaiman yaicuchunpish Espirituca mana saquircachu.

⁸ Chaimantaca Misia llajtallatataj rishpami, jatun yacu c'uchupi caj Troas puebloman chayarcacuna.

⁹ Chai tutami Pabloca: “Macedoniamanta shuj runa shamushpa, ñucanchij llajtaman shamushpa ñucanchijta yachachipai” nishpa paipaj ñaupajpi shayarishpa rogacujta muscuipi shina ricurca.

¹⁰ Muscuipi shina ricushcata Pablo huillajpimi: “Taita Diosmi ñucanchijtaca Macedoniapi alli huillaita huillachun cayashca” nishpami, chaiman rina yuyailla tucurcanchij.

Pablotapish Silastapish Filipos pueblo carcelpi churashcami

¹¹ Troasmantaca shuj barcopi huichiyashpami, yacu chaupipi caj Samotraciaman chayajta rircanchij. Cayandij punllaca, Neapolismanmi chayarcanchij.

¹² Chaimantaca, Macedoniapi caj tucuita yalli jatun Filipos pueblomanmi rircanchij. Chai puebloca, Roma llajtamanta shamushcacunapaj pueblomi carca. Chaipimi asha punllacunata saquirircanchij.

¹³ Chaipi cashpami samana punlla chayamujpica, pueblomanta llujshishpa jatun yacu uriman rircanchij. Chaipica Taita Diosta mañangapaj tandanacunami cashca carca. Ñucanchijpish chaipi tandanacuj caj huarmicuna tandanacushcapimi tiyarishpa huillarcanchij.

¹⁴ Chai huarmicunapurapica Tiatira pueblomanta Lidia shuti huarmimi ñucanchij huillashcataca uyacurca. Paica Taita Diosta adoraj, morado sumaj linsocunatapish c'atujmi carca. Pablo huillashcata chasquichunmi Mandaj Jesusca chai huarmipaj shunguta pascarca.

¹⁵ Chaimi paipaj tucui familiandij bautizarishpa ñucanchijtaca: –Cancuna ñucata ña Mandaj Jesusta crijtaj cashcata ricushpaca, jacuchij ñuca huasipi pozanguichij– nishpaca saquichircatajmi.

¹⁶ Taita Diosta mañanaman shuj punlla ñucanchij ricujpica, adivinachij supai japishca huarmi huambrami ñucanchijhuan tupanaman llujshirca. Chai huambraca chashna cashpa adivinajpimi paipaj amocunaca achca cullquita japijcuna carca.

¹⁷ Chai huambraca Pablotapish, ñucanchijtapish: –¡Cai runacunaca jahua pachapi caj Taita Diospajta rurajcunamari! Paicunaca ima shina quishpirina cashcata cancunaman huillajcunami– nishpami caparishpa caticujlla carca.

¹⁸ Achca punllacunata chashna nishpa ñucanchijta caticujllapimi, Pabloca mana uyanachishpa chai espiritutaca: –Jesucristopaj shutipimi, chai huambramanta llujshi nini– nincami chai huambramantaca llujshirca.

¹⁹ Chai huambrapaj amocunaca, cullquita japina tucurishcata ricushpami, Pablota Silasta japishpa jatun plazapi caj mandajcunapaj ñaupajman aparcacuna.

²⁰ Chai mandajcunapaj ñaupajman pushashpaca: –Cai judío runacunaca ñucanchij pueblopimi mana allita yachachishpa puricuncuna.

²¹ Ñucanchijca romanocunami canchij. Paicunaca ñucanchij manapish chasquipaj, manapish rurai tucuipaj mandashcacunatami yachachicuncuna– nircacunami.

²² Chaita uyashpaca, tucui chaipi cajcunami Pablota Silasta llaquichingapaj jatarircacuna. Mandajcunapish: –Cai runacunataca lluchullata rurashpa caspicunahuan macaichij– nircacunami.

²³ Achcata macachishca q'uipaca, carcelpi churashpami carcelta cuidajtaca alli alli cuidangui nishpa mandarcacuna.

²⁴ Chaita uyashpaca, ashtahuan ucu c'uchuman churashpami, paicunapaj chaquicunataca tablacunata jutcushcapi alli canichishpa churarca.

²⁵ Ashtahuanpish Pabloca Silasndijmi chaupi tutataca Taita Diosta mañashpa cantacurcacuna. Chaipi caj shujtaj prezucunapish chaitaca uyacurcacunami.

²⁶ Chashna mañashpa cantacujpica, ñapish jatun allpa chujchui shamurcallami. Chaimi cárcel shayacun pamba cuyurijpica, tucui pungucunapish pascarirca. Prezucunata huatashca cadenacunapish tucuicunapajmi cacharirirca.

²⁷ Carcelta cuidaj rijcharishpaca, cárcel pungucuna pascarishcata ricushpami, tucui prezucunami llujshishpa rishca canga yuyashpa paipaj espadallatataj llujshichishpa huañuchirigrirca.

²⁸ Chaimi Pabloca: –¡Ama llaquichirichu, tucuicunami caipi canchij!– nishpa sinchita caparirca.

²⁹ Chaita uyashpami, carcelta cuidajca ninata mañashpa ucu c'uchuman yaicujta rishpa, manchaihuan chujchucuj Pablopaj Silaspaj chaquiman tupajta cumurirca.

³⁰ Chaimanta paicunata canllaman llujshichishpaca: –Riqui, amocuna. Ñuca quishpiringapajca ¿imatataj rurana cani?– nijpimi,

³¹ paicunaca: –Mandaj Jesucristota cri. Canpish, cambaj tucui huasi ucu familiapish chashna rurashpaca quishpiringuichijmi– nircacuna.

³² Chaimi carcelta cuidajmanpish, paipaj huasi ucu familiamanpish Jatun Diospaj Shimimanta huillarcacuna.

³³ Chai tutallataj carcelta cuidajca tuta cajpipish Pablopaj Silaspaj chugricunata maillashca qu'ipaca tucui paipaj huasi ucu familiandijmi bautizarircacuna.

³⁴ Bautizarishca q'uipaca, paipaj huasiman pushashpami micunata cararca. Chaipimi paipish, paipaj tucui huasi ucu familiapish Taita Diosta crishcamanta yallitaj cushicurcacuna.

³⁵ Ña pacarijpimi mandajcunaca: –Chai runacunataca cacharishpa cachaichijlla– nichun soldadocunata carcelta cuidajpaman cacharcacuna.

³⁶ Chaimi carcelta cuidajca, Pablomanca: –Mandajcunaca cancunataca cacharishpa cachachunlla nishpami ñucataca mandashca nishpa yachaj chayachishpaca, cunanca llujshishpa imata mana manchashpa richijlla– nirca.

³⁷ Chaimi Pabloca soldadocunataca: –Ñucanchijtaca romanocuna cajpipish manaraj imata tapushpami tucuicunapaj ñaupajpi macachishpa, carcelpi churarcacuna. ¿Chai jahuachu, cunanca pacalla cacharishun nincuna? Mana rishunchu. Paicunallataj llujshichij shamuchun– nircami.

³⁸ Chashna nishcata soldadocuna mandajcunaman yachaj chayachijpica, paicunaca romanocuna cashcata uyashpami, achcata mancharircacuna.

³⁹ Mandajcuna shamushpaca: –Ñucanchijca cancuna romanocuna cashcataca mana yachashcanchijchu. Cunanca cai pueblomanta llujshishpa ripaichijlla– nircacuna.

⁴⁰ Carcelmanta llujshishpaca, Lidiapaj huasimanmi rircacuna. Chaipi caj crijcunata alli catinguichij nishpa cushichishpaca rircallacunami.