Hechos 15 - Dios Rimashca Shimicunami

Mandajcunapuralla Jerusalenpi tandanacushca cashcami

¹ Chai punllacunallatajmi Judeamanta maijan shamujcunaca Jesusta caticujcunataca: “Moisés mandashca shina circuncisionta mana rurachishpaca, mana quishpiri tucunguichijchu” nishpa yachachircacuna.

² Chaimi Pabloca Bernabendij chai yachachijcunahuan rimanacushpa, jatunta p'iñarinacurcacuna. Mana allichipaj cajpimi, apostolcunahuan, cunaj yuyajcunahuan parlanacushpa allichichun Pablotapish Bernabetapish caishuj crijcunandij Jerusalenman cachanata yuyarircacuna.

³ Tandanacushca crijcuna paicunata cachajpimi, Feniciata, Samariata pasacushpaca, mana judiocunapish ñaupa causaita saquishpa Jesusta crishcata parlashpa rircacuna. Chaita uyashpaca Jesusta caticujcunaca achcatami cushicurcacuna.

⁴ Jerusalenman chayajpica, tandanacushca crijcunapish, apostolcunapish, cunaj yuyajcunapish allimi chasquircacuna. Pablopish Bernabepish Taita Dios paicunata imallata rurachishcatami parlarcacuna.

⁵ Chaimi fariseocunapuramanta maijan crijcuna shayarishpaca: –Chai mana judiocunapish crij tucujpica circuncisionta rurachinatajmi, Moisés mandashcatapish cazuchun mandanami– nircacuna.

⁶ Chaita uyashpaca apostolcunapish, cunaj yuyajcunapish alli yuyarinacungapajmi tandanacurcacuna.

⁷ Chaipi tandanacushpa ña achcata rimanacushca q'uipami, Pedro shayarishpaca cashna nirca: –Huauquicuna, mana judiocunapish alli huillaita ñuca huillajpi crijpi quishpichingapajmi taita Diosca sarunman ñucataca agllarca. Chaitaca cancunallataj yachanguichijmi.

⁸ Tucuicunapaj shunguta rijsij Taita Diosca mana judiocunatapish chasquishcata ricuchingapajmi, paicunamanpish ñucanchijman shinallataj jucha illaj Espirituta curca.

⁹ Jesusta crishcallamanta paicunapaj juchacunata perdonashpami ñucanchijtapish paicunatapish chai shinallataj Quishpichij cashcata Taita Diosca ricuchirca.

¹⁰ Chaimanta cunanca ñucanchij ñaupa yayacunapish, ñucanchijpish mana pajtachi tucushcataca cunanlla crijcunatapish rurachun nishpaca, Taita Diostami p'iñachicunguichij.

¹¹ Ñucanchijtaca Mandaj Jesusca mana c'uyaipaj cajpipish crijllapimi quishpichirca. Paicunatapish chashnallataj crijllapimi quishpichin– nircami.

¹² Chaita uyashpa chaipi caj achcacuna upallashpaca Bernabepish, Pablopish imalla parlashcatami uyarcacuna. Paicunaca pi mana ruraipajcunatapish, mancharinacunatapish mana judiocunapaj ñaupajpi paicunata Taita Dios rurachishcatami parlarcacuna.

¹³ Paicuna ña tucui parlajpica, Jacobomi cashna nirca: –Huauquicuna, ñucata uyapaichij.

¹⁴ Simonllataj mana judiocunata Taita Dios ima shina agllai callarishcata, paicuna Taita Diospaj huahuacuna tucushcatapish ñami ñucanchijman parlan.

¹⁵ Profetacunata Taita Dios Quillcachishpa huillashca shinami tucushca. Chaipica:

¹⁶ “Chai q'uipa tigramushpaca Davidpaj carpa huasi urmashcataca, cutinmi shayachisha. Urmashcatapish allichishpa cutin shayachishami.

¹⁷ Chashna rurajpimi tucui saquirishcacunapish, ñuca agllashca mana judiocunapish Jatun Diostaca mashcangacuna.

¹⁸ Ñaupa huatacunamantapacha tucuita huillachij Jatun Diosmi chashna” nin.

¹⁹ Chaimanta ñuca yuyaipica, mana judiocunapish ñaupa causaita saquishpa Jesusta crijpica ima chaicunata nishpa mana p'iñachinachu canchij.

²⁰ Chashna ninapaj randica paicunamanca: “Rurashcalla dioscunaman ima cushcatapish ama micunguichij, ama huainayanguichij, sipishpalla huañuchishca aichatapish, ima yahuartapish ama micunguichij” nishpa quillcashpa cachashunchij ninimi.

²¹ Ñaupa yayacuna causai punllacunamantami tucui pueblocunapi caj sinagogacunapica samana punllacunapi Moisés mandashcata rezashpa huillajcunaca tiyan– nircami.

²² Chashna nishcaca apostolcunapaj, cunaj yuyajcunapaj, tandanacushca tucui crijcunapaj yuyaipipish allimi carca. Chaimantami crijcuna alli nishca Barsabás nishca Judasta, Silastapish Pablohuan, Bernabehuan Antioquiaman richun agllarcacuna.

²³ Paicunamanca: “Apostolcunapish, cunaj yuyajcunapish, Jesusta caticuj tucuicunapishmi Antioquia pueblopi, Siria llajtapi, Cilicia llajtapi caj mana judiocuna cashpapish Jesusta caticujcunataca allillachu canguichij nishpa quillcashpa cacharcacuna.

²⁴ Ñucanchijpuramanta maijancunami cancunapajman rishcata uyanchij. Paicunami cancunataca circuncisionta ruranami canguichij, Moisés mandashcatapish cazunami canguichij nishpa muspachishcacuna. Paicunataca mana ñucanchijchu cacharcanchij.

²⁵ Chaimantami tucuicuna shuj yuyailla tucushpa, ñucanchijpuramanta huauquicunata agllashpa cachana alli yuyachijpi, paicunataca ñucanchij c'uyashca Bernabehuan, Pablohuan cachanchij.

²⁶ Bernabehuan Pablohuanca huañuna causana cashpapish ñucanchijta Mandaj Jesucristomantaca huillarcallacunami.

²⁷ Tucui caicunataca Judaspish, Silaspish paicunapaj quiquin shimihuantajpish ima shina cashcatatajmi cancunamanca huillanga.

²⁸ Jucha illaj Espiritupish yuyachijpi, ñucanchij yuyaipipish chashna rurana alli cajpimi, cancunataca cai mandashcacunamanta ashtahuan shujtaj mana ruranata podipajcunataca mana rurachun mandashun ninchij. Ashtahuanpish cancuna yachaipajcunallatami nishun ninchij:

²⁹ Rurashcalla dioscunaman cushcata ama micunguichij, yahuartapish, sipishpalla huañuchishca aichatapish ama micunguichij, ama huainayanguichij. Caicunata cazushpaca, allitamari ruranguichij. Allilla cashca canguichij” nishpami quillcarcacuna.

³⁰ Chai cachashcacuna Antioquiaman chayashpaca, chaipi causaj tucui crijcunata tandachishpami chai quillcataca curcacuna.

³¹ Chaita rezajpi uyashpaca, paicunata cunashpa quillcashcamantami achcata cushicurcacuna.

³² Judaspish, Silaspish profetacunami carca. Chaimantami paicunapish Jesusta caticujcunataca sumaj shimicunahuan cushichishpa ashtahuan catina yuyaita curcacuna.

³³ Tauca punllacunata chaipi cashca q'uipami, paicunata cachajcunapajman tigrana tucurcacuna. Chaimi Antioquiapi caj tandanacushca crijcunaca sumajta cayacamachij ninacushpa cacharcacuna.

³⁴ Silasca chaipi saquirinatami yuyarirca.

³⁵ Pablohuan Bernabehuanca shujtajcunandij tucushpami Antioquiallapitaj Jatun Diospaj Shimita ashtahuan yachachishpa, alli huillaitapish huillashpa catircacuna.

³⁶ Tauca punllacunata chaipi cashca q'uipami Pabloca, Bernabetaca: –Sarunman mai pueblollapi Jatun Diospaj shimita huillajpi crishcacuna ima shina caticujta jacu ricumushun– nirca.

³⁷ Chaimi Bernabeca, Marcos nishca Juantapish paicunahuan pushashun nirca.

³⁸ Sarunman huillashpa puricujpimi, Juan Marcosca paicuna maillata huillagrina cashcata manaraj tucuchishpa Panfilia llajtapi saquishpa tigramushca carca. Chaimi Pabloca paitaca mana pushasha nirca.

³⁹ Chaimanta mana shuj yuyailla tucushpami, caishujmanta chaishujmanta ch'icanyarishpa Bernabeca, Marcosta pushashpa barcopi huichiyashpa Chipre llajtaman rirca.

⁴⁰ Pabloca Silasta agllashpa rigrijpimi, Antioquiapi caj tandanacushca crijcunaca Jatun Dios mana c'uyaipajta c'uyaihuan alli pushachun nishpa Taita Diosman mingarcacuna.

⁴¹ Paicuna rishpaca Siriapi, Ciliciapi caj tandanacushca crijcunataca ashtahuan alli catina yuyaita cushpami rircacuna.