Hechos 14 - Dios Rimashca Shimicunami

Iconio pueblopi huillashcami

¹ Iconio puebloman chayashpaca judiocunapaj sinagogamanmi Pablondij Bernabendij yaicurcacuna. Chaipica ima shina huillaj cashca shinallataj Taita Diospaj Shimita huillajpimi judiocunapish, griegocunapish achcacuna crircacuna.

² Ashtahuanpish paicuna huillashcata mana crisha nij judiocunaca, mana judiocunatami Jesusta catijcunata p'iñana yuyaita cushpa yachachircacuna.

³ Shina cajpipish paicunaca Mandaj Jesuspi shunguta churashpami, mana manchashpa chai llajtapi huillashpa unicama saquirircacuna. Taita Diosca mana c'uyaipajta c'uyajmi nishpa huillajpimi, pi mana rurai tucuipajta, mancharinacunata rurachishpa Jesusca paicunata alli nicushcataca ricuchirca.

⁴ Chai pueblopi causajcunaca chaupirinacushpami, shujcunaca judiocunapura, caishujcunaca apostolcunapura tucurcacuna.

⁵ Chashna tucushpami judiocunapish, mana judiocunapish paicunata mandajcunahuan tandanacushpa, llaquichingapaj rumicunahuan shitangapaj jatarircacuna.

⁶ Paicunaca chaita yachashpami, Licaonia llajtapi caj Listra puebloman, Derbe puebloman, chai muyundij llajtacunamanpish rishpa miticugrishpaca,

⁷ chai llajtacunapimi alli huillaitaca huillarcacuna.

Listra pueblopi Pablota rumicunahuan shitashcami

⁸ Listra pueblopica shuj runami huachari pachamanta manataj purij, suchu runa tiyarca.

⁹ Paica, Pablo huillashcatami uyaracurca. Pabloca, paipaj ñahuita ricushpaca, alliyachishca cana cashcata cricujta ricushpami,

¹⁰ chai runataca: –¡Jatarishpa, alli shayari!– nishpa sinchita rimajpica chai runaca saltashpa purircallami.

¹¹ Pablo chaita rurajta gentecuna ricushpaca, Licaonia rimaipimi: “¡Dioscunamari runacunaman rijchaj tucushpa ñucanchijpajman uriyamushcacuna!” nishpami sinchita caparircacuna.

¹² Chaimantami Bernabetaca, Júpiter diosmi nircacuna. Pablotaca huillaj cashcamanta, Mercurio diosmi nircacuna.

¹³ Chai puebloman yaicuna pungupica, Júpiter diospaj huasimi tiyarca. Chai huasipi caj curami achcacunahuan tandanacushpa huagracunata, sisacunatapish chai huasi punguman apamushpa Pabloman Bernabeman sacrificiota cushun nircacuna.

¹⁴ Chaita uyashpami apóstol Pablopish Bernabepish llaquirishcata ricuchishpa paicunapaj churanacunata lliquirishpa, chai tucuicunapaj chaupiman caparirishpa yaicushpaca,

¹⁵ cashna nircacuna: –Riquichij, ¿ima nishpataj chashnaca ruracunguichij? Ñucanchijpish cancuna shinallataj runacunallami canchij. Ñucanchijca cancuna cashna llaqui causacushcata saquishpa causaj Taita Diospajman cutirichun, alli huillaita huillajcunami canchij. Paica jahua pachata, cai pachata, mama cuchata, tucui ima tiyajcunatapish ruraj Taita Diosmi.

¹⁶ Taita Diosca ñaupa huatacunaca, tucuicuna paicuna munashca ñancunapi purichunmi saquishca.

¹⁷ Chashna causacujpipish Taita Diosca tamyata cachashpa granocuna p'ucuna punllapitaj p'ucuchishpami ñucanchijmanca mana nijta carashpa cushichin. Chashnami pai alli cashcataca ricuchin– nircacunami.

¹⁸ Chashna rimacushpallami, paicunaman sacrificiota cushun nishpa huaicacujcunataca jarcarcacuna.

¹⁹ Chai q'uipami Antioquia pueblomanta, Iconio pueblomanta maijan judiocuna shamushpaca, chai tucuicunata jatarichircacuna. Chaimantami Pablotaca rumicunahuan shitashpa, ñami huañun yuyashpaca, pueblomanta canllaman sirijta aisarcacuna.

²⁰ Chaipica Jesusta catijcuna, paipaj muyundijpi shayarijpimi jatarishpa chai pueblollamantaj cutin yaicurca. Cayandij punllaca Bernabendijmi, Derbe puebloman rircacuna.

²¹ Chai pueblopipish alli huillaita huillajpimi, achcacuna Jesusta catijcuna tucurcacuna. Chai q'uipaca, Listraman, Iconioman, Antioquiamanmi tigrarcacuna.

²² Chai pueblocunapica, Jesusta catijcunamanca Pablohuan, Bernabehuanca ashtahuan catina yuyaita cushpami, cashna shina llaquicunata apashpami: “Taita Dios mandacujpica, chaiman yaicushun” nishpami allitaj yachachircacuna.

²³ Tandanacushca crijcuna tiyanpica, tucuipimi cunaj yuyajcunata churarcacuna. Ayunashpa, Taita Diosta mañashca q'uipaca paicunataca paicuna crishca Mandaj Jesusmanmi mingarcacuna.

Siria llajtapi caj Antioquiaman tigrashcami

²⁴ Chaicunapi chashna churashpaca Pisidiata pasashpami, Panfiliaman shamurcacuna.

²⁵ Pergepi Taita Diospaj Shimita huillashca q'uipami, Ataliaman rircacuna

²⁶ Taita Dios huillachun nishcata pajtachishpaca, tandanacushca crijcuna paicunata Taita Diospaj maquipi mingashpa cachaj Antioquiallamantajmi barcopi tigrarcacuna.

²⁷ Chaiman chayashpaca, tandanacushca crijcunata tandachishpami, Taita Diosca jatun allicunata paicunahuan rurashcata, mana judiocuna crichun punguta pascaj shina paicunapaj yuyaita pascashcatapish parlarcacuna.

²⁸ Jesusta catij chaipi cajcunahuanca achca punllacunatami carcacuna.