Hechos 13 - Dios Rimashca Shimicunami

¹ Antioquiapi caj tandanacushca crijcunapica profetacuna, yachachijcunami tiyarca. Paicunaca: Bernabé, Níger nishca Simón, Cirene pueblomanta Lucio, mandaj Herodeshuan ishqui huiñaj Manaén, Saulopishmi carca.

² Shuj punlla paicuna ayunashpa Jatun Diosta mañacujpimi, jucha illaj Espirituca: “Bernabeta Saulotaca ñucapajta ruraj cachunmi ña cayarcani. Chaimanta paicunataca ñucapajta ruranata callarichun ch'icanchichij” nirca.

³ Ayunashpa Taita Diosta mañashca q'uipaca, paicunapaj jahuapi maquita churashpa alli ringuichij nishpami cacharcacuna.

Chiprepi huillashcami

⁴ Paicunaca jucha illaj Espíritu cachajpimi, Seleucia puebloman rircacuna. Chaimantami Chipremanca barcopi rircacuna.

⁵ Salamina puebloman chayashpaca, judiocunapaj sinagogacunapimi Taita Diospaj Shimita huillarcacuna. Juanpish paicunata ayudashpami puricurca.

⁶ Chai tucui llajtapi huillashpa puricushpaca, Pafos pueblomanmi chayarcacuna. Chaipica Barjesús shuti judío yumbuhuanmi tuparcacuna. Paica Taita Dios cachashca profetami cani nishpa llullaj runallami carca.

⁷ Chai yumboca jatun mandajpaj randi Chipre llajtata mandaj Sergio Paulohuanmi alli apanacuj carca. Chai mandajca alli yachaj cashpami Bernabetapish, Saulotapish Taita Diospaj Shimita huillashcata uyangapaj cayaj cacharca.

⁸ Paicuna huillanaman shamujpica, ama crichun nishpami chai mandajtaca jarcarca. Chai yumbollatatajmi Elimas nijcuna carca.

⁹ Saulotapish Pablo nijcunami carca. Paica jucha illaj Espirituhuan junda cashpami, chai yumbota ricurashpaca,

¹⁰ cashna nirca: –¡Diablopaj huahua, umana yuyaillahuan junda, mana allita ruranata munaj, imatapish cashcata ruranata p'iñaj! Jatun Diospaj alli ñanmanta ladoyachinataca ¿ima nishpataj mana saquisha ningui?

¹¹ Cunanca Jatun Dios paipaj tucuita rurai tucuj maquihuan llaquichijpi asha punllacama mana ricujmi saquiringui. Intitapish mana ricunguichu– nircami. Chashna nincami chai yumboca ñahui mana ricujpi amsapi saquirirca. Chaimi maijanpish pushachun nishpa paipaj muyundijta mashcarca.

¹² Chashna tucushcata jatun mandajpaj randi mandaj ricushpa, Mandaj Jesusmanta yachachishcata uyashpaca mancharishpami crirca.

Pisidiapi caj Antioquiapi huillashcami

¹³ Pabloca paihuan purijcunandij, Pafos pueblomanta barcopi huichiyashpa yacuta rishpami, Panfiliapi caj Pergeman chayarcacuna. Ashtahuanpish Juanca paicunamanta ch'icanyashpami, Jerusalenman tigrarca.

¹⁴ Pablohuan Bernabehuanca Perge pueblomanta rishpaca, Pisidiapi caj Antioquiamanmi chayarcacuna. Chaipica samana punllapimi, sinagogaman yaicushpa tiyarircacuna.

¹⁵ Chai sinagogapica mandashcacunata quillcashcatapish, profetacunaman Taita Dios Quillcachishcatapish rezashca q'uipaca, sinagogapi pushajcunami: –Huauquicuna, imallatapish caipi cajcunaman yuyachishpa rimashun nishpaca, rimapaichijlla– nichun cacharca.

¹⁶ Shina nijpi Pabloca jatarishpa maquihuan upalla caichij nishpaca: –Tucui israelcuna, Taita Diosta manchashcamanta caipi cajcunapish uyahuaichij.

¹⁷ Ñucanchij israelcunapaj Taita Diosca, ñucanchij ñaupa yayacunatami agllarca. Paicunataca Egipto llajtapica, carumanta rishcallacuna cajpipish achcatami mirachirca. Chai q'uipaca Taita Diosca tucuita rurai tucuj cashcahuanmi Egiptomantaca llujshichirca.

¹⁸ Chaimanta llujshichishpaca, chuscu chunga huatacunatami paicuna ima mana allita rurajpipish shitashca pambapica paicunataca mana shitarca.

¹⁹ Chai q'uipaca Canaanpi caj canchis llajtacunapi causajcunata chingachishpami, chai allpataca ñucanchij ñaupa yayacunaman curca.

²⁰ Chai q'uipaca chuscu patsaj pichca chunga huatacuna shinatami, juezcuna mandachun churashpa profeta Samuelpaj punllacunacama mandachirca.

²¹ Chai punllacunapimi israelcunaca shuj jatun mandajta mañarcacuna. Chaimi Taita Diosca, Benjaminpaj aillumanta Cis runapaj churi Saulta, chuscu chunga huatacunata mandachun curca.

²² Saulta pai mandacunmanta anchuchishpami, jatun mandaj cachun Davidta churarca. Paitami Taita Diosca: “Isaipaj churitami agllarcani. Paica ñuca shungu munashca shina cazujmi. Chaimanta ñuca munashcatami ruranga”.

²³ Taita Diosca pai cusha nishca shinallatajmi, Davidpaj huahua huahuamanta israelcunapaj Quishpichij cachunca Jesusta curca.

²⁴ Jesús manaraj shamujpimi, Taita Diosman cutirishpa bautizarichij nishpa, tucui israelcunaman Juanca huillarca.

²⁵ Juanca pai huillana cashcata tucuchigrishpami: “Ñucataca ¿pi cashcatataj yuyanguichij? Ñucaca mana cancuna shuyacushcachu cani. Shujmi ñucapaj q'uipa shamunga. Ñucaca paipaj pargate huatashcallatapish mana pascaipajmi cani” nirca.

²⁶ Abrahammanta mirarishca ñuca huauquicunapish, shinallataj maijanlla Taita Diosta manchajcunapish, quishpirinamanta cai huillashcaca cancunapajmi.

²⁷ Jerusalenpi causajcunapish, paicunata mandajcunapish Jesús pi cashcataca mana yacharcacunachu. Profetacuna quillcashcacunata samana punllacunapi rezashcata uyashpapish mana entendircacunachu. Chaimantami Jesusta huañuchishpaca profetacuna huillashcataca paicunallataj pajtachij tucurcacuna.

²⁸ Jesustaca imamanta mana huañuchi tucushpapish, Pilatotaca: “Jesustaca huañuchilla” nircacunami.

²⁹ Jesús ima shina tucuna cashcata Quillcashcapi nishca shina, ña tucuita pajtachishpaca caspimanta uriyachishpami, huañushcata churana jutcupi churarcacuna.

³⁰ Chashna rurajpipish Taita Diosmi, huañushcacunapaj chaupimanta paitaca causachirca.

³¹ Paita causachijpica, paica Galileamanta Jerusalenman paihuan rijcunamanmi, tauca punllacunata ricurirca. Cunanca, paicunami tucuicunaman paita ricushcata huillacuncuna.

³² Taita Diosca ñucanchij ñaupa yayacunamanca shuj Quishpichijtami cachasha nishca. Ñucanchijca chai alli huillaitami huillacunchij.

³³ Chashna cusha nishcataca ñucanchij ñaupa yayacunapaj huahua huahua ñucanchijmanmi Jesusta causachishpa pai cusha nishcataca Taita Diosca pajtachishca. Q'uipa Salmopipish: “Canca ñuca Churimi cangui. Cunanmi canmanca causaita cuni” nishpa quillcashcami tiyacun.

³⁴ Chashna nishpami Taita Diosca huañushcacunapaj chaupimanta Jesusta causachishpa, paipaj aicha mana ismuna cashcata ricuchishpaca: “Davidta llaquishpa cushatajmi nishcacunataca, cancunamanmi cusha” nishcami.

³⁵ Chaimantami shujtaj Salmopipish: “Cambaj Jucha Illaj aicha ismuchunca, mana saquinguichu” nishca.

³⁶ Davidca pai causacui punllapi causajcunataca, Taita Dios munashca shinami servirca. Pai huañushpaca paipaj ñaupa yayacunahuanmi tandanacurca. Paipaj aichaca ismurcami.

³⁷ Shina cajpipish Taita Dios causachishca Jesuspaj cuerpoca mana ismurcachu.

³⁸ Caita yachaichij huauquicuna: Cancunapaj juchacunataca ñuca cancunaman huillacushca Jesucristollamantami perdonanga.

³⁹ Moisés Mandashcata rurashcallahuanca mana justificashca cai tucurcanguichijchu. Jesucristota crijcunataca tucuicunatami, Taita Diosca justifican.

⁴⁰ Chaimanta alli yuyarichij, profetacunata Taita Dios Quillcachishcapi nishcacunaca, ñataj cancunapaj jahua canman. Chaipica cashnami nin:

⁴¹ “Uyaichij, ñuca huillashcata mana cazushpa yanganchijcuna. Mancharishpa, maipi ima tucuichij. Cancuna causacui punllacunapi, mancharinacunata ñuca rurana cashcata, maijan huillajpipish mana cringuichijchu” nishcami.

⁴² Yachachishpa judiocunapaj sinagogamanta llujshicujpica mana judiocunarajmi: “Cunan shina samana punllapipish caicunataca cutin yachachipanguichij” nircacunami.

⁴³ Tucuchishpa cayacamachij nishpa rijpica, judiocunamanta achcacunapish, judio tucushpa Taita Dios yuyailla cajcunapish, Pablota, Bernabeta catishpami rircacuna. Paicunataca Taita Diospaj mana c'uyaipajta c'uyaipi catiranguichij nishpami cunarcacuna.

⁴⁴ Chai cati samana punllapica chai pueblopi causajcunaca cazi tucuicunami, Taita Diospaj Shimita uyangapaj tandanacurcacuna.

⁴⁵ Chashna achcacuna tandanacujta judiocuna ricushpaca, huañurishpami achcata p'iñarircacuna. Chaimantami Pablo huillashcaca manapish chashnachu nishpa c'amircacuna.

⁴⁶ Chashna nicujpipish Pablohuan, Bernabehuanca mana manchashpami cashna nircacuna: –Cancunamanrajmi Taita Diospaj Shimitaca huillana carcanchij. Chashna cajpipish ñucanchij huillashcata mana uyashun nishpaca, huiñai causaitaca mana charinapaj cashcatami cancunallataj ricuchinguichij. Cunanca mana judiocunaman huillanaman rinchij.

⁴⁷ Jatun Diosca ñucanchijtaca cashnami mandarca: “Cantaca mana judiocunata luz shina achijyachichunmi churarcani. Tucui cai pachapi causajcunapish, can huillashcamanta quishpirichunmi churani” nishcami– nircami.

⁴⁸ Chashna huillashcata mana judiocuna uyashpaca, Jatun Diospaj Shimica sumajmari nishpami achcata cushicurcacuna. Chaimi huiñai causaipaj canacunaca tucuicuna crircacuna.

⁴⁹ Chashnami Jatun Diospaj Shimica, tucui chai llajtacunapi huillarcacuna.

⁵⁰ Ashtahuanpish judiocunaca Taita Dios yuyailla causangapaj judio tucushca alli nishca huarmicunata, chai pueblota mandajcunatapish, chai runacunata llaquichingapaj jatarishunchij nishpa yachachircacuna. Chashna yachachishpaca Pablotapish, Bernabetapish achcata llaquichishpami chai llajtamanta llujshichishpa cacharcacuna.

⁵¹ Paicunaca chai llajtapi causajcunataca mana alli cashcata ricuchishpami, chaquipi japirishca ñutu allpatapish chaspishpa, Iconio puebloman rircacuna.

⁵² Chai llajtapi Jesusta catijcunaca jucha illaj Espirituhuan junda cashcamanta cushicuihuanmi carcacuna.