Hechos 12 - Dios Rimashca Shimicunami

Jacobotaca huañuchishca Pedrotaca carcelashcami

¹ Chai punllacunallatajmi jatun mandaj Herodesca, tandanacushca crijcunata llaquichisha nishpa maijan crijcunata japichirca.

² Juanpaj huauqui Jacobotaca, espadahuanmi huañuchirca.

³ Chashna rurajta ricushpa, judiocunaca achcata cushicujpimi Pedrotapish japichirca. Chai punllacunaca, levadura illaj tandata micuna punllacunami carca.

⁴ Herodesca Pedrota japichishpaca, punllapi chuscu cutin chuscu chuscu soldadocuna cuidacun carcelpimi churarca. Pascua pasajpi tucuicunapaj ñaupajman llujshichinatami yuyarirca.

⁵ Chaimi Pedrotaca, carcelpica alli cuidaracurcacuna. Chashna cajpipish tandanacushca crijcunaca mana samarishpami, Pedromantaca Taita Diosta mañacurcacuna.

Pedrota carcelmanta llujshichishcami

⁶ Cayami gentecunaman ricuchingapaj llujshichisha nishpa Herodes yuyacui tutaca Pedroca ishqui cadenahuan huatashcami, ishqui soldadocunapaj chaupipi dormicurca. Shujtaj soldadocunapish cárcel pungupimi cuidashpa shayacurca.

⁷ Chashna cajpipish Jatun Diospaj shuj ángel ñapish ricurishpami, cárcel ucutaca achijyachirca. Pedrotaca, costillapi tuparishpa rijchachishpaca: “Utca jatari” nircami. Chashna nincami huatashca cadenacunaca Pedropaj maquicunamantaca cacharirishpa urmarca.

⁸ Chai angelca: “Alli chumbilliri, cambaj pargatetapish churarishpa huatari” nircami. Pedro chashna rurajpica cutin chai angelca: “Jahua churanata pillurishpa, ñucata cati” nircami.

⁹ Pedroca angelta catishpa llujshicushpaca, ángel chashnataj ruracushcataca mana yuyarcachu. Ashtahuanpish muscuipi shina ricucushcallatami yuyarca.

¹⁰ Ña llujshicushpaca punta cuidaj, q'uipa cuidaj soldadocunata pasashpami, canllaman llujshina fierro punguman chayarcacuna. Chai punguca paillataj pascarijpimi, llujshishpa shuj ñanta ch'imbashca q'uipaca, chai angelca chingarircalla.

¹¹ Chaimi Pedro yuyaita japishpaca: “Herodespaj maquimantapish, ñucata huañuchichun chapacuj judiocunamantapish quishpichichunca, Jatun Diosmi paipaj angelta cachashca. Chaitaca cunanmari allitaj entendini” nirca.

¹² Chaita yuyarihuan ricushpaca, Marcos nishca Juanpaj mama Mariapaj huasimanmi chayarca. Chaipica achcacunami tandanacushpa, Taita Diosta mañacurcacuna.

¹³ Huasi canllaman yaicuna pungupi Pedro huajtajpica, Rode shuti huambrami pi cashcata ricunaman llujshirca.

¹⁴ Chai huambraca Pedropaj rimaita rijsishpaca, cushicushcamanta punguta mana pascashpami: –Pedromari cashca– nishpa huillanaman callpashpa rirca.

¹⁵ Chaita huillajpimi paicunaca: –¿Musparinguichu, imamí?– nijpi chai huambraca: –¡Pedrotajmari mana musparicunichu!– nijpi paicunaca: –¡Shinashpaca paipaj angelmi canga!– nircacuna.

¹⁶ Chaicamaca Pedroca pungupi ashtahuan huajtacurcallami. Punguta pascashpa paita ricushpaca, yallitajmi mancharircacuna.

¹⁷ Paica maquihuan upalla caichij nishpami, carcelmanta Mandaj Jesús ima shina llujshichishcata parlarca. Chaipica: –Caitaca Jacoboman, caishuj crijcunamanpish yachaj chayachinguichij– nishpa, llujshishpaca shujtajmanmi rirca.

¹⁸ Ña pacarijpica soldadocunapurami: –Pedroca imashi tucurca– nishpa yallitaj bullacurcacuna.

¹⁹ Ashtahuanpish Herodesca, Pedrota mashcashpa mana japishpami, soldadocunata juchachishpa, paicunata huañuchichun mandarca. Chai q'uipami, Herodesca Judeamanta Cesareaman uriyashpa chaipi causarca.

Herodes huañushcami

²⁰ Herodesca Tiropi, Sidonpi causajcunahuanmi p'iñarirca. Chashna p'iñarishpami chai llajtapi causajcunamanca Herodesca paicuna imalla randina cashcata ña mana c'aturca. Chaimantami chai pueblopi causajcunaca Herodes churashca mandaj Blastohuan shuj yuyailla tucushpa, sumajlla causanata Herodestaca mañarcacuna.

²¹ Herodesca paicunahuan parlanacungapajca shuj punllatami agllarca. Chai punllapimi paica mandangapaj churanata churarishpa jatun tiyanapi tiyarishpa sumajta rimarca.

²² Chashna rimajta tucui chaipi cajcuna uyashpaca: “¡Canca diosmi cangui, mana runachu cangui!” nishpami caparircacuna.

²³ Chashna nijpica Taita Diosta jatunyachinapaj randica pairaj jatun tucushcamantami Jatun Diospaj shuj ángel ungüita cujpi Herodesca c'urucuna micushca huañurca.

²⁴ Jatun Diospaj Shimita huillajpica crijcunaca achcacunami crircacuna. Yallitaj achcami mirarircacuna.

²⁵ Bernabepish Saulopish paicunaman rurachun mingashcata pajtachishpami Marcos nishca Juantapish Jerusalenmanta pushashpa Antioquiaman cutin tigrarcacuna.