Hechos 10 - Dios Rimashca Shimicunami

Pedropish Corneliopish

¹ Cesareapica, Cornelio shuti shuj runami tiyarca. Paica “Italiana” nishca soldadocunapurapi caj patsaj soldadocunata mandajmi carca.

² Paica paipaj familiandij Taita Diosta yuyarij, Taita Diosta manchaj, Taita Diosta mañaracujmi carca. Israelcunata llaquishpa achcata cujmi carca.

³ Shuj punlla chaupi chishi shinatami, muscuipi shina Taita Diospaj ángel pai maipi canman yaicujta ricurca. Chai angelca: –¡Cornelio!– nijpimi

⁴ Cornelioca manchaihuan ricurashpa: –Amito ¿imatataj nihuangui?– nijpi angelca: –Can mañashcacunapish Taita Diospajman chayashcami, can cushcacunatapish Taita Diosca ricushcami.

⁵ Cunanca Jopemanta Pedro nishca Simonta pushamuchun cambaj runacunata cachai.

⁶ Paica carata ñutujllata ruraj Simonpaj huasipimi pozacun. Chai huasica mama cucha c'uchupimi. Pedro shamushpami can imallata rurana cashcataca huillanga– nircami.

⁷ Chai rimacuj ángel ña rijpica, Cornelioca paipajta ruraj ishqui runacunatapish, Taita Diosta yuyarij pai alli nishca soldadotapishmi cayarca.

⁸ Imalla tucushcata tucuita parlashca q'uipaca, paicunataca Jopemanmi cacharca.

⁹ Cayandij punllaca chai cachashca runacuna ñanta rishpami Jope puebloman ñalla chayagricurcacuna. Chai horas shinallatajmi Pedroca, Taita Diosta mañangapaj huasi jahuaman huichiyarca. Chaica chaupi punlla shinami carca.

¹⁰ Pedroca chaipi cashpami achcata yaricachirca. Micunata huasiyuj yanungacamaca muscuipi ricurij shinatami ricurca.

¹¹ Chaipica jahua pacha pascarijpi shuj jatun linso shinata chuscu puntapi huatashca cai pachaman uriyamucujtami ricurca.

¹² Chaipica chuscu chaquihuan purij animalcunata, huijsahuan purij animalcunata, jahuata purij pajarocunatapishmi ricurca.

¹³ Chaita ricucujpica shuj rimashca uyarishpami: –Pedro, jatari, huañuchishpa micui– nijpi,

¹⁴ Pedroca: –Mana, Mandaj Jesús, imapish mana micuna cashcata, mapami nishcacunataca manataj micushcanichu– nirca.

¹⁵ Chaimi chai rimajllataj cutin rimashpaca: –Taita Dios chuyayachishcataca, canca ama mapami nichu– nirca.

¹⁶ Chashnataca quimsa cutin ricuchishpaca, chai linsotaca jahua pachallamantaj aparcallami.

¹⁷ Chaita ricushpaca Pedroca, muscuipi shina ricushcaca imatashi nisha nin nishpami yuyacurca. Chaicamaca Cornelio cachashca runacunaca, tapui tapuimi Simonpaj huasiman chayarcacuna.

¹⁸ Paicuna chayashpaca: –¿Pedro nishca Simonca caipipishchari pozacun?– nishpami tapurcacuna.

¹⁹ Chai ricushcata Pedro yuyaricujpirajmi Taita Diospaj Espirituca cashna nirca: “Cantaca quimsa runacunami mashcacun.

²⁰ Jatari, uriyai, paicunahuan rilla. Rishachu, manachu risha nishpaca ama yuyanguichu. Ñucami paicunataca caiman cachachun nircani” nircami.

²¹ Chaimi Pedroca, Cornelio cachashca runacunapajman uriyashpaca: –Ñucami cancuna mashcacunca cani. ¿Imapajchari cancunaca shamurcanguichij?– nijpi,

²² paicunaca: –Ñucanchijca patsaj soldadocunata mandaj Cornelio cachajpimi shamunchij. Paica Taita Diosta manchaj, cashcata rurajmi. Paica judiocuna alli nishcami causan. Paimanmi jucha illaj ángel ricurishpaca: “Pedrota cambaj huasiman pushanaman cachai, pai imalla huillashcata alli uyangui” nishcami– nircacunami.

²³ Chaimi Pedroca paicunata pai pozacun huasiman yaicuchishpaca chai tutaca chaipi pacarichirca. Cayandij punlla Pedro paicunahuan rijpica, Jope pueblopi causaj maijan crijcunapishmi paicunahuan rirca.

²⁴ Chai cayandij punllaca, Cesareamanmi chayarcacuna. Cornelioca paipaj familiacunata, amigocunatapish tandachishpami shuyacushca carca.

²⁵ Corneliopaj huasiman Pedro chayajpica, Cornelioca tupanaman llujshishpaca Pedrota adorangapaj,

²⁶ cungurijpimi Pedroca: –Jatari, ñucapish can shinallataj runallami cani– nishpa jatarichirca.

²⁷ Shina nishpa parlanacuihuan huasi ucuman yaicushpaca, achcacuna tandanacushca cajtami ricurca.

²⁸ Chaimi Pedroca paicunataca: –Judiocunaca, mana judiocunahuanca mapayanamanta mana tandanacuna, mana c'uchuyanallapish cashcataca cancunallataj yachanguichijmi. Ñucanchijca cancunataca yanga runacunalla cashcata yuyashpa causacujpimi Taita Diosca: “Canca pitapish millananmi, mapami nishpaca ama ningui” nishpa ricuchishpa huillarca.

²⁹ Chaimantami ñucaca can cachashca runacuna chayajpica, imata mana nishpa shamuni. Ñucataca ¿imapajtaj cayarcangui?– nijpimi,

³⁰ Cornelioca: –Ñami chuscu punlla tucun. Ñucaca cunan shinallataj chishimi quimsa horas shinata manaraj micushpa ñuca huasipi Taita Diosta mañacurcani. Chaipimi achij nicuj churanata churashca runa ñuca ñaupajpi ricurishpa,

³¹ cashna nirca: “Cornelio, can mañashcataca Taita Diosca uyashcami. Huajchacunaman can cushcacunatapish Taita Diosca ricushcami.

³² Cunanca Pedro nishca Simonta Jope pueblomanta pushanaman cachai. Paica carata ñutujllata ruraj Simonpaj huasipimi pozacun. Chai huasica mama cucha c'uchupimi. Chai Pedro shamushpami can imalla rurana cashcataca huillanga” nircami.

³³ Chaimantami ñucaca canta pushanaman cacharcani. Allitajchari shamurcangui. Ñucanchijman Taita Dios imallata huillachun nishcata huillailla. Ñucanchijca chaita uyangapajmi Taita Diospaj ñaupajpi caipi canchij– nircami.

Corneliopaj huasipi Pedro huillashcami

³⁴ Chaipi Pedro huillai callarishpaca cashnami nirca: –Pi cashpapish Taita Diospaj ñaupajpica tucuicuna chai shinallataj cashcatami cunantajca yachani.

³⁵ Maijan llajtapi causaj cashpapish Taita Diosta manchashpa allita rurajtami Taita Diosca alli nin.

³⁶ Taita Diosca shuj huillanatami israelcunamanca cacharca. Chaica Jesucristomanta sumaj causaita charina cashcata huillanami. Paica tucuicunata Mandajmi.

³⁷ Chai huillaica Juan bautizarinami nishpa huillashca q'uipa Galileamanta callarishpa, tucui Judeata ima shinalla huashan huashan yacharishcataca cancunallataj yachanguichijmi.

³⁸ Paica Nazaretmanta Jesusmi. Paitami Taita Diosca jucha illaj Espirituta cushpa, tucuita rurai tucuj cachun churarca. Taita Dios paihuan cajpimi, diablo llaquichicushcacunataca tucuicunata alliyachishpa, achca allicunata rurashpa purirca.

³⁹ Ñucanchijca Judea llajtapi, Jerusalenpipish Jesús tucui imalla rurashcacunata ricushcata huillajcunami canchij. Paitaca caspipi huarcushpami huañuchircacuna.

⁴⁰ Huañuchijpipish Taita Diosca paitaca quimsa punllapi causachishpami ñucanchijman ricurichun saquirca.

⁴¹ Mana tucuicunaman ricurircachu. Tucui imallata ricushcata huillachun Taita Dios ñaupaman agllashca ñucanchijllamanmi ricurirca. Huañushcacunapaj chaupimanta causarishca q'uipaca, ñucanchijca paihuanmi micurcanchij, ubyarcanchij.

⁴² Chaipimi Jesusca tucuicunaman huillachun mandarca. Causajcunapajpish huañushcacunapajpish Jesustaca juez cachunmi Taita Diosca churarca nishpa huillachunpishmi mandarca.

⁴³ Profetacunapish Jesusmanta huillashpaca, paita crijcunallatami juchacunata perdonanga nishpami tucuicunallataj huillarcacuna– nircami.

Mana israelcunapish jucha illaj Espirituta chasquishcami

⁴⁴ Pedro chashna huillacujpirajmi, jucha illaj Espirituca huillashcata tucui uyacujcunapaj jahuaman shamurca.

⁴⁵ Circuncisionta rurashca crijcunami Pedrohuanca shamushcacuna carca. Paicunaca mana judiocunapaj jahuamanpish, jucha illaj Espíritu shamujta ricushpaca yallitaj mancharircacuna.

⁴⁶ Shujtaj rimaicunapi rimashpa, Taita Diosta jatunyachicujta uyashpami mancharircacuna.

⁴⁷ Chaimi Pedroca: –Paicunapish ñucanchij shinallatajmari jucha illaj Espirituta chasquincuna. Paicuna yacupi ama bautizarichunca ¿pitaj jarcangari?– nijpimi,

⁴⁸ Pedroca: –Mandaj Jesuspaj shutipi paicunata bautizaichij– nishpa mandarca. Chaimantaca asha punllacunacama paicunahuan saquirichunmi Pedrotaca rogarcacuna.