Hechos 1 - Dios Rimashca Shimicunami

Jucha illaj Espirituta cusha nishcami

¹ C'uyashca Teófilo. Sarunman ñuca quillcashpaca, callarimanta tucui imallata Jesús rurashcata, yachachishcataca,

² jahua pachaman rina punllacama pai imallata rurashcataca ñami quillcarcani. Paica manaraj jahua pachaman rishpami pai agllashca apostolcunataca jucha illaj Espirituhuan imallata rurana cashcata mandarca.

³ Paicunamanmi Jesusca huañushca q'uipaca chuscu chunga punllacama pai causaj cashcata alli yachachun cutin cutin ricurirca. Chaipica Taita Dios mandacujpica ima shina cana cashcatami yachachirca.

⁴ Jesusca paicunahuan cashpaca, cashna nishpami mandarca: –Jerusalenmantaca amaraj ringuichij. Ñuca sarunman huillashca shinallataj ñuca Yaya cusha nishca jucha illaj Espíritu shamungacama shuyanguichij.

⁵ Juanca yacullahuanmi bautizarca. Ashtahuanpish cancunaca jucha illaj Espirituhuanmi asha punllacuna q'uipaca, bautizashca canguichij– nircami.

Jahua pachaman Jesús rishcami

⁶ Chaipi tandanacushcacunaca: –Mandaj Jesús ¿cunanllatajchu ñucanchij llajtata mandacujpaj maquimanta quichushpa ñucanchij judiocunallataj mandaj cachun churangui?– nircacunami.

⁷ Chaimi Jesusca: –Chaitaca, ñuca Yayallami yachan. Cancunaca ima huata, ima punlla canata mana yachanachu canguichij.

⁸ Shina cajpipish jucha illaj Espíritu cancunapaj jahuaman shamujpimi, imatapish rurai tucuj canguichij. Chashna cashpami ñucamantaca Jerusalenpi, tucui Judeapi, Samariapi, cai pachapi tiyaj tucui llajtacunapi huillanguichij– nircami.

⁹ Tucui caicunata nishca q'uipami, paicuna ricucujpi Jesustaca jahua pachaman apajpi, paita p'uyu chasquishpa pacajpica, ña mana ricui tucurcacuna.

¹⁰ Jesús chashna rijta paicuna huichilla ricuracujpimi, ñapish ishqui runacuna yurajlla churanata churarishca paicunapaj c'uchupi ricurishpaca,

¹¹ cashna nircacuna: –Galilea runacuna ¿ima nishpataj jahua pachata huichilla ricuracunguichij? Cancunapajmanta jahua pachaman apashca Jesusllatajmi, cutin tigramunga. Ima shinami pai rijta ricurcanguichij, chashnallatajmi shamunga– nircacunami.

Matiasta Judaspaj randi agllashcami

¹² Chai q'uipami Olivar shuti urcumantaca, Jerusalenman tigrarcacuna. Jerusalenmanta chai urcuca, samana punllapi purina shinallami carca.

¹³ Chaiman chayashpaca, paicuna pozacushca altibajo huasimanmi huichiyarcacuna. Paicunaca Pedro, Jacobo, Juan, Andrés, Felipe, Tomás, Bartolomé, Mateo, Alfeopaj churi Jacobo, Zelote nishca Simón, Jacobopaj huauqui Judaspishmi carcacuna.

¹⁴ Tucui paicunami maijan huarmicunandij, Jesuspaj mama Mariandij, Jesuspaj huauquicunandij shuj yuyailla tucushpa Taita Diosta mañashpa rogacurcallacuna.

¹⁵ (Chaipi tandanacushpa mañajcunaca, patsaj ishqui chunga shinami carca). Chai punllacunapimi Pedroca, paicunapaj chaupipi shayarishpa cashna nirca:

¹⁶ –Huauquicuna, jucha illaj Espíritu Davidta quillcachishcapi Judasmanta huillashcaca pajtanataj cashcamanta ñami pajtarca. Jesusta japijcunataca Judasmi Jesús maipi canman pushashpa rirca.

¹⁷ Judasca ñucanchijpurapimi carca. Judasca ñucanchijhuan Jesusmanta huillagrichun cayashcami carca.

¹⁸ Judas millaita rurashpa japishca cullquihuanca, allpatami randirca. Judasca jahuamanta urisingaman urmashpami, huijsa tugyajpi chunllullicunapish tallirirca.

¹⁹ Chaitaca, Jerusalenpi tucui causajcunami yacharcacuna. Chaimantami chai allpataca, paicunapaj quiquin rimaipica Aceldamata shutichircacuna. (Acéldama nishpaca, “Yahuar Allpa” nisha ninmi).

²⁰ Salmos libropica, cashna nishpami quillcashca tiyacun: “Pai causashca huasica shitashca saquirichun, chaipi causajpish pi ama tiyachun”. “Paipaj ruranatapish shujtaj japichun” ninmi.

²¹ Chaimanta Mandaj Jesús ñucanchijpurapi causacujpiraj, ñucanchijhuan punllanta purij runacuna tiyanmi.

²² Paicunaca Jesusta Juan bautizacushca punllamanta Jesús jahua pachaman ringacama purijcunami. Jesús causarishcata ñucanchijhuan huillaj cachun, paicunamanta maijantapish shujta agllanatajmi canchij– nircami.

²³ Pedro chashna nijpica, ishquitami ch'icanchircacuna. Shujca Justo nishca José shuti Barsabasmi carca. Caishujca Matiasmi carca.

²⁴ Chaimi cashna nishpa, Taita Diosta mañarcacuna: “Jatun Dios canca, tucuicunapaj shungutami rijsingui. Cunan cai ishquimanta maijanta can agllashcata ñucanchijman ricuchihuai.

²⁵ Paica can imalla rurai nishcata ñucanchijhuan rurachun, apóstol canatapish japichun. Judasca millaita rurashpa urmashcamantami pai maiman rina cashcaman rin” nircacunami.

²⁶ Mañashca q'uipa sorteajpica Matiaspajmi urmarca. Paimi chunga shuj apostolcunahuan tandanacurca.