Hebreos 8 - Dios Rimashca Shimicunami

Mushuj ari nishcapi Dioshuan runacunahuan rimajmi

¹ Cai tucuita cancunaman huillacushcamanta jatun yuyaica caimi: Ñucanchijca curacunata jatun pushaj curatami charinchij. Paica jahua pachapi Jatun mandajpaj tiyarina alli ladopimi tiyarirca.

² Jesusca mana gentecuna rurashca, Jatun Dios rurashca Diospajlla ucupimi curacuna rurana cashcata ruracun. Chai huasimi Diospajtaj huasica.

³ Curacunata jatun pushaj curataca tucuicunatami imalla cushcacunata, sacrificiocunatapish Diosman cuchun churashca. Chashna cajpica, Jesuspish Diosmanca imallatapish cunataca charinmari.

⁴ Mandashcapi nishca shinaca, Diosman cushca ofrendacunata cuj curacuna tiyashcaraj cajpica, pai cai pachapi cashpaca curallapish mana canmanchu carca.

⁵ Diospaj carpa huasita Moisés ruranapajca Diosmari Moisestaca: “Riqui, chai urcupi ima shinalla ruranata ricuchishca shinataj tucuita rurangui” nishca. Chaimantami chai curacunaca jahua pachapi tiyajmanta ricuchij llandu shinalla Diospaj carpa huasipica Diospajta rurancuna.

⁶ Ashtahuanpish Jesús Diospajta ruranaca paicuna ruracushcata mai yalli allimari. Ñaupaman cusha nishcamanta yalli allita cusha nishpa ari nishcapi caishujmanta chaishujmanta rimaj cachun churashcami.

⁷ Dios ñaupaman cusha nishpa ari ninacushca allillataj cashca cajpica, shujtajta cusha nishpa mana ari ninmanchu carca.

⁸ Chaimanta paicunata rimashpami cashna nirca: “(Jatun Diosca cashnami nin) Shamuj punllapica Israelpaj, Judapaj ailluhuanca shuj mushuj ari nishcatami churasha.

⁹ Mana cancunapaj ñaupa yayacunata maquimanta aisashpa Egiptomanta llujshichi punllapi ari ninacushca shinachu rurasha. Ñucahuan ari ninacushcata pajtachinapi mana catijpimi paicunataca shitashcata saquircani. (Ninmi Jatun Diosca)

¹⁰ Chai punllacuna q'uipaca, israelcunaman cusha nishpa ari nishcaca cashnami canga. Ñuca mandashcacunataca paicunapaj yuyaipimi churasha, paicunapaj shungupimi quillcasha. Chashna rurashpaca, paicunapaj Diosmi casha, paicunapish ñuca pueblomi cangacuna (ninmi Jatun Diosca)

¹¹ Chai punllacunapica uchillacunapish jatuncunapish ña ñucata rijsishcamanta paipuratapish paipaj huauquitapish “Jatun Diosta rijsinami cangui” nishpa pi mana yachachingacunachu.

¹² Paicuna ima mana allicunata rurashcacunatapish perdonashami. Paicunapaj juchacunata, millaita rurashcacunatapish manataj yuyarishachu” ninmi.

¹³ “Mushuj ari nishcata” nishpaca, ñaupaman cusha nishpa ari nishcapaj randimi mushujta ari nishca. Chai maucaca, maucayashpa ñallami chingaringa.