Hebreos 1 - Dios Rimashca Shimicunami

¹ Ñaupa punllacunapica ñucanchij yayacunamanca, achca cutin tucui layami profetacunata huillachishpa Diosca rimarca.

² Chai tucuipaj q'uipa cunan punllacunapica, paipaj Churitami ñucanchijmanca Diosca huillachirca. Paitami tucui imalla tiyajcunatapish japij cachun churarca. Paillahuantajmi cai pachata, jahua pachata tucui imalla tiyajcunatapish rurarca.

³ Diosca achij nicuj sumaj cashcata, pai ima shina cashcatapish paipaj Churimi ricuchicun. Paipaj poderyuj rimaihuanmi, tucui ima tiyajtapish charicun. Paillapitaj ñucanchij juchacunata chuyayachishpami, jahua pachapi Jatun Mandajpaj alli ladopi tiyarirca.

⁴ Diosca paipaj Churitaca angelcunata yalli cachunmi churarca. Angelcunapaj shutitapish yalli jatun shutitami paimanca curca.

Churica angelcunata yalli jatunmi

⁵ Diosca angelcunataca ni maijan angelta: “Canca ñuca Churimi cangui. Ñucaca cambaj yayami tucurcani” ninataca manataj nircachu. Shinallataj: Angelcunataca ni maijan angelta: “Ñucaca paipaj Yayami casha. Paica ñuca churimi canga” ninatapish manataj nircachu.

⁶ Cashnapishmi nirca. Paipaj shujlla Churita cai pachaman cachashpaca: “Diospaj tucui angelcuna, paita adoraichij” nircami.

⁷ Angelcunata nishpaca Diosca: “Paipaj angelcunataca, espiritucunatami rurashca, paipajta rurajcunataca nina cunyacujtami rurashca” nircami.

⁸ Ashtahuanpish paipaj Churitaca, cashnami nirca: “Dioslla, can mandashpa tiyanaca, huiñai huiñaipajmi. Cambaj varaca cashcata rurashpa mandanami.

⁹ Canca cashcata ruranatami c'uyashcangui, millaita ruranataca p'iñashcanguimi. Chaimantami cambaj Diosca, canhuan cajcunatapish yalli canapi cushicuchun, cantaca aceitehuan llihuij shina ch'icanchishca” nircami.

¹⁰ Cashnapishmi nirca: “Jatun Dios, callaripica canmi cai pachataca rurarcangui. Jahua pachapish cambaj maquicuna rurashcami.

¹¹ Chaicunaca chingaringacunami. Ashtahuanpish canca huiñaipajmi cangui. Tucui chaicunaca, churana shinami maucayangacuna.

¹² Chaicunataca churanata shinami pilluchingui, shujtajyachishcapishmi canga. Ashtahuanpish canca, canllatajmi cangui. Cambaj huatacunapish manataj tucuringachu” nircami.

¹³ Diosca ¿maijan angeltataj: “Ñuca alli ladopi tiyari, canta p'iñajcunata cambaj chaqui sarunapi ñuca churangacama” nishca?

¹⁴ ¿Manachu tucui angelcuna Diospajta ruraj espiritucuna? ¿Manachu paicunaca quishpirinata japijcunapaj allita rurachun cachashcacuna?