HAGEO 1 - Dios Rimashca Shimicunami

Diospaj huasita cutin shayachichun mandashcamanta

¹ Persia llajtataca jatun mandaj Darioca, ñami ishqui huata sujta quillata mandacurca. Sujta quillapaj punta punllapimi, Mandaj Diosca pai ima nishcata huillaj Hageotaca, Judá llajtata mandaj Zorobabelpajmanpish, curacunata mandaj Josuepajmanpish cacharca. Zorobabelca, Salatielpaj churimi carca. Josueca, Josadacpaj churimi carca. Paicunamanca Hageoca cashnami nirca:

² Tucuita Mandaj Diosca cashnami nin: “Cai runacunaca: Mandaj Diospaj huasita cutin shayachina punllaca manaraj chayamunchu nincunami” ninmi.

³ Chaimantami Mandaj Diosca, pai ima nishcata huillaj Hageotaca, cashna huillachun cacharca:

⁴ “Diospaj huasi ¿shitashca siricujpirajchu cancunaraj achij nicuj sumaj huasicunapi causacunguichij, imamí?” ninmi.

⁵ Chaimantami tucuita Mandaj Diosca cashna nin: “Cancuna ima shina cashcataraj yuyarichigari.

⁶ Cancunaca achcata tarpushpapish, ashallatami japinguichij. Micushpapish mana huijsa jundata micunguichijchu. Yacuta ubyashpapish, yacunaillahuantajmi saquiringuichij. Chirijpi churanacunata churarishpapish, manataj cunujyanguichijchu. Trabajashcamanta cullquita japishpapish, jutcu muchilapimi huaquichinguichij” ninmi.

⁷ Chaimantami tucuita Mandaj Diosca cashna nin: “Cancuna ima shina causacushcataraj alli yuyarichigari.

⁸ Urcumanta caspicunata apamushpa, ñuca huasita cutin shayachichij. Chashna rurajpimi chai huasipica, ñuca alli cashcata ricuchisha. Chashnami ñucaca jatunyachishca casha” ninmi Mandaj Diosca.

⁹ Tucuita Mandaj Diosca cashnapishmi nin: “Cancunaca imatapish achcata japina yuyailla cashpapish, ashallatami japinguichij. Cancunapaj huasicunapi huaquichishcatapish huaira apaj shinami, ñucaca tucuita apasha. ¿Imamantataj chashna llaqui tucunchij? yuyanguichijchari. Ñuca huasita shitashca siricujta ricushpapish, cancunapaj huasicunataraj sumajta allichicujpimi chashna rurani.

¹⁰ Chaimantami cancunapajca tamyapish jahua pachamantaca ña mana ashtahuan shamun, allpacunapipish ima grano mana ashtahuan p'ucun.

¹¹ Ñucamari cai llajtapica mana tamyachircani. Chaimantami urcucunapish, tarpuna allpacunapish tucui chaquishca siricun. Shinallataj trigotapish, vinotapish, aceitetapish, allpapi imalla p'ucushcatapish tucuimi chaquichircani. Runacunatapish, animalcunatapish, runacunapaj maquihuan trabajashcacunatapish tucuimi chingachircani” nishpami huillachirca.

¹² Salatielpaj churi Zorobabelpish, Josadacpaj churi curacunata mandaj Josuepish, tucui shujtajcunapishmi paicunata Mandaj Dios chashna nichun cachashcata uyarcacuna. Dios ima nishcata huillaj Hageo chashna huillajta uyashpami, paicunaca Mandaj Diospaj ñaupajpica achcata mancharcacuna.

¹³ Chashna manchajpica, Mandaj Dios cachashca Hageoca Mandaj Diosllataj huillanaman cachajpimi: “Mandaj Diosca: Ñucaca cancunahuanmi cani ninmi” nirca.

¹⁴ Mandaj Diosca chashna huillachishpami, Judá llajtata mandaj Salatielpaj churi Zorobabelpaj yuyaitapish, curacunata mandaj Josadacpaj churi Josuepaj yuyaitapish, chaipi tucui causajcunapaj yuyaitapish pascarca. Chaimantami tucuita Mandaj, paicunapaj Taita Diospaj huasitaca allichinata callarircacuna.

¹⁵ Jatun mandaj Darío ña ishqui huatata mandacui sujta quillapaj ishqui chunga chuscu punllapimi, chai huasitaca allichinata callarircacuna.