HABACUC 3 - Dios Rimashca Shimicunami

Habacucca Taita Diosta mañashcamanta

¹ Dios ima nishcata huillaj Habacucca, Sigionot nishca shinami mañarca:

² Mandaj Dioslla, cambaj shimicunata uyashpaca mancharircanimi. Mandaj Dioslla, ñaupa huatacunapi can imalla rurashcata ricuchihuayari. Ñaupa huatacunapi rurashcacunata rijsichihuayari. Can p'iñarishca cashpapish, ñucata llaquinataca yuyaripangui.

³ Taita Diosca, Temán pueblomantami shamunga. Ima jucha illajca, Parán urcumantami shamunga. Selah Jahua pachataca, paipaj sumaj cashcami taparca. Shinallataj cai pachapica, paipaj alabanami jundarca.

⁴ Achij nicujca, luz shinami carca. Paipaj maquimantaca, achij nicuj rayocunami llujshirca. Chaipimi pai tucuita rurai tucuj cashcaca pacalla tiyacurca.

⁵ Paipaj ñaupajmantaca, huañuicunami rirca. Paipaj chaquicunamantaca, nina rupacuj brazusmi llujshirca.

⁶ Paica jatarishcahuanmi cai pachataca medirca. Ricushpallami runacunatapish chujchuchirca. Ñaupamanta tiyaj urcucunaca mirga mirgami tucurca. Ñaupamanta tiyaj lomacunaca tucuimi chingarirca. Paipaj ñancunaca huiñaimanta huiñaicama mana tucurij ñancunami.

⁷ Cusán llajtapi tiyaj carpa huasicuna urmajtapish ricurcanimi. Madián llajtapi tiyaj carpa huasicunapish chujchurcami.

⁸ Mandaj Dioslla, ¿canca jatun yacucunahuanchu p'iñaringui imatagari? ¿Canca jatun yacucunahuanchu p'iñarircangui? ¿Canca cambaj caballocunapi, cambaj mishana carretacunapi tiyarishpachu jatun mama cucha yacuta ch'imbarcangui?

⁹ Cambaj arcotami ricuchircangui. Aillucunaman ari nishca shimicunapish mana llullachu carca. Selah Allpatapish, jatun yacucunahuanmi c'aca huaicuta rurarcangui.

¹⁰ Canta ricushpaca urcucunapish mancharcami. Yacu jundaicunapish pasarcami. Manchanana jatun jutcupish caparircami. Mama cucha yacupish, caiman chaimanmi cuyurirca.

¹¹ Intipish, lunapish paicuna causanapimi shayarircacuna. Cambaj puntajlla caspicuna achijyachijpi, cambaj achij nicuj lanza achijyachijpimi purircacuna.

¹² Canca jatunta p'iñarishpami, cai pachataca sarurcangui. Canca jatunta p'iñarishpami, llajtacunapi causajcunataca trillarcangui.

¹³ Canca cambaj agllashcacunatapish, can agllashpa churashca mandajtapish mitsanamanmi llujshircangui. Canta mana manchaj runapaj huasi c'atataca, tucuimi urmachircangui. Yacu rumi ricuringacamami, callari rumicunataca, mashcashpa llujshichircangui. Selah

¹⁴ Paicunapaj soldadocunataca, paicunapaj quiquin flechacunallahuantajmi umata jutcurcangui. Jatun acapana shinami ñucataca, caita chaita aparcacuna. Paicunaca, imata mana charij huajchata pacallapi huañuchij shinami ñucata huañuchishpaca, cushicushun yuyarcacuna.

¹⁵ Caiman chaiman cuyuricuj mama cucha yacu jahuataca, cambaj caballocunapi tiyarishpami purircangui.

¹⁶ Ñucaca, chai tucuitami uyarcani. Chaita uyashpaca, ñuca aichapi imalla tiyajcunapish zaillami mancharirca. Rimagrishpapish ñuca shimi jitacunaca chujchurcami. Ñuca tullucunapish ismucuj shinami carca. Ñuca yuyaipica, ña tucuricuj shinami tucurcani. Chashna cashpapish, llaquichij runa paipaj soldadocunahuan huaicashpa cai llajtaman yaicumujpipish, ñucaca chai llaqui punllapica mana imata manchashachu.

¹⁷ Higocuna mana sisajpipish, uvacuna mana granujpipish, olivocuna mana p'ucujpipish, imalla tarpushcacuna mana huiñajpipish, ovejacunata quichujpipish, vacacuna corralpi mana tiyajpipish,

¹⁸ ñucaca Mandaj Dioshuanmi cushicusha. Ñucaca, ñucata quishpichij Taita Diospimi cushicuita charini.

¹⁹ Mandaj Jatun Diosca, ñucata pacajmi. Paimari ñuca chaquicunatapish tarugata shina utca callpajta ruran. Jahua urcucunaman pushashpami, chaipi purichin. Cuerdayuj ñuca tocanacunapi tocashcahuan cantajcunata pushaj cantachinami.